తీవ్రవాద దాడులు జరిగే అవకాశం ఉందని నిఘా వర్గాలు హెచ్చరించిన నేపథ్యంలో, జాతీయ రాజధాని ఢిల్లీని శనివారం హై అలర్ట్లో ఉంచారు. దీంతో పోలీసులు సహా భద్రతా సంస్థలు నగరవ్యాప్తంగా కీలక ప్రాంతాల సమీపంలో భద్రతను కట్టుదిట్టం చేశాయి. నివేదికల ప్రకారం, కీలక ప్రాంతాల సమీపంలో అనుమానాస్పద కార్యకలాపాలు, యజమానులు లేని వస్తువులు, పార్క్ చేసి వదిలేసిన వాహనాలపై నిఘాను ముమ్మరం చేయాలని, కట్టుదిట్టమైన పర్యవేక్షణ కొనసాగించాలని పోలీసులను ఆదేశించారు.
ప్రభుత్వ భవనాలు, బస్, రైల్వే స్టేషన్ల వంటి రద్దీ ప్రాంతాలు, రాజకీయ కార్యాలయాల వద్ద భద్రతా సంస్థలు విధ్వంస నిరోధక చర్యలు చేపడుతున్నందున, బాంబు నిర్వీర్య విభాగాలు, అగ్నిమాపక దళం, ర్యాపిడ్ యాక్షన్ ఫోర్సులను అప్రమత్తంగా ఉండాలని ఆదేశించారు. నివేదికల ప్రకారం, తీవ్రవాదులు ఆత్మాహుతి దాడులు, కాల్పులు, సమన్వయ దాడులకు పాల్పడేందుకు ప్రణాళికలు రచిస్తున్నారని భద్రతా సంస్థలకు సమాచారం అందింది.
ఇదిలా ఉండగా, దీన్ దయాళ్ ఉపాధ్యాయ్ మార్గ్లోని బీజేపీ ప్రధాన కార్యాలయం, బిజెపి ఢిల్లీ యూనిట్ కార్యాలయం చుట్టూ కూడా భద్రతను కట్టుదిట్టం చేశారు. గత ఏడాది నవంబరులో ఎర్రకోట సమీపంలో జరిగిన బాంబు పేలుడులో కనీసం 15 మంది మరణించగా, మరో 20 మంది గాయపడ్డారు. ఈ ముఠాలోని సభ్యులలో ఒకరైన డాక్టర్ ఉమర్-ఉన్-నబీ, పేలుడు పదార్థాలతో నిండిన కారును ఎర్రకోట సమీపానికి నడిపి పేల్చివేసినట్లు ఆరోపణలు ఉన్నాయి.
బీజేపీ పాలిత హర్యానాలోని ఫరీదాబాద్లో ఈ దాడికి కొన్ని రోజుల ముందు ఛేదించిన ఒక వైట్ కాలర్ టెర్రర్ ముఠా ఈ దాడిని జరిపింది. డాక్టర్ నబీ కూడా ఈ ముఠాలో భాగమే, కానీ అతని తోటి సభ్యులను జమ్మూ కాశ్మీర్ పోలీసులు పట్టుకున్నప్పుడు అతను తప్పించుకోగలిగాడు. తాజా నిఘా సమాచారం ప్రకారం, ఎర్రకోట దాడి మాదిరిగానే ఉగ్రవాదులు వాహనాల్లో అమర్చే పేలుడు పదార్థాలను కూడా ఉపయోగించే అవకాశం ఉంది.
More Stories
ఖండాంతర బాలిస్టిక్ క్షిపణి ‘అగ్ని ఎంఆర్ఐవి’ విజయవంతంగా ప్రయోగం
ఢిల్లీలో భారీ పేలుళ్లకు ఐఎస్ఐ కుట్ర భగ్నం
ఎట్టకేలకు బెంగాల్లో ‘ది బెంగాల్ ఫైల్స్’ 15న విడుదల