సింగరేణిని ప్రవైటీకరించే ప్రసక్తే లేదు.. ప్రధాని స్పష్టం 

రామగుండం ఎరువుల ఫ్యాక్టరీ ఆర్ఎఫ్ సీఎల్ తోపాటు రూ.9500 కోట్ల విలువైన జాతీయ రహదారులు, రైల్వే ప్రాజెక్టులను ప్రధాని మోదీ జాతికి అంకితం చేశారు. అనంతరం నిర్వహించిన సభలో ప్రధాని  మాట్లాడుతూ రామగుండం ఎరువుల ఫ్యాక్టరీ ప్రారంభం వల్ల రైతులకు ఎరువుల కొరత తీరిందని  చెప్పారు.

బీజేపీ ప్రభుత్వం వచ్చాక..దేశంలో అన్ని రంగాల్లో సంస్కరణలు తీసుకొచ్చామని ప్రధాని మోదీ తెలిపారు. 24 గంటల పాటు దేశాభివృద్ధి కోసమే పరితపిస్తున్నామని స్పష్టం చేశారు.  కరోనా ప్రపంచ దేశాలను ఎంతో ఇబ్బంది పెట్టిందని..దీని వల్ల దేశం కూడా తీవ్ర ఇబ్బందులకు గురైందని పేర్కొన్నారు. ఈ కష్టకాలంలోనూ ప్రపంచంలో మూడో అతిపెద్ద ఆర్థిక వ్యవస్థగా దేశం అవతరించిందని ప్రధాని గుర్తు చేశారు.

ఎనిమిదేండ్లుగా సుపరిపాలన అందిస్తున్నామని పేర్కొంటూ దీనికి రామగుండం ఎరువుల ఫ్యాక్టరీయే నిదర్శమని చెప్పారు. రైతులకు ఇప్పటి వరకు రూ. 10 లక్షల కోట్లు ఖర్చుచేశామని మోదీ  వెల్లడించారు. రాబోయే రెండున్నరేండ్లలో మరో రూ. 2.5 లక్షల కోట్లు ఖర్చు చేస్తామని తెలిపారు.

తెలంగాణలో భద్రాద్రి కొత్తగూడెం, ఖమ్మం జిల్లాలను కలిపే రైల్వే లైన్ను ప్రారంభించామని ప్రధాని మోదీ తెలిపారు. వీటితో పాటు జాతీయ రహదారులను ప్రారంభించామని చెప్పారు. రైల్వే లైన్లు, జాతీయ రహదారుల ప్రారంభం వల్ల రాష్ట్రంలో ఎంతో మందికి ఉద్యోగ, ఉపాధి అవకాశాలు లభిస్తాయని పేర్కొన్నారు.

 తెలంగాణలో ఇవాళ  రూ. 10 వేల కోట్ల అభివృద్ధి పనులను ప్రారంభించామని గుర్తు చేస్తూ తెలంగాణ అభివృద్ధి కోసం బీజేపీ ప్రభుత్వం చిత్తశుద్ధితో పనిచేస్తుందని ప్రధాని  చెప్పారు.