2050 నాటికి 130 కోట్ల మందికి మధుమేహం

‘‘మధుమేహం పెరుగుతున్న వేగం ఆందోళనకరమే కాక ప్రపంచ ఆరోగ్య వ్యవస్థకు సవాలు కూడా. దీని వలన గుండె ఆరోగ్యానికి కూడా పెనుముప్పే. మొత్తం డయాబెటిస్‌ కేసుల్లో 96 శాతం టైప్‌2 డయాబెటి్‌సవే ఉన్నాయి. 1990 నుంచి 2001 మధ్యకాలానికి సంబంధించి 204 దేశాల్లోని ఆరోగ్య సమాచారంపై 2021లో జరిగిన గ్లోబల్‌ బర్డెన్‌ ఆఫ్‌ డిసీజ్‌(జీబీడీ) అధ్యయనాన్ని పరిశోధనలో భాగంగా పరిశీలించాం. తదనుగుణంగా 2050 నాటికి డయాబెటిక్‌ కేసుల సంఖ్యను అంచనా వేశాం. ప్రస్తుత గణాంకాల ప్రకారం ప్రపంచంలో అత్యధిక మరణాలకు కారణాల్లో తొలి 10 కారణాల్లో మధుమేహం కూడా ఉంది’’ అని పరిశోధకులు వెల్లడించారు.

ఇక భారత్ విషయానికి వస్తే 10 కోట్లమందికిపైగా షుగర్‌తో బాధపడుతున్నారు. మరో 14 కోట్ల మంది వరకూ ఈ డయాబెటిక్ జాబితాలోకి వచ్చిచేరనున్నారు. అత్యంత అధిక జనాభా గల భారతదేశంలో అసంక్రమిత వ్యాధుల సంఖ్య ఇతర దేశాలతో పోలిస్తే అత్యధికంగా ఉంటుంది. గుండెజబ్బులు, మానసిక వ్యాధులు, డయాబెటిస్ , శ్వాసకోశ వ్యాధులు వంటి అసంక్రమిత వ్యాధులు ఎక్కువ కావడం ఆందోళన కల్గిస్తోంది.

ప్రత్యేకించి మధ్య స్థాయి ఆదాయపు వనరులతో కొట్టుమిట్టాడే జనం ఉండే దేశాలలో డయాబెటిక్ తోకతొక్కిన విషసర్పం అవుతోంది. 2045 నాటికి ఈ దేశాలలో మూడొంతుల మంది యుక్తవయస్కులు షుగర్‌తో పోరాడాల్సి వస్తుంది. చాలీచాలని ఆర్థిక వనరులుండే ఆయా దేశాలలో ఈ వ్యాధినివారణ లేదా సంరక్షణ సంబంధిత చికిత్సలు అందించడం వీల్లేని పరిస్థితి ఉంటుంది.

పది మందిలో ఒక్కరికే ఈ వ్యాధికి అవసరం అయిన మార్గదర్శకాల చికిత్స సంరక్షణలు అందుతాయి. మిగిలినవారంతా జీవచ్ఛవాలుగా కొట్టుమిట్టాడాల్సి ఉంటుంది. ప్రపంచవ్యాప్తంగా కరోనా మిగిల్చి వెళ్లిన గాయాలలో ఈ డయాబెటిక్ తీవ్రత కీలక విషయంగా మారింది. కరోనా  మహమ్మారి తరువాతి దశలలో ప్రపంచవ్యాప్తంగా కొన్ని దేశాలలో ఈ షుగర్ వ్యాధిగ్రస్తుల సంఖ్య విపరీతంగా పెరిగిందని గుర్తించారు.