బుధవారం జరిగిన ఒక కీలక పరిణామంలో, భారతదేశంలో సోషల్ మీడియా దిగ్గజం మెటా కార్యకలాపాలపై కేంద్రాన్ని కలవరపెడుతున్న పలు సమస్యలపై మెటా అధిపతి మార్క్ జుకర్బర్గ్ ఐటీ పార్లమెంటరీ ప్యానెల్కు, ప్రభుత్వానికి క్షమాపణలు పంపారు. రైల్ భవన్లోని తన కార్యాలయంలో సమాచార, ప్రసార శాఖ మంత్రి అశ్విని వైష్ణవ్ను కలిసిన మెటా ఉన్నతాధికారులు కూడా ఈ క్షమాపణలను తెలియజేశారు.
“సిఎస్ఎఎం (బాల లైంగిక వేధింపుల సామగ్రి) కంటెంట్, డీప్ఫేక్ కంటెంట్, ప్లాట్ఫామ్ నిర్వహణలో జరిగిన తప్పిదాలకు మార్క్ జుకర్బర్గ్ క్షమాపణలు పంపారు. వారు ‘మధ్యవర్తి’ నిర్వచనం పరిధిలోకి రారని వారికి స్పష్టం చేశారు. కంటెంట్ను ఎవరు స్వీకరించాలో వారే ఎంపిక చేస్తారు. ఐటీ చట్టం కింద సేఫ్ హార్బర్ వర్తించదు. కొన్ని రకాల కంటెంట్ను ప్రోత్సహించడానికి చాలా డబ్బు చెల్లించిన్నట్లు వారు అంగీకరించారు. వారు క్షమాపణలు చెప్పి, జరిగిన తప్పుకు విచారం వ్యక్తం చేశారు,” అని అధికార వర్గాలు తెలిపాయి.
ప్లాట్ఫామ్ భద్రత, కంటెంట్ మోడరేషన్ పారదర్శకత, అల్గారిథమిక్ మానిప్యులేషన్పై తీవ్రమైన నియంత్రణ పరిశీలన జరుగుతున్న నేపథ్యంలో ఈ క్షమాపణ వచ్చింది. మెటా గ్లోబల్ బృందం బుధవారం కేంద్ర సమాచార సాంకేతిక శాఖ మంత్రి అశ్వినీ వైష్ణవ్తో సమావేశమై పలు కీలక అంశాలపై చర్చించింది. ప్రభుత్వ వర్గాల సమాచారం ప్రకారం, ఆ సమావేశంలో మెటా బృందానికి భారత చట్టాల ప్రకారం సోషల్ మీడియా సంస్థల బాధ్యతలను స్పష్టంగా వివరించారు.
కంటెంట్ను ఎవరికీ చూపించాలనే విషయంలో మెటా స్వయంగా నిర్ణయాలు తీసుకుంటున్నందున, తమను పూర్తిగా ఇంటర్మీడియరీగా పరిగణించలేమని ప్రభుత్వం స్పష్టం చేసినట్లు తెలిసింది. ఈ నేపథ్యంలో సమాచార సాంకేతిక చట్టంలోని ‘సేఫ్ హార్బర్’ రక్షణ వర్తించదని కూడా ప్రభుత్వ వర్గాలు పేర్కొన్నాయి. సమావేశంలో మెటా ప్రతినిధులు కొన్ని రకాల కంటెంట్ను ప్రోత్సహించేందుకు భారీగా నిధులు ఖర్చు చేసిన విషయాన్ని అంగీకరించినట్లు ప్రభుత్వ వర్గాలు తెలిపాయి.
అలాంటి చర్యలపై విచారం వ్యక్తం చేస్తూ, జరిగిన పొరపాట్లకు క్షమాపణలు చెప్పినట్లు సమాచారం. మెటా గ్లోబల్ అఫైర్స్ అధికారి జోయెల్ కాప్లన్తో పాటు పలువురు ఉన్నతాధికారులు ఈ సమావేశానికి హాజరయ్యారు. అనంతరం వారు ఐటీ శాఖ కార్యదర్శి ఎస్. కృష్ణన్తో కూడా ప్రత్యేకంగా సమావేశమయ్యారు. పరీక్షల సంస్కరణలపై ప్రధాని నరేంద్ర మోదీ వీడియోను ఐదు గంటల పాటు తొలగించినందుకు, తమ ప్లాట్ఫామ్లలో లైంగిక వేధింపుల కంటెంట్ను ఉంచినందుకు క్షమాపణ చెప్పడానికి ఆయన వారికి మూడు రోజుల గడువు ఇచ్చారు.
క్షమాపణ చెప్పకపోతే సేఫ్ హార్బర్ నిబంధనలను కోల్పోతారని ప్యానెల్ ఛైర్మన్ నిషికాంత్ దుబే మెటాకు స్పష్టం చేశారు. “సేఫ్ హార్బర్ ఎందుకు? దుర్భాష, వేధింపులు, హింస, పిల్లలు, మహిళలతో కూడిన లైంగిక కంటెంట్, దేశ వ్యతిరేక నకిలీ వార్తలకా? అల్గారిథమిక్ ట్రెండింగ్ ద్వారా దేశ వ్యతిరేక శక్తుల తప్పుడు ప్రచారాన్ని పెంచి పోషించడానికా? చివరగా, 140 కోట్ల మంది భారతీయులకు ప్రధాని మోదీ వీడియోను ఐదు గంటల పాటు అందుబాటులో లేకుండా చేసినందుకా? ప్రజలు మేల్కొన్నారు,” అని దుబే ఆగ్రహం వ్యక్తం చేశారు.
భారత చట్టాలకు అనుగుణంగా సోషల్ మీడియా సంస్థలు ఎలా వ్యవహరించాలి, చట్టపరమైన నిబంధనలను ఎలా అమలు చేస్తాయి అనే విషయంలో స్పష్టమైన అవగాహన ఉండాలని కేంద్ర ప్రభుత్వం స్పష్టం చేసింది. ముఖ్యంగా ప్రముఖ ప్రజాప్రతినిధులు, ధ్రువీకరించిన ఖాతాల నుంచి వచ్చే పోస్టులను తొలగించే ముందు అదనపు భద్రతా చర్యలు ఉండాల్సిన అవసరాన్ని ప్రభుత్వం నొక్కిచెప్పింది.
ప్రభుత్వ వర్గాల ప్రకారం, ఇది కేవలం సాంకేతిక సమస్య మాత్రమే కాకుండా జాతీయ భద్రత, ప్రజా శాంతి భద్రతలకు సంబంధించిన అంశంగా కూడా పరిగణిస్తున్నారు. మెటా అల్గారిథమ్ ఎలా పనిచేస్తుంది, కంటెంట్ ప్రాధాన్యతను ఏ ప్రమాణాల ఆధారంగా నిర్ణయిస్తుంది, అల్గారిథమిక్ పక్షపాతం ఉందా లేదా అనే అంశాలపై కూడా కేంద్రం వివరణ కోరింది.
More Stories
పార్లమెంట్ లో ప్రతిష్టంబన తొలగింపుకై రాహుల్ తో కిరణ్ రిజిజు భేటీ
గడ్కరీ డీప్ఫేక్ వీడియోలను వెంటనే తొలగించండి
మూడు రోజుల్లోగా క్షమాపణ… మార్క్ జుకర్బర్గ్కు కేంద్రం అల్టిమేటం!