బైజూస్ వ్యవస్థాపకుడు బైజు రవీంద్రన్‌కు ఆరు నెలలు జైలు

ఆర్థిక సంక్షోభాలు, న్యాయపరమైన చిక్కులతో సతమతమవుతున్న ప్రముఖ భారతీయ ఎడ్‌టెక్ కంపెనీ అయిన బైజూస్ వ్యవస్థాపకుడు బైజు రవీంద్రన్‌కు మరో గట్టి ఎదురుదెబ్బ తగిలింది. కోర్టు ఆదేశాలను పదేపదే ఉల్లంఘించినందుకు (కోర్టు ధిక్కారం) సింగపూర్ కోర్టు బైజు రవీంద్రన్‌కు ఆరు నెలల జైలు శిక్ష విధించింది. 

ఏప్రిల్ 2024 నుండి తన ఆస్తులకు సంబంధించి సింగపూర్ కోర్టు జారీ చేసిన పలు ఆదేశాలను ఆయన ఉద్దేశపూర్వకంగా పాటించకపోవడంతో ఈ కఠిన చర్య తీసుకున్నారు. జైలు శిక్షతో పాటు, కోర్టు ఖర్చుల కింద 90,000 సింగపూర్ డాలర్ల (సుమారు 70,500 అమెరికన్ డాలర్లు) జరిమానా చెల్లించాలని కూడా కోర్టు ఆదేశించింది. 

బైజూస్‌తో అనుబంధంగా ఉన్న కార్పొరేట్ సంస్థ ‘బేయర్ ఇన్వెస్ట్‌కో’ చట్టబద్ధమైన యాజమాన్యాన్ని నిరూపించే పత్రాలను సమర్పించాలని కూడా కోర్టు బైజును కోరింది. ఖతార్ సార్వభౌమ సంపద నిధికి చెందిన అనుబంధ సంస్థ అయిన ఖతార్ హోల్డింగ్స్ దాఖలు చేసిన పిటిషన్‌పై సింగపూర్ కోర్టు ఈ చారిత్రాత్మక ఉత్తర్వును జారీ చేసింది. 

బైజు రవీంద్రన్ ప్రస్తుతం సింగపూర్‌లో ఉన్నారా? లేక మరెక్కడైనా ఉన్నారా? అనేది స్పష్టంగా తెలియదు. అధికారులకు లొంగిపోవాలని కోర్టు ఆయనను కోరింది. భారతదేశపు అతిపెద్ద స్టార్టప్ విజయంతో ఒకప్పుడు బిలియనీర్ హోదాకు ఎదిగిన బైజు రవీంద్రన్, ప్రపంచవ్యాప్తంగా కఠినమైన న్యాయపరమైన పోరాటాలను ఎదుర్కొంటున్నారు.

అమెరికాలోని రుణదాతల నుండి తీసుకున్న 1.2 బిలియన్ డాలర్ల రుణాన్ని తిరిగి చెల్లించడంలో విఫలమైనందుకు, ఆయన అమెరికా కోర్టులలో కూడా కఠినమైన న్యాయపరమైన చర్యలను ఎదుర్కొంటున్నారు. అమెరికా కోర్టు ఇప్పటికే బైజుపై భారీ ఆర్థిక జరిమానాలు, ఆదేశాలు జారీ చేసింది. దీని తర్వాతే ఈ ఉత్తర్వులు వచ్చాయి. ఇది బైజు ప్రపంచ పెట్టుబడిదారులు, భారత కార్పొరేట్ వర్గాలలో పెద్ద చర్చనీయాంశంగా మారింది.