ఫోరెన్సిక్ సైన్స్ ల్యాబ్‌ అగ్ని ప్రమాదంపై దర్యాప్తు జరపాలి

అనేక కేసులకు సంబంధించి ఆధారాలు, వివరాలు, ఫోరెన్సిక్ ఎవిడెన్స్ ఉన్న చోటే అగ్నిప్రమాదం జరగడం, ఫైళ్లు కాలిపోవడం వెనుక అనేక అనుమానాలు తలెత్తుతున్నాయని తెలిపారు.  అందుకే ఈ అగ్నిప్రమాదం కేసుపై తప్పనిసరిగా స్వతంత్ర, నిష్పక్షపాత దర్యాప్తు జరగాల్సిందే అని ఆయన డిమాండ్ చేశారు.  ఇది మొదటిసారి కాదని, గతంలో కూడా సెక్రటేరియట్‌లో అగ్నిప్రమాదం జరిగి అనేక కీలక ఫైళ్లు తగలబడ్డాయని రావు గుర్తు చేశారు.

ఫోన్ ట్యాపింగ్ కేసు విచారణలో  రెండేళ్లు దాటుతున్నా, కాంగ్రెస్ ప్రభుత్వం విచారణ పేరుతో ఈ వ్యవహారాన్ని సాగదీస్తోంది తప్ప, అసలు దోషులను ఇప్పటివరకు పట్టుకోలేదని రామచందర్ రావు విమర్శించారు. దీనివల్ల తెలంగాణ ప్రజల్లో తీవ్రమైన అనుమానాలు కలుగుతున్నాయని చెప్పారు.  ఫోన్ ట్యాపింగ్ కేసును పక్కదారి పట్టించడానికే ఫోరెన్సిక్ ల్యాబ్‌లో అగ్నిప్రమాదం కుట్ర పూరితంగా జరిగిందా? అన్న అనుమానాలు బలపడుతున్నాయని చెప్పారు.

ఈ ఫోన్ ట్యాపింగ్ వ్యవహారంలో అనేక మంది బిజెపి నాయకుల ఫోన్లు ట్యాప్ చేయడమే కాకుండా, పార్టీ రాష్ట్ర నాయకులపై, జాతీయ నాయకులపై కూడా తప్పుడు కేసులు పెట్టే ప్రయత్నం జరిగిందని ఆయన మండిపడ్డారు. ఫోన్ ట్యాపింగ్ కేసుతో కాంగ్రెస్ పార్టీకి నష్టమేమీ లేదన్న భావనతోనే, ఈ అగ్నిప్రమాదాన్ని కుట్రగా నిర్వహించారనే  అనుమానాలు వ్యక్తమవుతున్నాయని తెలిపారు.