29 నుండి ఉజ్బెకిస్తాన్, కిర్గిస్తాన్‌లలో ప్రధాని మోదీ పర్యటన

ప్రధాని నరేంద్ర మోదీ ఆగష్టు 29 నుంచి సెప్టెంబర్ 1 వరకు ఉజ్బెకిస్తాన్, కిర్గిస్తాన్‌లలో పర్యటించనున్నారు. ఈ సందర్భంగా   కిర్గిస్తాన్‌లో బిష్కెక్‌ లో జరిగే 26వ షాంఘై సహకార సంస్థ (ఎస్‌సీవో) శిఖరాగ్ర సమావేశంలో పాల్గొంటారు. సెంట్రల్ ఆసియా దేశాలైన ఉజ్బెకిస్తాన్, కిర్గిస్తాన్‌లతో ద్వైపాక్షిక, వ్యాపార, వాణిజ్య బంధాలను బలోపేతం చేసేందుకు ఈ పర్యటన ఉపయోగపడనుంది. 

ఎస్‌సీవో సదస్సు సందర్భంగా రష్యా అధ్యక్షుడు వ్లాదిమిర్ పుతిన్‌తో మోదీ భేటీ అవుతారు. ఉజ్బెకిస్తాన్ అధ్యక్షుడు షావ్కత్ మిర్జియోయెవ్ ఆహ్వానం మేరకు మోదీ ఉజ్బెకిస్తాన్‌ వెళ్తున్నారు. ఆగష్టు 29, 30 తేదీల్లో ఉజ్బెకిస్తాన్ రాజధాని తాష్కెంట్‌లో పర్యటిస్తారు. అక్కడ ఆ దేశ అధ్యక్షుడితో చర్చలు జరుపుతారు.  పెట్టుబడులు, రక్షణ, డిజిటల్ కనెక్టివిటీ, ఎనర్జీ, ఎడ్యుకేషన్ వంటి అంశాలపై చర్చలు జరుపుతారు. అనంతరం రెండు దేశాల మధ్య కీలక ఒప్పందాలు కుదుర్చుకుంటారు.

అలాగే, తాష్కెంట్‌లో ఉన్న శాస్త్రి మెమోరియల్, మహాత్మా గాంధీ సెంటర్‌లను కూడా మోదీ సందర్శిస్తారు. ప్రధాని హోదాలో మోదీ ఉజ్బెకిస్తాన్ వెళ్లడం ఇది నాలుగోసారి. రెండు దేశాలు సంబంధాలు మరింత బలోపేతం చేసుకుంటున్నాయని భారత విదేశీ మంత్రిత్వ శాఖ తెలిపింది. మోదీ ఉజ్బెకిస్తాన్ పర్యటన అనంతరం అక్కడినుంచి బయల్దేరి కిర్గిస్తాన్ వెళ్తారు. ఆగష్టు 31, సెప్టెంబర్ 1న ఆ దేశ రాజధాని బిష్కెక్‌లో పర్యటిస్తారు. అక్కడే ఎస్‌సీవో సదస్సు జరగనుంది.

అలాగే, అక్కడ కిర్గిస్తాన్ అధ్యక్షుడు సడైర్ ఝాపారోవ్‌తో ద్వైపాక్షిక చర్చలు జరుపుతారు. విదేశాంగ మంత్రిత్వ శాఖ ప్రకారం, ఈ శిఖరాగ్ర సమావేశం షాంఘై సహకార సంస్థ 25వ వార్షికోత్సవాన్ని సూచిస్తుంది. ఇందులో భారతదేశం 2017 నుండి పూర్తి స్థాయి సభ్యదేశంగా ఉంది. ఈ శిఖరాగ్ర సమావేశంలో ప్రధాని మోదీ ప్రసంగిస్తూ, ఈ వేదికపై భద్రత, అనుసంధానం మరియు అవకాశం అనే భారతదేశ ప్రాధాన్యతలను ప్రముఖంగా ప్రస్తావిస్తారు. 

కిర్గిజ్‌స్థాన్‌లో తన పర్యటన సందర్భంగా, ప్రధాని మోదీ 6వ ప్రపంచ నోమాడ్ గేమ్స్ ప్రారంభోత్సవానికి కూడా హాజరవుతారు. ఈ కార్యక్రమం మధ్య ఆసియా యొక్క గొప్ప సాంస్కృతిక వారసత్వం మరియు సంప్రదాయాలను ప్రదర్శించడంతో పాటు, సాంస్కృతిక, ప్రజల మధ్య సంబంధాల కోసం ఒక అదనపు వేదికను అందిస్తుంది.