రష్యా చమురు లేదా సహజ వాయువును ప్రపంచంలోని ఐదు ప్రధాన కొనుగోలుదారులైన భారత్, చైనాలతో సహా ఇతర దేశాలపై 100% సుంకాలు విధించేందుకు అధ్యక్షుడు డొనాల్డ్ ట్రంప్కు అధికారం కల్పించే ఒక బిల్లును అమెరికా సెనేట్ ఆమోదించింది. జూలై 11న మరణించిన, ఉక్రెయిన్కు గట్టి మద్దతుదారుడైన రిపబ్లికన్ సెనేటర్ లిండ్సే గ్రాహం గౌరవార్థం ఆయన పేరు మీద రూపొందించిన ఈ బిల్లును సెనేట్ 86-11 ఓట్ల తేడాతో ఆమోదించింది.
ప్రస్తుతం ఐదవ సంవత్సరంలోకి ప్రవేశించిన ఉక్రెయిన్ యుద్ధాన్ని ప్రారంభించినందుకు రష్యాపై కొత్త ఆంక్షలు విధించాలని గ్రాహం గట్టిగా వాదించారు. సెనేట్లో ఆయన వారసురాలిగా వచ్చిన ఆయన సోదరి డార్లిన్ గ్రాహం, ఈ బిల్లు “(రష్యా అధ్యక్షుడు వ్లాదిమిర్) పుతిన్కు బాగా దెబ్బ కొడుతుంది” అని పేర్కొన్నారు. గ్రాహంతో పాటు ఏడాదికి పైగా ఈ బిల్లు ఆమోదం కోసం కృషి చేసిన డెమొక్రాట్ రిచర్డ్ బ్లూమెంతల్, ఉక్రెయిన్ ప్రజలు “ఒంటరిగా లేరు” అని స్పష్టం చేశారు.
రష్యా వద్ద ఆయిల్ కొనడం వల్ల ఆ దేశ ఆర్థిక వ్యవస్థ బలపడుతుందని, దీని వల్ల ఆ దేశం ఉక్రెయిన్పై యుద్ధం కొనసాగించే అవకాశాలు ఉన్నట్లు అమెరికా భావిస్తున్నది. ఈ నేపథ్యంలో రష్యా మీద ఆధారపడే దేశాలకు షాక్ ఇవ్వాలని ట్రంప్ సర్కారు ఆలోచిస్తున్నది. రష్యా నుంచి చమురు, సహజ వాయువును అత్యధికంగా దిగుమతి చేసుకుంటున్న దేశాలపై కొత్త టారిఫ్ అధికారాలను వినియోగించే అవకాశం ఈ చట్టంలో ఉంది.
ప్రస్తుతం ఆ జాబితాలో చైనా, భారత్, అజర్బైజాన్, హంగేరీ, స్లొవేకియా ఉన్నాయి. ఈ దేశాల నుంచి అమెరికాకు వచ్చే వస్తువులపై భారీగా సుంకాలు విధించేందుకు అధ్యక్షుడు డొనాల్డ్ ట్రంప్నకు ఈ బిల్లు అదనపు అధికారాన్ని కల్పిస్తుంది. అంటే రష్యా నుంచి చమురు కొనుగోలు కొనసాగిస్తే, ఆ దేశాలపై అమెరికా వాణిజ్య పరంగా ప్రతీకార చర్యలు తీసుకునే అవకాశం ఉంటుంది. సెనేట్ ఆమోదంతో బిల్లు తదుపరి దశకు చేరుకుంది. అమెరికా ప్రతినిధుల సభ ఆగస్టు 31న తిరిగి సమావేశమైన తర్వాత ఈ బిల్లుపై చర్చించి ఓటింగ్ నిర్వహించనుంది. అక్కడ కూడా ఆమోదం లభించి, అధ్యక్షుడి సంతకం చేస్తేనే ఇది చట్టంగా మారుతుంది.
ఈ బిల్లు కేవలం రష్యా చమురు కొనుగోలు చేసే దేశాలపై సుంకాలకే పరిమితం కాలేదు. రష్యా ప్రభుత్వంపై కూడా కఠిన ఆంక్షలు విధించే ప్రతిపాదనలు ఇందులో ఉన్నాయి. రష్యా అధ్యక్షుడు వ్లాదిమిర్ పుతిన్, ఆ దేశంలోని సంపన్న పారిశ్రామికవేత్తలు, ప్రముఖ అధికారులు, ఆర్థిక సంస్థలను లక్ష్యంగా చేసుకుని ఆంక్షలు విధించే అవకాశం ఉంది.
More Stories
బెంగళూరు ఫైవ్ స్టార్ హోటళ్ల కిచెన్లో కుళ్లిన కూరగాయలు, మాంసం
ఎఫ్సీఆర్ఏ సవరణ బిల్లు భారత్ ఆంతరంగిక విషయం
నీట్ ప్రశ్నలను లీక్ చేసిన ముగ్గురు ఎన్టీఏ సబ్జెక్ట్ నిపుణులు