సునేత్రా పవార్ పై “”గుంగీ గుడియా” వాఖ్యల రాజకీయ దుమారం 

మహారాష్ట్ర ఉప ముఖ్యమంత్రి సునేత్రా పవార్‌ను ఉద్దేశించి కాంగ్రెస్ పార్టీ చేసిన “గుంగీ గుడియా” (మూగ బొమ్మ) వ్యాఖ్యకు నిరసనగా, మంగళవారం నాడు ఎన్‌సీపీ (నేషనలిస్ట్ కాంగ్రెస్ పార్టీ) నాయకులు ముంబైలోని మహారాష్ట్ర కాంగ్రెస్ కార్యాలయంలో జరుగుతున్న విలేకరుల సమావేశంలోకి దూసుకెళ్లారు. ఎన్‌సీపీ నాయకులు నినాదాలు చేస్తూ, రాష్ట్ర కాంగ్రెస్ అధ్యక్షుడు హర్షవర్ధన్ సప్కల్ క్షమాపణ చెప్పాలని డిమాండ్ చేశారు. 

దివంగత ప్రధాని ఇందిరా గాంధీని అవమానించడానికి గతంలో వాడిన అదే పదాన్ని ఇప్పుడు ప్రతిపక్ష పార్టీ సమర్థిస్తోందా? అని ఎన్‌సీపీ ప్రశ్నించడంతో, సునేత్రా పవార్‌ను “గుంగీ గుడియా” అని కాంగ్రెస్ సంబోధించడంపై సోమవారం రాజకీయ దుమారం రేగింది. మహారాష్ట్ర తొలి మహిళా ఉప ముఖ్యమంత్రిపై చేసిన వ్యాఖ్యలకు కాంగ్రెస్ సిగ్గుపడాలని, ఇది రాష్ట్రంలోని మహిళలకు జరిగిన అవమానమని ఉప ముఖ్యమంత్రి ఏక్‌నాథ్ షిండే మండిపడ్డారు. 

బీడ్ జిల్లాలో శాంతిభద్రతల పరిస్థితిపై ఒక జర్నలిస్ట్ అడిగిన ప్రశ్నకు సమాధానం ఇవ్వకుండా ఎన్‌సీపీ నేత ధనంజయ్ ముండే సునేత్రా పవార్‌ను అడ్డుకున్నట్లుగా ఉన్న వీడియోను కాంగ్రెస్ సోషల్ మీడియాలో పోస్ట్ చేసిన తర్వాత ఈ వివాదం ముదిరింది. ఆ తర్వాతే ఆమెను “గుంగీ గుడియా” అని ఆ పార్టీ పేర్కొంది. పవార్ బీడ్ జిల్లాకు గార్డియన్ మంత్రిగా వ్యవహరిస్తున్నారు. 

“సునేత్రా పవార్ గారూ, మీరు ఇంకా ఎన్ని రోజులు ‘గుంగీ గుడియా’లా ఉండిపోతారు?” అని కాంగ్రెస్ ఆ పోస్ట్‌లో పేర్కొంది. ఈ రాజకీయ దుమారం మధ్య,  “అది దూషణ కాదు, సునేత్రా పవార్ బహిరంగ ప్రవర్తనకు సంబంధించిన వివరణ మాత్రమే” అంటూ సప్కల్ ఆ వ్యాఖ్యను సమర్థించుకున్నారు. బీడ్‌లో జరిగిన విలేకరుల సమావేశంలో జర్నలిస్టులు వరుసగా ప్రశ్నలు అడుగుతున్నప్పటికీ, ఆమె  ఏ అంశంపై స్పందించలేదని సప్కల్ చెప్పారు. అక్కడ ఉన్న ఒక వ్యక్తి (ధనంజయ్ ముండే) జర్నలిస్టులను నిశ్శబ్దం చేయడానికి ప్రయత్నించినప్పటికీ, ఆమె దానిపై కూడా స్పందించలేదని ఆయన ఆరోపించారు. 

” ‘గుంగీ గుడియా’ అనేది దూషణా? అది కేవలం ఒక వివరణ మాత్రమే, ఆ పోలిక సునేత్రా పవార్‌కు వర్తిస్తుంది” అని ఆయన స్పష్టం చేశారు. దీనిపై స్పందిస్తూ, దివంగత ఇందిరా గాంధీపై చేసిన విమర్శలు సమంజసమేనని ప్రతిపక్ష పార్టీ పరోక్షంగా అంగీకరిస్తోందా? అని ఎన్‌సీపీ అధికార ప్రతినిధి ఉమేష్ పాటిల్ ప్రశ్నించారు.

 “ప్రజాస్వామ్యంలో భిన్నాభిప్రాయాలు, విధానాలపై తీవ్ర విమర్శలు చేయడం సహజమే అయినప్పటికీ, మహిళలను కించపరిచే భాష ఏ రాజకీయ పార్టీకీ తగదు” అని పాటిల్  ఆగ్రహం వ్యక్తం చేశారు. ఆ పదాన్ని ఉపసంహరించుకుని, ప్రజా రాజకీయ చర్చలలో హుందాగా, గౌరవ మర్యాదలను కాపాడుకునే సంప్రదాయాన్ని నిలబెట్టాలని ఆయన కాంగ్రెస్‌ను కోరారు. 

ఇదిలా ఉండగా, ‘గంగీ గుడియా’ వ్యాఖ్య గురించి అడిగినప్పుడు, ఎన్‌సిపి (ఎస్‌పి) నాయకుడు, సునేత్రా పవార్ మేనల్లుడు రోహిత్ పవార్ మాట్లాడుతూ, “సందర్భాన్ని కూడా పరిగణనలోకి తీసుకోవాలి. ఒక విలేకరి ఆమెను ఒక ప్రశ్న అడగాలనుకుంటే, ఒక స్థానిక నాయకుడు అతడిని అడ్డుకున్నారు. అన్యాయాన్ని నివారించే శక్తి ఉన్నప్పటికీ, సునేత్రా పవార్ మౌనం వహించారు” అని తెలిపారు. దివంగత ఇందిరా గాంధీ విమర్శకులు ఆమెను ఉద్దేశించి ‘గంగీ గుడియా’ అనే పదాన్ని ఉపయోగించారని, కానీ ఆమె తన పని ద్వారా వారిని తప్పు అని నిరూపించారని ఆయన గుర్తు చేశారు.