కావేరీ నదీ జలాల పంపిణీ వివాదంలో తమిళనాడు ప్రభుత్వానికి సుప్రీంకోర్టులో ఎదురుదెబ్బ తగిలింది. కర్ణాటక నుంచి అదనంగా 11 టీఎంసీల నీటిని విడుదల చేయాలని కోరుతూ తమిళనాడు ప్రభుత్వం దాఖలు చేసిన రెండు పిటిషన్లను సుప్రీంకోర్టు శుక్రవారం కొట్టివేసింది. జస్టిస్ విక్రమ్ నాథ్, జస్టిస్ అపరేశ్ కుమార్ సింగ్లతో కూడిన ధర్మాసనం ఈ మేరకు ఉత్తర్వులు జారీ చేసింది.
తమకు రావాల్సిన కావేరీ జలాల్లో కొరత ఏర్పడిందని, ఆ లోటును భర్తీ చేసేందుకు కర్ణాటక ప్రభుత్వం అదనంగా 11 టీఎంసీల నీటిని విడుదల చేసేలా ఆదేశాలు ఇవ్వాలని తమిళనాడు సుప్రీంకోర్టును ఆశ్రయించింది. నీటి కొరత కారణంగా రాష్ట్రంలోని రైతులు, పంటలు ఇబ్బందులు ఎదుర్కొంటున్నాయని తన వాదనల్లో పేర్కొంది. అయితే, కర్ణాటక ప్రభుత్వం ఈ డిమాండ్ను వ్యతిరేకించింది.
కావేరీ పరివాహక ప్రాంతాల్లో వర్షాభావ పరిస్థితులు నెలకొన్నాయని, రాష్ట్రంలోని పలు ప్రాంతాలు కరువు ప్రభావానికి గురయ్యాయని కోర్టుకు వివరించింది. ఇలాంటి పరిస్థితుల్లో అదనపు నీటిని విడుదల చేయడం కష్టమని వాదించింది. ఇరు రాష్ట్రాల వాదనలు పరిశీలించిన ధర్మాసనం తమిళనాడు దాఖలు చేసిన రెండు పిటిషన్లను కొట్టివేసింది.
కేసుకు సంబంధించి అదనపు పత్రాలను రికార్డుల్లో చేర్చాలని తమిళనాడు చేసిన మరో అభ్యర్థనను కూడా కోర్టు అనుమతించలేదు. దీంతో కావేరీ జలాల పంపిణీ విషయంలో తమిళనాడు ప్రభుత్వం కోరిన అదనపు 11 టీఎంసీల నీటి విడుదలకు సుప్రీంకోర్టు నుంచి అనుకూల ఆదేశాలు లభించలేదు. రెండు రాష్ట్రాల మధ్య కొనసాగుతున్న కావేరీ జలాల వివాదంలో ఈ పరిణామం ప్రాధాన్యం సంతరించుకుంది.
మరోవైపు, ఈ విషయంపై కర్ణాటక ఉపముఖ్యమంత్రి డీకే శివకుమార్ స్పందిస్తూ రాష్ట్రంలో తగినంత నీరు అందుబాటులో ఉంటే తమిళనాడుకు కావేరి జలాలను అందిస్తామని స్పష్టం చేశారు. రాష్ట్రంలో నీటి లభ్యత పరిస్థితి అందరికీ తెలిసిందేనని చెబుతూ కావేరి నదికి కృతజ్ఞతా పూర్వకంగా సమర్పించే సంప్రదాయ ‘బాగిన’ను తాను ఈసారి విడుదల చేయలేకపోయానని పేర్కొన్నారు. అంతకుముందు, కావేరి సమస్యపై చట్టపరమైన పరిధిలో విజయం సాధించిందని, కర్ణాటక, తమిళనాడు రెండింటికీ న్యాయం జరిగిందని, దానిని ఇప్పుడు అమలు చేయాల్సి ఉందని డీకే శివకుమార్ తెలిపారు.
కాగా, తమిళనాడుకు 15 రోజుల పాటు రోజూ 3500 క్యూసెక్కుల నీటిని విడుదల చేయాలని కావేరీ నదీజలాల నిర్వహణ అథారిటీ జులై 28న కర్ణాటక ప్రభుత్వాన్ని ఆదేశించింది. కావేరీ బేసిన్లోని నీటి లభ్యత, వర్షపాత పరిస్థితులను సమీక్షించిన తర్వాత ఆ ఆదేశాలు జారీ చేసింది. మరోవైపు కర్ణాటకలోని పలు ప్రాంతాల్లో తీవ్రమైన కరవు పరిస్థితులు నెలకొనడంతో తమిళనాడుకు కావేరీ జలాల విడుదలను వ్యతిరేకిస్తూ అక్కడి రైతులు, కన్నడ సంఘాలు నిరసనలు చేపట్టాయి.

More Stories
కాలుష్య సర్టిఫికెట్ రెన్యువల్పై వెసులుబాటు
మధుమేహం ఉన్నవారికి 21 రకాల క్యాన్సర్ల ప్రమాదం
సీజేఐపై వ్యాఖ్యలు చేసిన న్యాయవాదికి `సుప్రీం’ ధిక్కార నోటీసులు