త్వరలో ఎన్నికలు జరగనున్న పంజాబ్లో బీజేపీ రాజకీయ ప్రచారానికి నాయకత్వం వహిస్తున్న హర్యానా ముఖ్యమంత్రి నాయబ్ సింగ్ సైనీ, ఆ రాష్ట్రంలో శిరోమణి అకాలీ దళ్ (ఎస్ఏడి)తో పొత్తు పెట్టుకునే అవకాశాన్ని తోసిపుచ్చారు. మీడియా అడిగిన ప్రశ్నలకు సమాధానమిస్తూ, “బీజేపీకి పంజాబ్ ప్రజలతోనే పొత్తు ఉంది” అని స్పష్టం చేస్తూ పంజాబ్లో తదుపరి ప్రభుత్వాన్ని బీజేపీయే ఏర్పాటు చేస్తుందని కూడా ఆయన ధీమా వ్యక్తం చేశారు.
శుక్రవారం నాడు ఎస్ఏడి అధ్యక్షుడు సుఖ్బీర్ సింగ్ బాదల్ ప్రధాని నరేంద్ర మోదీని కలవడంపై స్పందిస్తూ, ప్రధాని మోదీ భారతదేశంలోని 140 కోట్ల మంది ప్రజలకు ప్రాతినిధ్యం వహిస్తారని, ఆయన ఎవరినైనా కలవవచ్చని హర్యానా ముఖ్యమంత్రి పేర్కొన్నారు. ఈ భేటీ పొత్తుకు సంబంధించిన ఊహాగానాలకు దారితీయడం పట్ల ఆశ్చర్యం వ్యక్తం చేసిన సైనీ, “ఎట్టకేలకు సమయం దొరికింది” అంటూ కొందరు దీనిని సంబరంగా భావించడంపై వ్యాఖ్యానించారు.
సైనీ పొత్తు అవకాశాన్ని కొట్టిపారేసినప్పటికీ, పంజాబ్ అసెంబ్లీ ఎన్నికలకు కొద్ది నెలల సమయం మాత్రమే ఉన్న తరుణంలో బాదల్-మోదీ భేటీ ప్రాధాన్యత సంతరించుకుంది. ఎస్ఏడి, బీజేపీ రెండు దశాబ్దాలకు పైగా మిత్రపక్షాలుగా ఉండి, 1997-2002, 2007-2012, 2012-2017 కాలాల్లో మూడు పర్యాయాలు పంజాబ్లో సంయుక్తంగా ప్రభుత్వాన్ని నడిపాయి.
కేంద్రం తీసుకొచ్చిన మూడు వ్యవసాయ చట్టాలపై విభేదాల కారణంగా వీరి 23 ఏళ్ల పొత్తు సెప్టెంబర్ 2020లో అధికారికంగా ముగిసింది. రైతుల ఆందోళన సమయంలో ఈ రెండు పార్టీల మధ్య సంబంధాలు దెబ్బతిన్నాయి. మొదట్లో వ్యవసాయ చట్టాలకు మద్దతు ఇచ్చిన ఎస్ఏడి, ఆ తర్వాత వాటిని వ్యతిరేకించి, చట్టాలను రద్దు చేయాలని డిమాండ్ చేసింది.
ఆ తర్వాత అకాలీ దళ్ ఎన్డీయే నుండి బయటకు వచ్చింది. 2022 పంజాబ్ అసెంబ్లీ ఎన్నికల్లో రెండు పార్టీలు విడివిడిగా పోటీ చేసి, భారీ ఓటమిని చవిచూశాయి. ఇదే సమయంలో, సైనీ సోమవారం నాడు ఆప్ ప్రభుత్వంపై కూడా విమర్శలు గుప్పించారు. అవినీతి విషయంలో భగవంత్ మాన్ నేతృత్వంలోని ప్రభుత్వం కాంగ్రెస్ను కూడా మించిపోయిందని ఆయన ఆరోపించారు.
అలాగే ‘మావాన్ ధియాన్’ (తల్లులు-కూతుళ్లు) పథకంపై కూడా ఆయన విమర్శలు చేశారు. ఒకవైపు ఎన్నికల సమయం దగ్గరపడుతుండగా పంజాబ్ ప్రభుత్వం మహిళలకు నగదు పంపిణీ చేస్తుంటే, మరోవైపు అదే మహిళలకు అందాల్సిన వితంతు పింఛన్ల వంటి ప్రయోజనాలను నిలిపివేసిందని ఆయన ఎత్తిచూపారు.
More Stories
`జంతర్ మందిర్ వద్ద కాల్పులు’ ఆరోపణలను కొట్టిపారేసిన నడ్డా
విద్యార్థుల నిరసన అంశంపై చర్చకు అమిత్ షా సిద్ధం
జార్ఖండ్ అసెంబ్లీ ముట్టడికై యత్నం.. విద్యార్థులపై లాఠీఛార్జ్, వాటర్ కెనాన్లు