అమరావతిలో రెండో దశలో 16,666.57 ఎకరాలభూసేకరణ

రాజధాని అమరావతిలో రెండో దశ కింద 16,666.57 ఎకరాలను రైతుల నుంచి  భూ సమీకరణ చేసేందుకు శుక్రవారం జరిగిన మంత్రివర్గ సమావేశం ఆమోదం తెలిపింది. సమావేశ నిర్ణయాలను సమాచార, పౌరసంబంధాలశాఖ మంత్రి కొలుసు పార్థసారధి మీడియాకు వివరించారు.  రాజధాని ప్రాంత అభివృద్ధి సంస్థ (సిఆర్‌డిఎ) పరిధిలోని వైకుంఠపురం, వడ్డమాను, పెదపరిమి, కార్లపూడి, హరిశ్చంద్రపురం, పెద్ద మద్దూరు, ఎండ్రాయి గ్రామాల్లో ఈ భూములను సమీకరించేందుకు మంత్రిమండలి ఆమోదం తెలిపిందని పార్థసారధి వెల్లడించారు. 

ఇవి కాకుండా ప్రభుత్వ, అసైన్డ్‌, దేవదాయ భూములు సుమారు మరో 3,500 ఎకరాలు ఉంటాయని తెలిపారు. భూ సమీకరణకు అంగీకారం తెలుపుతూ ఈ గ్రామాల్లో గ్రామసభలు తీర్మానం చేశాయని చెప్పారు. రాజధాని అభివృద్ధి కోసం అవసరమైతే మూడో దశలో కూడా భూములను తీసుకుంటామని విలేకరులు అడిగిన ప్రశ్నకు మంత్రి సమాధానం చెప్పారు.

అలాగే పబ్లిక్‌ ప్రైవేట్‌ పార్టనర్‌షిప్‌ (పిపిపి) ఆధ్వర్యాన నిర్మించనున్న ఆస్పత్రుల్లో సిబ్బంది నియామకం ప్రభుత్వం ఆధ్వర్యంలో జరగబోదని, కాంట్రాక్టు పొందిన కంపెనీనే నియమిస్తుందని తెలిపారు. తొలిదశలో పిపిపి కింద నిర్మాణం చేయనున్న ఆదోని, మార్కాపురం, మదనపల్లె, పులివెందుల కళాశాలలకు గతంలో కేటాయించిన భూముల్లో కోత విధించామని చెప్పారు. 

ఆదోని కళాశాలకు గతంలో కేటాయించిన 59.10 ఎకరాలను 49.64 ఎకరాలకు, మదనపల్లెలో 97 ఎకరాలను 52.47 ఎకరాలకు, మార్కాపురంలో 49.99 ఎకరాలను 47.10 ఎకరాలకు, పులివెందులలో 51.51 ఎకరాలను 48.50 ఎకరాలకు తగ్గించామని తెలిపారు. 33 ఏళ్ల రాయితీకాలం తర్వాత అన్ని మౌలిక సదుపాయాలు, ఆస్తులు ప్రభుత్వానికి తిరిగి బదిలీ చేయబడతాయని తెలిపారు. 

ప్రభుత్వ కోటా కింద నీట్‌ అలైన్డ్‌ రిజర్వేషన్‌ కేటగిరీలతో 50 సీట్లు ఉంటాయని, ఇవి పూర్తిగా రాష్ట్రానికి చెందిన విద్యార్థులకే కేటాయిస్తామని చెప్పారు. మిగిలిన సీట్లకు ఎపి ఉన్నత విద్య నియంత్రణ, పర్యవేక్షణ కమిషన్‌ (ఎపిహెచ్‌ఇఆర్‌ఎంసి) ఫీజులను నిర్ణయిస్తుందని తెలిపారు. కళాశాలలకు అనుబంధంగా ఉన్న ఆస్పత్రుల్లో 70 శాతం పడకలు ఉచితంగా ఉంటాయని, 30 శాతం కాంట్రాక్టు పరిధిలో ఉంటాయని వివరించారు. 

రెండేళ్ల పాటు ప్రభుత్వాస్పత్రుల్లోని సిబ్బందిని పిపిపి ఆస్పత్రులకు ఉపయోగించుకోవచ్చునని తెలిపారు. పిపిపి ఆస్పత్రులకు ప్రభుత్వాస్పత్రి పేరుతో పిపిపి భాగస్వామి పేరు కూడా పెట్టుకోవచ్చునని చెప్పారు. ప్రైవేట్‌ ఆయుష్‌ ఆస్పత్రులను క్లినికల్‌ ఎస్టాబ్లిష్‌మెంట్‌ (రిజిస్ట్రేషన్‌ అండ్‌ రెగ్యులేషన్‌) యాక్ట్‌-2010 పరిధిలోకి తెచ్చేందుకు నిర్ణయం తీసుకున్నామని తెలిపారు.