జీహెచ్ఎంసిలో 27 మునిసిపాలిటీలు విలీనం వ్యతిరేకించిన బిజెపి

తెలంగాణలో కాంగ్రెస్ ప్రభుత్వం జీహెచ్ఎంసీ పరిధిని పెంచేందుకు, గ్రేటర్ బయట ఔటర్ రింగ్ రోడ్డుకు లోపల ఉన్న 20 మున్సిపాలిటీలు, 7 మున్సిపల్ కార్పొరేషన్లను జోడించి జీహెచ్ఎంసీలో విలీనం చేసి మహానగరంగా చేయాలని తీసుకున్న నిర్ణయాన్ని భారతీయ జనతా పార్టీ తీవ్రంగా వ్యతిరేకించింది. రేవంత్ రెడ్డి సర్కార్ పాలన కన్నా రియల్ ఎస్టేట్ కార్యకలాపాలపైనే ఎక్కువ దృష్టి పెట్టినట్టుగా కనిపిస్తోందని,  అందుకే హిల్ట్ పాలసీని తీసుకువచ్చి, ఏకంగా 9 వేల ఎకరాలకు పైగా భూములను రియల్ ఎస్టేట్ మాఫియాకు కట్టేబెట్టేందుకు ప్రయత్నిస్తోందని బిజెపి ఆరోపించింది.

కాంగ్రెస్ ప్రభుత్వం రియల్ ఎస్టేట్‌ను కాకుండా “రెడ్ ఎస్టేట్”గా మార్చాలనుకుంటోందని ధ్వజమెత్తింది. మున్సిపాలిటీలు/కార్పొరేషన్లను జిహెచ్ఎంసిలో విలీనం చేసే ముందు ప్రజల అభిప్రాయాలు తీసుకోవాల్సి ఉండగా, అటువంటి ప్రయత్నం చేయకుండా, కనీసం అఖిలపక్ష సమావేశం కూడా అజరపకుండా, కేవలం  రియల్ ఎస్టేట్ మాఫియా ప్రయోజనాల కోసం ఈ నిర్ణయం తీసుకోవడం అర్థరహితం, . ఇది అశాస్త్రీయం అని బిజెపి స్పష్టం చేసింది. దీనివెనుక దురుద్దేశం స్పష్టంగా కనిపిస్తోందని మండిపడింది.

పరిపాలన సౌలభ్యం కోసం వికేంద్రీకరణ అవసరం కాగా రాష్ట్ర ప్రభుత్వం తీసుకుంటున్న ఈ కేంద్రీకరణ నిర్ణయం ప్రజలకు నష్టం చేస్తుందని రాష్ట్ర అధ్యక్షులు ఎన్. రాంచందర్ రావు హెచ్చరించారు. ఏడాది క్రితమే మున్సిపాలిటీ పరిధిలోకి తీసుకొచ్చిన గ్రామీణ ప్రాంతాలను ఇప్పుడు జిహెచ్ఎంసిలో జోడించడం వల్ల ప్రజలకు మరింత నష్టం జరగనుందని ఆదోళన వ్యక్తం చేశారు. 

 జిహెచ్ఎంసిలో విలీనం చేసినట్లయితే, 2 కోట్లకు పైగా జనాభా దీని పరిధిలోకి వస్తుందని పేర్కొంటూ ఇంత పెద్ద జనాభా నిర్వహణకు అవసరమైన సదుపాయాలు లేవని, ప్రజలపై అధిక పన్నులు వేయడం తప్ప ఫలితం ఉండబోదని స్పష్టం చేశారు.  ఇప్పటికే  జిహెచ్ఎంసిలో నిధుల కొరత తీవ్రంగా ఉందని, మున్సిపాలిటీల్లో అభివృద్ధి లేదని, అలాంటప్పుడు విలీనం ఏవిధంగా అభివృద్ధికి దారితీస్తుందని బిజెపి ప్రశ్నించింది.

ప్రస్తుతం మున్సిపాలిటీల్లో అపరిశుభ్రత, రోడ్ల పరిస్థితి అధ్వాన్నం, డ్రైనేజ్ సమస్యలు, చెత్త నిర్వాహణ వైఫల్యం, స్ట్రీట్ లైట్లు, వాటర్ వర్క్స్‌లో నిర్లక్ష్యం- ఇలాంటి పరిస్థితుల్లో మున్సిపాలిటీలు అభివృద్ధి చేయలేకపోతున్నప్పుడు విలీనం వల్ల పరిస్థితి ఎలా మెరుగుపడుతుంది? అని బిజెపి నిలదీసింది.

గతంలో బీఆర్ఎస్ ప్రభుత్వం తుగ్లక్ పనులు చేసినట్లు ఈరోజు కాంగ్రెస్ ప్రభుత్వం కూడా అదే దారిలో నడుస్తోందని, గత ప్రభుత్వం అశాస్త్రీయంగా, అసంబద్ధ విధానాలతో కొత్త రెవెన్యూ డివిజన్లు, కొత్త పురపాలికలు ఏర్పాటు చేసిన తర్వాత ఇప్పుడు కాంగ్రెస్ ప్రభుత్వం పేద ప్రజలకు నష్టం కలిగేలా మరిన్ని నిర్ణయాలు తీసుకుంటోందని విమర్శించారు.