శక్తివంతమైన ఆసియా మహిళల్లో 8వ స్థానంలో రోష్ని నాదర్ మల్హోత్రా

ఆసియాలోని అత్యంత శక్తివంతమైన మహిళల ఫార్చ్యూన్ 2026 ర్యాంకింగ్‌లో రోష్ని నాదర్ మల్హోత్రా ఎనిమిదో స్థానాన్ని దక్కించుకున్నారు. ఈ జాబితాలో అత్యున్నత ర్యాంకు పొందిన భారతీయ నాయకురాలిగా ఆమె నిలిచారు. ఈ వార్షిక జాబితా ఆసియా-పసిఫిక్ ప్రాంతంలోని 14 మార్కెట్లలోని 100 మంది ప్రభావవంతమైన మహిళా నాయకులను హైలైట్ చేస్తుంది.

మల్హోత్రా భారతదేశానికి చెందిన బహుళజాతి ఐటీ సేవల, కన్సల్టింగ్ సంస్థ హెచ్‌సిఎల్‌టెక్ కు చైర్‌పర్సన్‌గా ఉన్నారు. ఫోర్బ్స్ ప్రకారం, ఆమె వామా సుందరి ఇన్వెస్ట్‌మెంట్స్‌కు కూడా చైర్‌గా ఉన్నారు. ఈ జాబితాలో డీబీఎస్ గ్రూప్ సీఈఓ టాన్ సు షాన్ అగ్రస్థానాన్ని కైవసం చేసుకోగా, చైనా ఎలక్ట్రానిక్స్ తయారీ సంస్థ లక్స్‌షేర్ సహ వ్యవస్థాపకురాలు గ్రేస్ వాంగ్ రెండో స్థానంలో ఉన్నారు.

మల్హోత్రా హెచ్‌సిఎల్ గ్రూప్ వ్యవస్థాపకుడు శివ్ నాడార్ కుమార్తె. ఆమె జూలై 2020లో తన తండ్రి తర్వాత హెచ్‌సిఎల్‌టెక్ ఛైర్‌పర్సన్‌గా బాధ్యతలు స్వీకరించి, లిస్టెడ్ ఇండియన్ ఐటీ కంపెనీకి నాయకత్వం వహించిన తొలి మహిళగా నిలిచారు. మల్హోత్రా 2025లో ఏడవ స్థానంలో ఉన్నారు. ఫార్చ్యూన్ ప్రపంచ శక్తివంతమైన మహిళల జాబితాలో కూడా ప్రముఖ స్థానాన్ని కలిగి ఉన్నారు.

ఫిబ్రవరిలో, భారతదేశంలోని ఉత్తరప్రదేశ్‌లో ఫాక్స్‌కాన్‌తో ఆమె గ్రూప్ జాయింట్ వెంచర్ 440 మిలియన్ డాలర్ల చిప్-ప్యాకేజింగ్ ప్లాంట్‌కు శంకుస్థాపన చేసిందని ఆ పత్రిక పేర్కొంది. “ఆమె కంపెనీని ఇతర విధాలుగా కూడా మారుస్తున్నారు: దాని బోర్డులో ఇప్పుడు 50% మహిళలు ఉన్నారు. ఇది ఏ ప్రధాన గ్లోబల్ టెక్నాలజీ కంపెనీలోనైనా అత్యధిక వాటాలలో ఒకటి,” అని అది పేర్కొంది.

హెచ్‌సిఎల్‌ లో చేరడానికి ముందు, ఆమె న్యూస్ ప్రొడ్యూసర్‌గా పనిచేశారు. కెల్లాగ్ స్కూల్ ఆఫ్ మేనేజ్‌మెంట్ నుండి తన ఎంబిఎను పూర్తి చేశారు. 2026 హురున్ ఇండియా రిచ్ లిస్ట్ ప్రకారం, ఆమె భారతదేశంలోనే అత్యంత ధనవంతురాలైన మహిళగా కొనసాగుతున్నారు. ఫోర్బ్స్ ప్రకారం, ఆమె విద్యా నేపథ్యం విషయానికి వస్తే, నార్త్‌వెస్టర్న్ యూనివర్సిటీలో కమ్యూనికేషన్స్ చదివి, ఆ తర్వాత కెల్లాగ్ స్కూల్ ఆఫ్ మేనేజ్‌మెంట్ నుండి ఎంబీఏ పూర్తి చేశారు.

తన కార్పొరేట్ పాత్రకు అతీతంగా, ఆమె దాతృత్వం, పరిరక్షణలో చురుకుగా పాల్గొంటారు. ఆమె శివ్ నాడార్ ఫౌండేషన్‌కు ట్రస్టీగా పనిచేస్తున్నారు. సహజ ఆవాసాలు, వన్యప్రాణులను రక్షించడంపై దృష్టి సారించిన ‘ది హ్యాబిటాట్స్ ట్రస్ట్’ అనే సంస్థను స్థాపించారు.