విదేశీ వ్యాక్సిన్ల దిగుమతికి ప్రయత్నిస్తూనే ఉన్నాం

విదేశాల నుంచి వ్యాక్సిన్ల దిగుమతుల కోసం కేంద్రం ప్రయత్నించడం లేదని జరుగుతున్న ప్రచారంలో నిజం లేదని కేంద్రం స్పష్టం చేసింది. ఫైజర్, మోడెర్నా, జాన్సన్ అండ్ జాన్సన్ వంటి పలు విదేశీ వ్యాక్సిన్ తయారీ సంస్థలతో ఇప్పటికే పలు దఫాలు సంప్రదింపులు, చర్చలు జరిగాయని తెలిపింది.

అంతర్జాతీయంగా వ్యాక్సిన్ల కొనుగోలు అంటే సూపర్ బజార్‌లో సరకులు కొన్నంత సులభం కాదని, అంతర్జాతీయంగా డిమాండ్‌కు తగినంత ఉత్పత్తి లేకపోవడం వల్ల కంపెనీలు తమ ప్రాధాన్యతలను తామే నిర్ణయించుకుంటాయని తెలిపింది. రష్యాలోని స్పుత్నిక్‌వి వ్యాక్సిన్‌కు క్లినికల్ ట్రయల్స్ అనుమతులు, దిగుమతులు వేగంగా జరిగాయని, అంతర్జాతీయ వ్యాక్సిన్ తయారీ సంస్థలను భారత్‌లో తయారు చేసి, ఇక్కడి మార్కెట్‌కు అందించి ఆ తర్వాత ప్రపంచానికి ఎగుమతి చేయాల్సిందిగా కోరుతున్నామని తెలిపింది.

‘భారత్‌లో వ్యాక్సినేషన్ ప్రక్రియపై అపోహలు వాస్తవాలు’ (మిత్స్ అండ్ ఫ్యాక్ట్ ఆన్ ఇండియాస్ వ్యాక్సినేషన్ ప్రాసెస్)పేరిట విడుదల చేసిన ప్రకటనలో ఇతర దేశాల వ్యాక్సిన్లకు భారత్‌లో అనుమతి ఇవ్వలేదన్న వార్తలు కూడా నిజం కాదని, అమెరికా,యూరోపియన్ యూనియన్, బ్రిటన్, జపాన్, ప్రపంచ ఆరోగ్య సంస్థ ఆమోదించిన వ్యాక్సిన్లకు భారత దేశంలో అనుమతిస్తూ గత ఏప్రిల్‌లోనే ప్రకటన జారీ చేశామని కేంద్రం గుర్తు చేసింది.

దేశీయ ఉత్పత్తి సామర్థం పెంచడంలోను కేంద్ర ప్రభుత్వం చురుగ్గా పని చేస్తోందని పేర్కొంటూ కోవాగ్జిన్ నెలకు ఒక కోటి డోసుల ఉత్పత్తి సామర్థ్యం నుంచి అక్టోబర్ నాటికి 10 కోట్ల డోసుల స్థాయికి చేరుకుంటుందని తెలిపింది. అలాగే కొవిషీల్డ్ నెలకు 6.5 కోట్ల డోసులనుంచి 11 కోట్ల డోసులకు పెరగనుందని, స్పుత్నిక్ వి వ్యాక్సిన్‌ను డాక్టర్ రెడ్డీస్ సమన్వయంతో ఆరు కంపెనీల్లో ఏకకాలంలో ఉత్పత్తి చేయనుందని వెల్లడించింది.

జైడస్ క్యాడిల్లా, బయోలాజికల్‌ఇ, జెన్నోవా సంస్థల స్వదేశీ వ్యాక్సిన్లు కూడా త్వరలోనే అందుబాటులోకి రానున్నాయని తెలిపింది. వ్యాక్సిన్ల తయారీకి అవసరమైన మానవ వనరుల తయారీ, శిక్షణ, బయో సేఫ్టీ లేబరేటరీలు వంటి పలు అంశాలు ఇందులో మిళితమై ఉంటాయని, టెక్నాలజీ బదిలీ ద్వారా భారత్ బయోటెక్ ఇప్పటికే మరో మూడు సంస్థలతో కలిసి కొవాగ్జిన్‌ను ఉత్పత్తి చేస్తోందని తెలిపింది.

మోడెర్నా సంస్థ 2020లోనే తమ వ్యాక్సిన్‌ను ఇంకెవరైనా ఉత్పత్తి చేసినా కేసులు వేయబోమని ప్రకటించింది. అయినా ఇప్పటివరకు ఎవరూ ఉత్పత్తి చేయలేకపోయారు. లైసెన్సింగ్‌తో మాత్రమే ఇది సాధ్యపడదు. వ్యాక్సిన్ల తయారీ అంత సులభమైన అంశమైతే అభివృద్ధి చెందిన దేశాల్లోను వ్యాక్సిన్ల కొరత ఎందుకు ఏర్పడిందని ప్రశ్నించింది.

వ్యాక్సిన్ల సేకరణలో కేంద్రం బాధ్యతలనుంచి తప్పుకొని రాష్ట్రాలకు వదిలేయలేదని స్పష్టం చేసింది. రాష్ట్రాల అభ్యర్థన మేరకే వ్యాక్సిన్ల సేకరణ వెసులుబాటును రాష్ట్రాలకు కల్పించామని కేంద్రం వెల్లడించింది.  ఇక ప్రపంచంలో ఏ దేశంలోను చిన్నారులకు కొవిడ్ వ్యాక్సిన్లు ఇవ్వడం లేదు. ప్రపంచ ఆరోగ్య సంస్థ (డబ్లుహెచ్‌ఓ) కూడా ఇప్పటివరకు చిన్నారులకు వ్యాక్సినేషన్ విషయంలో ఎలాంటి సిఫార్సులు చేయలేదని గుర్తు చేసింది.