1,000 రోజుల్లో రేవంత్ రెడ్డి 1,000 అబద్ధాలు

రేవంత్ రెడ్డి ప్రభుత్వం అధికారంలోకి వచ్చి 1,000 రోజులు పూర్తయిందని చెప్పుకుంటూ, దాన్ని “1,000 రోజుల ప్రజా పాలన” పేరుతో ఘనంగా ప్రచారం చేసుకుంటోంది. కానీ క్షేత్రస్థాయిలో తెలంగాణ పరిస్థితులను గమనిస్తే, ఈ 1,000 రోజుల పాలన ప్రజలకు ఏమి ఇచ్చిందో పరిశీలిస్తే నేడు తెలంగాణ అత్యంత ఆందోళనకరమైన, దయనీయమైన స్థితిలో కొట్టుమిట్టాడుతున్నట్లు స్పష్టంగా అర్థమవుతుంది.

ఈ సందర్భంగా నేను ప్రభుత్వాన్ని నేరుగా అడుగుతున్నాను: అధికారంలోకి రాకముందు కాంగ్రెస్ పార్టీ ప్రజలకు ఇచ్చిన అనేక వాగ్దానాలు, గ్యారెంటీలలో ఇప్పటివరకు అమలైనవి ఎన్ని? నెరవేర్చిన హామీలు ఏవి?

రైతులకు తీరని అన్యాయం

* అధికారంలోకి రాకముందు రైతులకు అనేక భారీ హామీలు ఇచ్చారు. రుణమాఫీ పూర్తి చేయడానికి సుమారు రూ. 40,000 కోట్లు అవసరం కాగా, కేవలం రూ. 18,000 కోట్లు మాత్రమే మాఫీ చేసి చేతులు దులుపుకున్నారు.
* ‘రైతు భరోసా’ కింద ఎకరానికి రూ. 15,000 ఇస్తామని చెప్పి, గద్దెనెక్కాక దాన్ని రూ. 12,000 కు తగ్గించారు. ఆ మొత్తాన్ని కూడా సకాలంలో, పూర్తిగా ఇవ్వడం లేదు; ఇంకా భారీగా బకాయిలు పెండింగ్‌లోనే ఉన్నాయి.
* కౌలు రైతులకు కూడా రైతు భరోసా అందిస్తామని హామీ ఇచ్చారు. కానీ నేడు కౌలు రైతులు తీవ్ర ఇబ్బందుల్లో ఉన్నారు. రైతుల ఆత్మహత్యలు, కష్టాల్లో ఎక్కువ శాతం కౌలు రైతులవే ఉంటున్నాయి.
* ధాన్యానికి ఇస్తామన్న రూ. 500 బోనస్ హామీ అమలు కూడా ప్రశ్నార్థకంగానే మిగిలిపోయింది.

నిరుద్యోగ యువతకు ద్రోహం

* ప్రభుత్వం ఏర్పడిన మొదటి 100 రోజుల్లోనే యువతకు, విద్యార్థులకు భారీగా ఉద్యోగావకాశాలు కల్పిస్తామని హామీ ఇచ్చారు.
* కానీ ప్రభుత్వం స్వయంగా విడుదల చేసిన లెక్కల ప్రకారమే ఇప్పటివరకు కేవలం 16,000 ఉద్యోగాలు మాత్రమే ఇచ్చారు. 100 రోజుల్లో లక్షలాది మందికి ఉద్యోగాలిస్తామన్న హామీ ఏమైంది?

మహిళా సంక్షేమ హామీల గతి ఏది? 

* యువతులకు స్కూటర్లు, మహిళలకు నెలకు రూ. 2,500 ఆర్థిక సాయం, పెళ్లిళ్లకు బంగారం ఇస్తామని ఎన్నికల వేళ ప్రగల్భాలు పలికారు.
* అవి ఏవో సాధారణ ప్రకటనలు కావు, ప్రజలకు లిఖితపూర్వకంగా ఇచ్చిన హామీలు. ఆ హామీలు ఏమయ్యాయో, అందులో ఎన్నెన్ని నెరవేర్చారో ప్రభుత్వం సమాధానం చెప్పాలి.

