అయోధ్యలోని రామమందిరానికి వచ్చిన విరాళాల చోరీకి సంబంధించిన వివాదంపై తనపై వస్తున్న ఆరోపణలు `నిరాధారం’ అని ‘శ్రీరామ జన్మభూమి తీర్థ క్షేత్ర’ మాజీ ప్రధాన కార్యదర్శి చంపత్ రాయ్ కొట్టిపారేసారు. ఈ విషయమై మొదటిసారిగా బహిరంగంగా స్పందిస్తూ మంగళవారం “రామ భక్తులకు” రాసిన బహిరంగ లేఖలో ప్రత్యేక దర్యాప్తు బృందం (సిట్) తన తుది నివేదికను సమర్పించిన తర్వాత దీనిపై వివరంగా స్పందిస్తానని చెప్పారు.
ట్రస్ట్ ప్రధాన కార్యదర్శి పదవికి రాజీనామా చేసిన కొద్ది రోజుల తర్వాత `ఎక్స్’ వేదికగా పంచుకున్న ఈ లేఖలో, ఆలయ విరాళాల పెట్టెలలోని నగదును లెక్కించే సమయంలో జరిగినట్లు ఆరోపిస్తున్న చోరీపై జూన్ 6, 2026 నుండి చర్చలు జరుగుతున్నాయని, ఈ వ్యవహారానికి సంబంధించి తాను వ్యక్తిగతంగా అనేక ఆరోపణలను ఎదుర్కొన్నానని రాయ్ పేర్కొన్నారు.
ఇప్పటివరకు తాను ఉద్దేశపూర్వకంగానే మౌనం పాటించానని ఆయన తెలిపారు. సిట్ దర్యాప్తు గురించి ప్రస్తావిస్తూ, ఆలయ ట్రస్ట్కు సంబంధించిన అవకతవకలను పరిశీలించడానికి రూపొందించిన ప్రాథమిక నివేదిక అత్యంత గోప్యమైన పత్రం అయినప్పటికీ, అది ఇప్పుడు బహిర్గతమైందని రాయ్ పేర్కొన్నారు. దర్యాప్తు పూర్తయ్యాక “నిజం బయటపడుతుందని” విశ్వాసం వ్యక్తం చేసిన ఆయన, సిట్T తుది నివేదిక సమర్పించిన తర్వాత ప్రతి ఆరోపణకూ అంశాల వారీగా సమాధానం ఇస్తానని చెప్పారు.
తన నిజాయితీని సమర్థించుకుంటూ, 1991 అక్టోబర్లో సంస్థ తనను అయోధ్యకు పంపిందని, గత 45 ఏళ్లుగా పూర్తి స్థాయి ప్రచారక్గా సేవలు అందిస్తున్నానని రాయ్ తెలిపారు. తాను పనిచేసిన ప్రతిచోటా తన బహిరంగ జీవితం ఎప్పుడూ “తెరిచిన పుస్తకం” లాంటిదేనని పేర్కొన్న ఆయన, అందరికీ తన గౌరవపూర్వక అభివాదాలు తెలియజేశారు.
కాగా, మాజీ ప్రధాన కార్యదర్శి చంపత్ రాయ్, ట్రస్టీ అనిల్ మిశ్రా ఇకపై ట్రస్ట్ సభ్యులు కారని ‘శ్రీరామ జన్మభూమి తీర్థ క్షేత్ర ట్రస్ట్’ మంగళవారం ధృవీకరించింది, తద్వారా వారి హోదాకు సంబంధించిన ఊహాగానాలకు తెరపడింది. సోమవారం జరిగిన ట్రస్ట్ సమావేశంలో రాయ్, మిశ్రాల రాజీనామాలను ఆమోదించారని, ఆ తర్వాత వారు అధికారికంగా సభ్యత్వ బాధ్యతల నుండి తప్పుకున్నారని ట్రస్ట్ కోశాధికారి గోవింద్ దేవ్ గిరి తెలిపారు.
చంపత్ రాయ్ స్థానంలో ప్రధాన కార్యదర్శిగా రిటైర్డ్ ఇండియన్ ఫారెస్ట్ సర్వీస్ అధికారి కృష్ణ మోహన్ను శాశ్వత వారసుడిగా నియమించాలా వద్దా అనే విషయంపై జూలై 22న జరగబోయే తదుపరి సమావేశంలో ట్రస్ట్ నిర్ణయం తీసుకునే అవకాశం ఉంది. రామ మందిరంలో విరాళాల దొంగతనం, దుర్వినియోగం ఆరోపణలపై దర్యాప్తు చేస్తున్న సిట్, కానుకల లెక్కింపు సమయంలో ఉద్యోగులు పదేపదే నగదును దాచిపెడుతున్నట్లు గుర్తించింది.
