సెంట్రల్ విస్టా ప్రాజెక్టు కోసం కదిమి మసీదు తొలగించాల్సిందే

రేస్ కోర్సులోని మసీదుకు సంబంధించి ప్రభుత్వం తీసుకున్న చర్యల నేపథ్యంలో, సెంట్రల్ విస్టా పునరాభివృద్ధి ప్రాజెక్టులో భాగంగా మధ్య డిల్లీలోని కృషి భవన్ ప్రాంగణంలో ఉన్న ‘కదిమీ మసీదు’ను తొలగించాలని కేంద్ర ప్రభుత్వం ఢిల్లీ హైకోర్టుకు తెలియజేసింది. భూమి, అభివృద్ధి కార్యాలయం ద్వారా హైకోర్టుకు సమర్పించిన నివేదికలో, ‘కామన్ సెంట్రల్ సెక్రటేరియట్ భవనాలు 4, 5’ నిర్మాణానికి అవసరమైన ప్రభుత్వ భూమిలో ఈ మసీదు ఉందని కేంద్రం పేర్కొంది.

ఈ మసీదు ప్రస్తుతం ప్రాజెక్టు స్థలంలోనే ఉందని, పనులు పూర్తి కావాలంటే దీనిని తొలగించడం తప్పనిసరి అని తెలిపింది. కోర్టుకు సమర్పించిన సమాధానంలో, కార్యాలయ సముదాయం మధ్యలో ఈ నిర్మాణాన్ని ఉంచడం “అనుమతించదగినది కాదు, ప్రభుత్వ ఆస్తి లౌకిక స్వభావానికి విరుద్ధం” అని కేంద్రం పేర్కొంది. కదిమీ మసీదు నిర్వహణ కమిటీ దాఖలు చేసిన పిటిషన్‌కు ప్రతిస్పందనగా ఈ నివేదికను సమర్పించారు.

డాక్టర్ రాజేంద్ర ప్రసాద్ రోడ్డులోని ప్లాట్ నంబర్ 120లో ఈ మసీదు ఉందని, ఈ భూమి భారత ప్రభుత్వ పరిపాలనా నియంత్రణలో ఉందని కేంద్రం స్పష్టం చేసింది. అంతేకాకుండా, మసీదు నిర్వహణ కమిటీకి ఈ భూమిపై యాజమాన్య హక్కులు ఉన్నాయనే వాదనను కేంద్రం తోసిపుచ్చింది. 1940 నాటి ఒప్పందం ప్రకారం ఈ స్థలాన్ని ఉపయోగించుకోవడానికి కమిటీకి అనుమతి ఇచ్చారని, అయితే ఆ ఒప్పందం ద్వారా వారికి భూమిపై ఎటువంటి యాజమాన్య హక్కులు లభించలేదని పేర్కొంది.

సెంట్రల్ విస్టా పునరాభివృద్ధి ప్రణాళికలో భాగంగా, ప్రస్తుతం ఉన్న శాస్త్రి భవన్, కృషి భవన్ స్థానంలో కొత్త ‘కామన్ సెంట్రల్ సెక్రటేరియట్’ భవనాలను నిర్మించేందుకు కేంద్రం సిద్ధమవుతున్న తరుణంలో ఈ అంశం తెరపైకి వచ్చింది. ఈ ప్రాజెక్టును ప్రభుత్వం “అత్యంత జాతీయ ప్రాముఖ్యత కలిగిన ప్రజా ప్రాజెక్టు”గా అభివర్ణించింది. సెంట్రల్ పబ్లిక్ వర్క్స్ డిపార్ట్‌మెంట్ గతంలోనే, ప్రస్తుతం ఉన్న రెండు భవనాలను సెప్టెంబర్ 30లోపు ఖాళీ చేయాలని ఆదేశించింది.

సెప్టెంబర్ 16న జారీ చేసిన లేఖలో, డాక్టర్ రాజేంద్ర ప్రసాద్ రోడ్డులోని ప్లాట్ నంబర్ 120లో—ప్రస్తుతం శాస్త్రి భవన్, కృషి భవన్ ఉన్న చోట—’కర్తవ్య భవన్ 4′, ‘కర్తవ్య భవన్ 5’ నిర్మాణ పనులను అప్పగించినట్లు పేర్కొంది. ప్రభుత్వం తాజాగా సమర్పించిన ఈ వివరాలతో, పునరాభివృద్ధికి ప్రతిపాదించిన స్థలంలో కదిమీ మసీదు కొనసాగుతుందా లేదా అన్న అంశం ఇప్పుడు కోర్టు విచారణలో కీలకాంశంగా మారింది.

కొత్త సచివాలయ భవనాల కోసం ఈ భూమి అవసరమని, మసీదు వినియోగానికి సంబంధించి 1940లో కుదిరిన ఒప్పందం, ఆ స్థలంపై యాజమాన్య హక్కులను మసీదు నిర్వహణ కమిటీకి కల్పించదని అది పేర్కొంది.