* పునర్విభజన బిల్లు కోసం 16 నుండి 18 వరకు పార్లమెంట్ ప్రత్యేక సమావేశం?
పార్లమెంట్ వర్షాకాల సమావేశాల్లో నెలకొన్న ప్రతిష్టంభన మూడవ వారంలోకి ప్రవేశించిన నేపథ్యంలో, ఈ సమస్యకు పరిష్కారం కనుగొనేందుకు పార్లమెంటరీ వ్యవహారాల మంత్రి కిరణ్ రిజిజు బుధవారం ప్రతిపక్ష నాయకుడు రాహుల్ గాంధీని సంప్రదించారు. ప్రతిపక్షాల నినాదాల మధ్య లోక్సభ సమావేశమైన కొద్ది నిమిషాలకే వాయిదా పడిన తర్వాత, రిజిజు తన ఛాంబర్లో రాహుల్ గాంధీని కలిశారని సంబంధిత వర్గాలు తెలిపాయి.
పార్లమెంట్లో కొనసాగుతున్న ప్రతిష్టంభనను తొలగించే ప్రయత్నంలో కిరణ్ రిజిజు, రాహుల్ గాంధీతో దాదాపు 50 నిమిషాల పాటు సమావేశమయ్యారు. ఈ చర్చల్లో కాంగ్రెస్ ఎంపీ ప్రియాంక గాంధీ వాద్రా కూడా పాల్గొన్నారు. ప్రస్తుత సమావేశాల్లో ప్రభుత్వం తిరిగి ప్రవేశపెట్టాలని భావిస్తున్న డీలిమిటేషన్ బిల్లు (నియోజకవర్గాల పునర్విభజన బిల్లు), మహిళా రిజర్వేషన్ సవరణ బిల్లు విషయంలో కాంగ్రెస్ సహకారాన్ని రిజిజు కోరారని సమాచారం.
అయితే, ప్రభుత్వం చేసిన ఈ అభ్యర్థనను రాహుల్ గాంధీ పూర్తిగా తిరస్కరించారని ఆ వర్గాలు పేర్కొన్నాయి. రామ్ మందిర్ విరాళాల సేకరణలో జరిగినట్లు ఆరోపిస్తుతున్న చోరీపై చర్చ జరగాలని, అలాగే రాజధానిలో జూలై 20న జరిగిన నిరసన సందర్భంగా విద్యార్థులపై పోలీసులు జరిపిన చర్యల గురించి హోంమంత్రి అమిత్ షా ప్రకటన చేయాలని డిమాండ్ చేస్తూ, అప్పటి వరకు సభలో ఎటువంటి కార్యకలాపాలు జరగవని ప్రతిపక్ష నాయకుడు కిరణ్ రిజిజుకు స్పష్టం చేశారు.
రాహుల్ గాంధీతో సమావేశం తర్వాత, పార్లమెంట్ ప్రతిష్టంభనపై చర్చించేందుకు కిరణ్ రిజిజు లోక్సభ స్పీకర్ ఓం బిర్లా, హోం మంత్రిని కలిశారని ఆ వర్గాలు తెలిపాయి. ప్రతిపక్షాల మొండి వైఖరి కారణంగా ఈ సమావేశాల్లో డీలిమిటేషన్ బిల్లును ఆమోదింపజేయాలన్న ప్రభుత్వ ప్రణాళికకు ఆటంకం ఏర్పడింది. తృణమూల్ కాంగ్రెస్, ఉద్ధవ్ థాకరే నేతృత్వంలోని శివసేన నుండి వచ్చిన ఫిరాయింపుల వల్ల సభలో సంఖ్యాబలం పెరగడంతో, గత సమావేశాల్లో ఆమోదం పొందలేకపోయిన ఈ వివాదాస్పద బిల్లును ఈసారి ఎలాగైనా ఆమోదింపజేయాలని ప్రభుత్వం భావించింది.
విద్యార్థులపై జరిగిన చర్యల విషయంలో ప్రతిపక్షాలు అమిత్ షాను లక్ష్యంగా చేసుకుని, సభలో ఆయన నుండి ప్రకటన చేయాలని డిమాండ్ చేస్తున్నాయి. నిరసన సమయంలో బలప్రయోగంపై నిర్ణయం తీసుకునేది మేజిస్ట్రేట్ అని, హోం మంత్రి కాదని పేర్కొంటూ ప్రభుత్వం ప్రతిపక్షాల ఆరోపణలను తోసిపుచ్చింది. కాంగ్రెస్, సమాజ్వాదీ పార్టీ నేతృత్వంలోని ప్రతిపక్షాలు, రామ్ మందిర్ విరాళాల సేకరణలో చోరీ ఆరోపణలపై కూడా కేంద్రంపై విమర్శలు గుప్పిస్తూ, ఆ అంశంపై చర్చ జరగాలని డిమాండ్ చేస్తున్నాయి.
