బాలీవుడ్ హీరో రణబీర్ కపూర్ నటించిన ‘రామాయణం: రైజ్ ఆఫ్ ఏ లెజెండ్’ సినిమా వివాదంలో చిక్కుకుంది. ఈ సినిమాలో రామాయణ కథను తప్పుగా చూపించారని, రావణుడిని గొప్ప వ్యక్తిలా కీర్తించారని విశ్వహిందూ పరిషత్ (వీహెచ్పీ) ఆరోపించింది. వెంటనే ఈ సినిమా ప్రదర్శనను నిలిపివేయాలని, చిత్రానికి ఇచ్చిన సెన్సార్ సర్టిఫికెట్ను రద్దు చేయాలని కేంద్ర ప్రభుత్వాన్ని కోరినట్లు సమాచారం. వీహెచ్పీ నేతలు భజరంగ్ లాల్ బాగ్రా, అలోక్ కుమార్ ఈ మేరకు తమ అభ్యంతరాలను వ్యక్తం చేశారు.
రావణుడు గొప్ప పండితుడు, శివభక్తుడు, ఎంతో శక్తిమంతుడైనప్పటికీ చెడు పనులు చేస్తూ ప్రజలను ఇబ్బంది పెట్టడం వల్లే రామాయణంలో విలన్గా మారాడని వారు గుర్తుచేశారు. కానీ సినిమాలో అతడి పాత్రను ఇందుకు భిన్నంగా, గొప్పవాడిలా చూపించారని తప్పుబట్టారు. రామాయణంలో ఎంతో కీలకమైన అహల్య శాప విమోచనం, నిషాదరాజు గుహుడితో శ్రీరాముడి స్నేహం, పడవ నడిపే కేవతుడి భక్తి వంటి సన్నివేశాలను సినిమాలో చూపించలేదని వీహెచ్పీ నేతలు ఆరోపించారు.
శ్రీరాముడు అందరినీ సమానంగా చూస్తాడనే గొప్ప సందేశం ఈ ఘట్టాల ద్వారా తెలుస్తుందని వారు పేర్కొన్నారు. కులం, వర్గం అనే తేడాలు లేకుండా అందరినీ ప్రేమించాలని, గౌరవించాలని శ్రీరాముడు ఆచరించి చూపించారని వారు వివరించారు. అలాంటి ముఖ్యమైన సన్నివేశాలను సినిమాలో పెట్టకపోవడం సరికాదని స్పష్టం చేశారు.
అంతేకాకుండా, ఋషులు, సాధువుల తపస్సులకు ఆటంకం కలిగించే రాక్షసులను అంతం చేసి ధర్మాన్ని కాపాడేందుకు శ్రీరాముడు చేసిన యుద్ధాన్ని కేవలం సీతను ఎత్తుకెళ్లినందుకు రావణుడిపై పగ తీర్చుకునే వ్యక్తిగత గొడవలా చూపించారని విమర్శించారు.
అలోక్ కుమార్ రావణుడి చిత్రీకరణపై అభ్యంతరాలు వ్యక్తం చేస్తూ, “ఈ చిత్రంలో రావణుడిని దళితులు, దోపిడీకి గురైనవారు, అణగారిన వర్గాల విముక్తికర్తగా, వారి సంక్షేమం కోసం పనిచేసే వ్యక్తిగా చూపించారు. ఇది రావణుడిని కీర్తించే ప్రయత్నం” అని పేర్కొన్నారు. రామాయణంలోని కీలక అంశాలను ఈ చిత్రంలో చూపించలేదని కూడా అలోక్ కుమార్ ఆందోళన వ్యక్తం చేశారు.

More Stories
ముసాయిదా ఒప్పందంలో శిలాజ ఇంధనాల ప్రస్తావన లేని కాప్31
బీజేపీలో చేరిన క్రికెటర్ యుజ్వేంద్ర చాహల్
కాశ్మీర్ లోయలో ఇక స్థానిక ఉగ్రవాదులు ఎవరూ లేరు