స్వచ్ఛ భారత్ అంతరాత్మకు సంబంధించిన అంశం

స్వచ్ఛ భారత్ అనేది కేవలం ఒక రోజు కార్యక్రమం కాదని, అది మన అంతరాత్మకు సంబంధించిన విషయమని ఆంధ్ర ప్రదేశ్ బీజేపీ ఇంచార్జ్  డా. అరవింద్ భదౌరియా స్పష్టం చేశారు. విజయవాడలోని పాయకరావుపేట రైతు బజార్ వద్ద స్వచ్ఛ బిజెపి ఆధ్వర్యంలో జరిగిన భారత్ అభియాన్, గాంధీ, శాస్త్రి జయంతి వేడుకలలో పాల్గొంటూ ఒక వ్యక్తి పరిశుభ్రంగా ఉంటే కుటుంబం, కుటుంబం ద్వారా సమాజం, సమాజం ద్వారా దేశం మొత్తం (గ్రామాలు, నగరాలు) పరిశుభ్రంగా మారుతాయని తెలిపారు.

ప్రధాని మోదీ కుంభమేళాలో పారిశుద్ధ్య కార్మికుల కాళ్లు కడిగి వారికి దేశంలో ఎవరూ ఇవ్వని అత్యున్నత గౌరవం ఇచ్చారని ఆయన గుర్తుచేశారు. నిరంతరం పరిశుభ్రత కోసం పాటుపడుతున్న సోదరీమణులకు కృతజ్ఞతలు తెలుపుతూ, ఈ ఉద్యమాన్ని ఇదే స్ఫూర్తితో ముందుకు తీసుకెళ్లాలని పిలుపునిచ్చారు. 70 నుంచి 80 శాతం అనారోగ్యాలకు అపరిశుభ్రతే ప్రధాన కారణమని ఆయన  పేర్కొన్నారు.

పట్టణ ప్రాంతాల్లోని చిన్న చిన్న కాలనీ పార్కులను చెత్త డంపింగ్ యార్డులుగా మార్చడం పట్ల తీవ్ర ఆందోళన వ్యక్తం చేశారు. స్థానిక పార్కులను డంపింగ్ గ్రౌండ్‌లుగా దుర్వినియోగం చేయకుండా పౌరులు అప్రమత్తంగా ఉండి, అడ్డుకోవాలని గట్టిగా కోరారు.  శుభ్రపరిచిన పార్కును సమాజం కోసం ఒక ఆహ్లాదకరమైన ప్రదేశంగా ఉంచాలని ప్రజలకు, సంబంధిత ప్రభుత్వ అధికారులకు నాయకులు విజ్ఞప్తి చేశారు.  ఈ కార్యక్రమంలో బిజెపి నాయకులు పారిశుధ్య కార్మికులకు పూలతో శాలువాలతో సత్కరించి,నూతన వస్త్రాలను అందించారు.