అంతేకాకుండా, ఆలయ ప్రాంగణంలో భద్రత, పర్యవేక్షణలో తీవ్రమైన లోపాలు ఉన్నాయని కూడా ఎత్తి చూపింది. సిట్ తన ప్రాథమిక నివేదికను ట్రస్ట్కు సమర్పించింది. ట్రస్ట్ సమావేశం అనంతరం విలేకరులతో మాట్లాడుతూ, కోశాధికారి గోవింద్ దేవ్ గిరి, దర్యాప్తు ఇంకా కొనసాగుతున్నందున, ఈ నివేదికలోని అంశాలను ట్రస్టీల ముందు ఉంచినప్పటికీ, వాటిపై ఎలాంటి చర్చ గానీ, వాదన గానీ జరగలేదని తెలిపారు.
నివేదిక ప్రకారం, ఏప్రిల్ 27 నుంచి జూన్ 5 మధ్య రికార్డ్ చేసిన సీసీటీవీ ఫుటేజ్లో, లెక్కింపు గదిలోని ఉద్యోగులు కరెన్సీ నోట్ల కట్టలను, చిల్లర నగదును పలుమార్లు తమ బట్టలు, జేబులు, బూట్లు, ఇతర ప్రదేశాలలో దాచిపెడుతున్నట్లు నమోదైంది. సిట్ ఇలాంటి సుమారు 70 అనుమానాస్పద సంఘటనలను గుర్తించింది. ఈ దొంగతనాలు కేవలం ఒక్కసారి జరిగినవి కాదని, ఇవి పదేపదే పునరావృతమయ్యే, వ్యవస్థీకృతమైన పద్ధతిలో భాగమని ఇది సూచిస్తుంది. నిర్ణీత భద్రతా ప్రోటోకాల్స్ను పెద్ద ఎత్తున ఉల్లంఘించినట్లు కూడా ఈ దర్యాప్తులో వెల్లడైంది.
లెక్కింపు గదిలోకి ప్రవేశించేటప్పుడు లేదా బయటకు వెళ్లేటప్పుడు సిబ్బందిని తనిఖీ చేయలేదని, వ్యక్తిగత వస్తువులను సరిగ్గా పర్యవేక్షించలేదని, బహుళ సేకరణ పెట్టెల నుండి వచ్చిన విరాళాలను కలిపి లెక్కించారని, నగదు, ఇతర విలువైన వస్తువుల డాక్యుమెంటేషన్ మరియు ధృవీకరణలో తీవ్రమైన లోపాలు ఉన్నాయని తేలింది. ప్రాథమిక నివేదికలో ఆరుగురి పేర్లను పేర్కొన్నారు, వీరి ప్రమేయం ప్రాథమికంగా నిర్ధారించింది.ఈ ఆరుగురితో పాటు మరో ఇద్దరు నిందితులను ఈ కేసు సంబంధించి ఇప్పటికే అరెస్టు చేశారు.
విచారణ అధికారికంగా ప్రారంభం కావడానికి ముందే కొంతమంది ఉద్యోగుల నుండి దాదాపు రూ. 78.94 లక్షలు స్వాధీనం చేసుకున్నట్లు సిట్ తెలిపింది. జూన్ 4న లెక్కింపు గది నుండి సుమారు రూ. 2.25 లక్షలు స్వాధీనం చేసుకున్నట్లు కూడా ఇది నమోదు చేసింది. నిందితులైన ఉద్యోగుల బ్యాంకు ఖాతాలను పరిశీలించగా, వారు ప్రకటించిన ఆదాయ వనరులకు మించి నగదు డిపాజిట్లు, ఆర్థిక లావాదేవీలు ఉన్నట్లు నివేదికలో వెల్లడైంది.
దీంతో సిట్ సమగ్ర ఆర్థిక విచారణకు సిఫార్సు చేసింది. నిందితులైన ఉద్యోగులపై బాధ్యతను నిర్ధారించడంతో పాటు, భద్రతా ఏర్పాట్లు, సీసీటీవీ నిఘా, ప్రామాణిక కార్యాచరణ విధానాలను పాటించడం, సిబ్బంది తనిఖీలు, పర్యవేక్షణలో గణనీయమైన లోపాలు ఉన్నాయని పేర్కొంటూ, ట్రస్ట్ యొక్క అంతర్గత పర్యవేక్షణ యంత్రాంగాలను కూడా సిట్ ప్రశ్నించింది. ఈ లోపాలే విరాళాల దొంగతనం, దుర్వినియోగానికి దారితీసే పరిస్థితులను సృష్టించాయని సిట్ పేర్కొంది.
More Stories
సింగరేణి సంస్థకు తాడిచర్ల-2 బొగ్గు గనులు
దేశ సరిహద్దుల్లో హైదరాబాద్ గడ్డపై తయారైన ‘ఉగ్రం’ రైఫిల్
టిఎంసి బ్యాంకు లావాదేవీలపై ఈడీ దర్యాప్తు