ప్రభుత్వాన్ని లక్ష్యంగా చేసుకుని, గత కొన్ని రోజులుగా ప్రతిపక్ష ఎంపీలు పార్లమెంట్ ప్రాంగణంలో ప్రతీకాత్మక విరాళాల పెట్టెలతో నిరసనలు తెలుపుతున్నారు. జూలై 20న వర్షాకాల సమావేశాలు ప్రారంభమైనప్పటి నుండి, లోక్సభలో ‘ప్రశ్నోత్తరాల సమయం’ సజావుగా సాగలేదు. సభలో నెలకొన్న గందరగోళం మధ్య చర్చ లేకుండానే ఐదు బిల్లులను ఆమోదించారు.
సంబంధిత బిల్లులను ఆమోదించడానికి పార్లమెంటు మూడు రోజుల ప్రత్యేక సమావేశాన్ని నిర్వహించే ప్రతిపాదనపై ప్రధాన ప్రతిపక్షమైన కాంగ్రెస్తో చర్చలు జరపడం ద్వారా, మహిళా రిజర్వేషన్, నియోజకవర్గాల పునర్విభజన (డీలిమిటేషన్) వంటి పెండింగ్లో ఉన్న అంశాలను ప్రభుత్వం బుధవారం తిరిగి తెరపైకి తెచ్చింది. ఈ ప్రత్యేక సమావేశాన్ని ఆగస్టు 16 నుండి 18 వరకు నిర్వహించాలని ప్రతిపాదించారు.
నియోజకవర్గాల పునర్విభజన చేపట్టి, లోక్సభ సభ్యుల సంఖ్యను ప్రస్తుతమున్న 543 నుండి 850కి పెంచడం ద్వారా లోక్సభ, రాష్ట్ర అసెంబ్లీలలో మహిళలకు 33 శాతం రిజర్వేషన్ కల్పించే రాజ్యాంగ సవరణ బిల్లులను ఆమోదించడానికి ప్రభుత్వం ఆసక్తిగా ఉంది. రాజ్యాంగ సవరణ బిల్లు ఆమోదానికి అవసరమైన మూడింట రెండు వంతుల మెజారిటీ (సభకు హాజరై ఓటు వేసిన వారిలో) ప్రభుత్వానికి లేకపోవడంతో, గత ఏప్రిల్లో జరిగిన ప్రత్యేక సమావేశంలో కాంగ్రెస్ నేతృత్వంలోని ప్రతిపక్షం ఈ బిల్లును ఓడించింది.
ఈ సమావేశం తర్వాత, రిజిజు దీనిని ఒక “మర్యాదపూర్వక సమావేశం”గా అభివర్ణించారు. పార్లమెంటులో నెలకొన్న ప్రతిష్టంభన త్వరలోనే పరిష్కారమవుతుందని ఆశాభావం వ్యక్తం చేశారు. విశ్వసనీయ వర్గాల సమాచారం ప్రకారం, కేంద్ర హోంమంత్రి అమిత్ షా రాజీనామాను ప్రతిపక్షం కోరడం లేదని రాహుల్ గాంధీ రిజిజుకు తెలిపారు. దానికి బదులుగా, ఈ ప్రతిష్టంభనకు ప్రధాన కారణమైన అంశంపై—అంటే ఇటీవల జరిగిన పేపర్ లీక్ ఆందోళనల సమయంలో విద్యార్థి నిరసనకారులపై అధిక బలప్రయోగం జరగడంపై—షా పార్లమెంటులో ప్రకటన చేయాలని వారు డిమాండ్ చేస్తున్నారు.
హోం మంత్రి సభలో ఈ విషయంపై మాట్లాడాల్సి ఉంటుందని రాహుల్ గాంధీ స్పష్టం చేసినట్లు సమాచారం. పెండింగ్లో ఉన్న బిల్లులపై కాంగ్రెస్ పార్టీ వైఖరిని తెలుసుకునే ప్రయత్నంలో భాగంగా, ప్రతిపాదిత డీలిమిటేషన్ బిల్లు, విదేశీ విరాళాల నియంత్రణ చట్టం (ఎఫ్ సి ఆర్ ఎ) సవరణలతో సహా కీలక చట్టాలపై రిజిజు రాహుల్ గాంధీ అభిప్రాయాలను కోరారని సమాచారం.
ప్రభుత్వ సంప్రదింపుల ప్రక్రియలో భాగంగా రిజిజు సమాజ్వాదీ పార్టీ, ఇతర ప్రతిపక్ష పార్టీల నాయకులతో కూడా చర్చలు జరుపుతారని ఆ వర్గాలు తెలిపాయి. గురువారం నాటికి పరిస్థితిపై స్పష్టత వస్తుందని, ప్రతిపక్షంతో నెలకొన్న ప్రతిష్టంభన పరిష్కారమవుతుందో లేదో తెలుస్తుందని ప్రభుత్వం ఆశిస్తోంది. కాంగ్రెస్ పార్టీ వైఖరిలో ఏమైనా మార్పు ఉంటుందేమోనని చూడటానికి కేంద్రం అప్పటి వరకు వేచి చూస్తుందని సమాచారం.
More Stories
ప్రధాని వీడియోను తొలగించినందుకు జుకర్బర్గ్ క్షమాపణలు
గడ్కరీ డీప్ఫేక్ వీడియోలను వెంటనే తొలగించండి
ఉగ్రనిధుల కేసులో హక్కుల కార్యకర్త పర్వేజ్, ఐపీఎస్ అరవింద్ నేగి