ప్రవాసంలో ఉన్న బంగ్లాదేశ్ రచయిత్రి, మానవ హక్కుల కార్యకర్త తస్లీమా నస్రీన్, తన రచనలపై జరిగిన హింసాత్మక నిరసనల కారణంగా కోల్కతా నగరాన్ని విడిచి వెళ్లవలసి వచ్చిన దాదాపు రెండు దశాబ్దాల తర్వాత తిరిగి రానున్నారు. 63 ఏళ్ల ఈ రచయిత్రి, తన ఆత్మకథ ‘ద్విఖండితో’ (విభజితం)లో దైవదూషణ ఆరోపణలపై నిరసనలు చెలరేగడంతో కోల్కతా నుండి పారిపోవలసి వచ్చింది. అప్పటి సీపీఎం నేతృత్వంలోని ప్రభుత్వం ఆ పుస్తకాన్ని నిషేధించింది.
2004 నుండి 2007 వరకు కోల్కతాలో నివసించిన ఈ రచయిత్రి, ప్రస్తుతం దీర్ఘకాలిక నివాస అనుమతిపై ఢిల్లీలో నివసిస్తున్నారు. ఆమె ఆగస్టు 1న రవీంద్ర సదన్లో మత ఛాందసవాదానికి వ్యతిరేకంగా జరిగే ఒక కార్యక్రమంలో పాల్గొననున్నారు. మూడు సంస్థల సామూహిక ఆహ్వానం మేరకు, 2007 తర్వాత ఆమె ఈ నగరాన్ని సందర్శించడం ఇదే మొదటిసారి.
ఒకప్పుడు బంగ్లాదేశ్ ప్రభుత్వం ఇస్లాంను అపఖ్యాతి పాలు చేశారని ఆరోపించిన ఆ రచయిత్రి, తన గౌరవార్థం ఏర్పాటు చేసిన పౌర సన్మాన కార్యక్రమంలో పాల్గొన్న అనంతరం, తన కవితల్లో కొన్నింటిని వినిపించి, ఒక చర్చలో పాల్గొంటారని నిర్వాహకులు చెబుతున్నారు. ఈ కార్యక్రమానికి ముఖ్యమంత్రి సువేందు అధికారి, రాష్ట్ర ఆర్థిక మంత్రి స్వపన్ దాస్గుప్తా, రచయిత శిర్షెందు ముఖోపాధ్యాయ్ కూడా హాజరయ్యే అవకాశం ఉంది.
“తస్లీమా నస్రీన్ను బెంగాల్కు తీసుకురమ్మని నేను రాష్ట్ర ప్రభుత్వానికి చెప్పాను. తస్లీమా నస్రీన్ గొంతును ఎందుకు అణచివేయాలి? బంగ్లాదేశ్లో ఒక హిందూ కుటుంబం ఎదుర్కొన్న అఘాయిత్యాలపై ఆమె ‘లజ్జ’ రాశారు. కానీ గత వామపక్ష ప్రభుత్వం ఆమె రచనను నిషేధించింది. కోల్కతా పర్యటనకు ఆమె రాకను మేము స్వాగతిస్తున్నాము,” అని రాష్ట్ర బీజేపీ అధ్యక్షుడు సమీక్ భట్టాచార్య ప్రకటించారు.
బంగ్లాదేశ్లో ఇప్పటికీ నిషేధంలో ఉన్న ‘లజ్జ’, బంగ్లాదేశీ హిందువులు, ఇతర మత మైనారిటీలు ఎదుర్కొంటున్న అసహనం, హింసల కథను చెబుతుంది. ఇదిలా ఉండగా, ఆ రచయిత్రి తరచుగా ముస్లింలకు వ్యతిరేకంగా మాట్లాడారని, అందుకే ‘డబుల్-ఇంజిన్ ప్రభుత్వం’ ఆమెను స్వాగతిస్తోందని తృణమూల్ ఎమ్మెల్యే అఖ్రుజ్జమాన్ పేర్కొన్నారు.
“చూడండి, తస్లీమా నస్రీన్ బంగ్లాదేశ్కు చెందిన రచయిత్రి. ఆమె ముస్లిం సమాజానికి, ఇస్లాంలోని షరియత్కు వ్యతిరేకంగా చాలా మాట్లాడారు. ఎవరైనా ముస్లింలకు వ్యతిరేకంగా మాట్లాడితే, డబుల్-ఇంజిన్ ప్రభుత్వం వారిని గౌరవిస్తుంది – ఇంకేం చెప్పాలి?” అని అఖ్రుజ్జమాన్ పేర్కొన్నారు.
బెంగాల్ మంత్రి అగ్నిమిత్ర పాల్ ఆ రచయిత్రి పర్యటనను గట్టిగా స్వాగతించారు. “గత ప్రభుత్వ హయాంలో ఆమె తిరిగి రావడానికి ఎప్పుడూ అవకాశం కల్పించలేదు. లౌకికవాదం గురించి ప్రతిపక్షాలు గొప్పగా మాట్లాడతాయి, కానీ ఆమె తన పుస్తకంలో వాస్తవాలను రాసినప్పుడు, వారు ఆమెకు భద్రత కల్పించడానికి నిరాకరించారు” అని విమర్శించారు.
“తృణమూల్ ప్రభుత్వ హయాంలో వివిధ వర్గాల ప్రజలను కేవలం రాజకీయ సాధనాలుగా మాత్రమే వాడుకున్నారు. నేడు, సువేందు అధికారి నేతృత్వంలోని ప్రభుత్వంలో తస్లీమా నస్రీన్ ఆగస్టు 1న వస్తున్నారు. ఇది మాకు గర్వకారణం మరియు సంతోషాన్నిచ్చే విషయం,” అని రాష్ట్ర మంత్రి పెర్కోన్నారు.
More Stories
ఇరాన్ సైనిక స్థావరాలపై మిస్సైళ్లతో విరుచుకుపడుతున్న అమెరికా
అమల్లోకి భారత్- బ్రిటన్ సమగ్ర ఆర్ధిక, వాణిజ్య ఒప్పందం
సంక్లిష్ట, వినూత్న శస్త్రచికిత్సల మార్గదర్శి ఆచార్య సుశ్రుతుడు