ఉద్యోగులు, పెన్షనర్ల వేదన

* విద్యార్థులు, రైతుల కోసం ఎంతో చేశామని చెప్పుకుంటున్న ఈ ప్రభుత్వం.. రిటైర్డ్ ఉద్యోగులకు రావాల్సిన పెన్షన్లు, ప్రయోజనాల కోసం వారిని రోడ్లపై ఎందుకు నిలబెడుతోంది? పెన్షన్ డబ్బులు రాక ఎన్నో కుటుంబాలు తీవ్ర ఆర్థిక ఇబ్బందులను ఎదుర్కొంటున్నాయి.
* ప్రభుత్వ ఉద్యోగులకు సకాలంలో జీతాలు అందడం లేదు. వారి ఈఎంఐలు, కుటుంబ ఖర్చులు ఎలా గడవాలి? జీతాలు అడిగితే ‘ఖజానాలో నిధులు లేవు’ అని చెప్పడమేనా మీ 1,000 రోజుల ప్రజా పాలన?
* ఉద్యోగులు ఆశగా ఎదురుచూస్తున్న పీఆర్సీ అమలు ఏమైంది?

డిక్లరేషన్ల పేరుతో మోసం

* బీసీ సంక్షేమం అన్నారు, ఎస్సీ డిక్లరేషన్ అన్నారు, రైతు డిక్లరేషన్ అన్నారు.. సమాజంలోని అన్ని వర్గాలకు కొండంత ఆశలు చూపించారు. ఆ డిక్లరేషన్లు, కమిట్‌మెంట్లు ఇప్పుడు ఎక్కడికి పోయాయి?
* ఈ 1,000 రోజుల్లో ప్రజలకు మీరు చెప్పింది 1,000 అబద్ధాలు మాత్రమే. ఇది ‘ప్రజా పాలన’ కాదు, ముమ్మాటికీ *’ప్రజా వంచన పాలన’*.

హైదరాబాద్ ప్రజలపై కొత్త భారాలు & ఆందోళనలు 

* హైదరాబాద్ ప్రజలను భయాందోళనలకు గురిచేయడానికి ముందుగా హైడ్రా  తీసుకొచ్చారు.
* పరిశ్రమలు, ఉపాధి, పెట్టుబడులపై అనిశ్చితి సృష్టిస్తూ హిల్ట్ తెచ్చారు.
* ఇప్పుడు నగర పౌరులపై కొత్త పన్నులు, రుసుముల భారం మోపేందుకు *క్యూర్ తీసుకువస్తున్నారు.
* ప్రజలను భయపెట్టడానికి హైడ్రా, అస్థిరపరచడానికి హిల్ట్, వసూలు చేసుకోవడానికి క్యూర్ — ఇదేనా మీ పాలనా విధానం?
* హైదరాబాద్ పరిసరాల్లో ఎకరం భూమి రూ. 250 కోట్లు పలుకుతోందని గొప్పలు చెప్పుకుంటున్నారు. ఎకరం రూ. 250 కోట్లు అయినా, గజం రూ. 250 అయినా రోజూ కష్టపడి బతికే పేదవాడికి ఏం ఉపయోగం?
* పేదలకు పంపిణీ చేసే రేషన్ బియ్యంలో సింహభాగం కేంద్రంలోని నరేంద్ర మోదీ ప్రభుత్వమే ఇస్తుంది. ఆ వాస్తవాన్ని ప్రజలకు ఎందుకు చెప్పడం లేదు?
* హైదరాబాద్‌లోని పేద, మధ్యతరగతి ప్రజలు ’22ఏ’ సమస్యలతో తీవ్ర ఇబ్బందులు పడుతున్నారు. జీవితకాల కష్టార్జితంతో కొనుక్కున్న ఇళ్లు, స్థలాలపై అనిశ్చితి నెలకొంది.

ఫీజు రీయింబర్స్‌మెంట్ సంక్షోభం – విద్యారంగం నిర్లక్ష్యం 

* సుమారు 40 లక్షల మంది విద్యార్థులకు సంబంధించిన రూ. 15,000 కోట్ల ఫీజు రీయింబర్స్‌మెంట్ బకాయిలు పెండింగ్‌లో ఉన్నాయి.
* బకాయిలు రాక కాలేజీలు నడవక, సర్టిఫికెట్లు అందక విద్యార్థుల భవిష్యత్తు అగమ్యగోచరంగా మారింది. రాజకీయ ప్రాధాన్యతలకు నిధులు కేటాయించే ప్రభుత్వానికి, లక్షలాది మంది విద్యార్థుల భవిష్యత్తు కోసం పైసలు విడుదల చేయడానికి మనసొప్పడం లేదా?
* గురుకుల పాఠశాలల్లో విద్యార్థులకు సరైన పౌష్టికాహారం అందడం లేదు. ప్రభుత్వ పాఠశాలల భవనాలు శిథిలావస్థకు చేరాయి.

కుదేలైన శాంతిభద్రతలు – మహిళలకు రక్షణ కరవు 

* రాష్ట్రంలో మహిళలకు రక్షణ లేకుండా పోయింది. నిన్ననే ఒక గిరిజన (ఎస్టీ) బాలికపై అత్యాచారం, హత్య జరిగింది.
* చట్టాలు చేయాల్సిన, శాసనమండలిలో ప్రజల గొంతుక కావాల్సిన ఒక ఎమ్మెల్సీ — కాంగ్రెస్, బీఆర్‌ఎస్ కలిసి మద్దతిచ్చి గెలిపించిన వ్యక్తి — మైనర్ బాలికపై దాడికి తెగబడ్డాడు.
* రాష్ట్రంలో అసలు శాంతిభద్రతలు ఉన్నాయా? రక్షణ ఎక్కడుంది?
* చివరికి ఒక జాతీయ పార్టీ కార్యాలయానికి, నేతలకు కూడా భద్రత లేదు. నల్గొండ జిల్లా అధ్యక్షుడి ఇంటిపై దాడి చేసి, ఆయన తల్లిపై కూడా చేయి చేసుకున్నారు. ఇదేనా మీ రాజకీయ సంస్కృతి?

ఎమర్జెన్సీని తలపిస్తున్న నిర్బంధాలు 

* ప్రశ్నించే వారిపై అక్రమ కేసులు బనాయిస్తున్నారు. నేడు తెలంగాణలో పరిస్థితులు నాటి ఎమర్జెన్సీ కన్నా భయానకంగా ఉన్నాయి.
* మహబూబ్‌నగర్‌లో కాలేజీ విద్యార్థులపై లాఠీచార్జ్ చేశారు. పాలిటెక్నిక్ విద్యార్థులను అడ్డుకున్నారు. ప్రతిపక్ష నాయకులను, బీజేపీ రాష్ట్ర అధ్యక్షుడిని సైతం హౌస్ అరెస్టులు చేస్తున్నారు.
* దావోస్ సదస్సులకు ఎన్నిసార్లు వెళ్లారు? ఎన్ని ఒప్పందాలు చేసుకున్నారు? అందులో రాష్ట్రానికి వచ్చిన నిజమైన పెట్టుబడులు, తెచ్చిన పరిశ్రమలు, ఇచ్చిన ఉద్యోగాలు ఎన్ని?

బీఆర్‌ఎస్ – కాంగ్రెస్: ఒకే నాణేనికి రెండు ముఖాలు 

* బీఆర్‌ఎస్, కాంగ్రెస్ రెండూ ఒకే నాణేనికి ఉన్న రెండు ముఖాలు. గత ప్రభుత్వం చేసిన తప్పులనే వీరు మరో రూపంలో కొనసాగిస్తున్నారు.
* వారు ‘ధరణి’తో సమస్యలు సృష్టిస్తే, వీరు భూ సమస్యలతో కొత్త వివాదాలు తెచ్చారు. వారు రీటైల్‌గా దోచుకుంటే, వీరు హోల్‌సేల్‌గా దోచుకుంటున్నారు.
* కాంగ్రెస్ తెస్తామన్న మార్పు ఎక్కడుంది? ఎవరి జీవితాల్లో మార్పు వచ్చింది?

ప్రజా పోరాటమే బీజేపీ మార్గం