కాళేశ్వరంపై ఘోష్ కమిషన్‌ నివేదికను నిలిపివేసిన హైకోర్టు

మెడిగడ్డ ప్రాజెక్టుపై ఏర్పాటు చేసిన ఘోష్ కమిషన్ విచారణ విధానాన్ని హైకోర్టు తప్పుబట్టడం, న్యాయ సూత్రాలకు విరుద్ధంగా సాగిన ఈ విచారణ చెల్లదని కోర్టు చెప్పడం ధర్మం గెలిచినట్లేనని హరీష్ రావు తెలిపారు. ప్రభుత్వం రాజకీయ కక్షతోనే ఇలాంటి కమిషన్లు వేసిందని ఆయన విమర్శించారు. నివేదిక ఆధారంగా చర్యలు తీసుకోవద్దన్న కోర్టు ఆదేశాలు ప్రభుత్వానికి చెంపపెట్టు అని పేర్కొన్నారు.

మరోవంక, జస్టిస్ పీసీ ఘోష్ కమిషన్‌పై దాఖలైన పిటిషన్లపై హైకోర్టు చేసిన వ్యాఖ్యలు పరిశీలిస్తే, ఈ స్టే రావడానికి ప్రధాన కారణం రాష్ట్రంలో కాంగ్రెస్ ప్రభుత్వం ప్రదర్శించిన నిర్లక్ష్యం, తప్పిదాలేనని స్పష్టమవుతోందని రాష్ట్ర బిజెపి అధ్యక్షుడు ఎన్ రామచందర్ రావు విమర్శించారు.  ఈ పరిణామాలు చూస్తుంటే, కాళేశ్వరం ప్రాజెక్టు నిర్మాణంలో జరిగిన అవినీతి, అక్రమాల విషయంలో అసలు అవినీతిపరులను కాపాడేందుకు కాంగ్రెస్ ప్రభుత్వం ఉద్దేశపూర్వకంగా నిర్లక్ష్యంగా వ్యవహరించినట్లు స్పష్టమవుతోందని ఆయన ఆరోపించారు. హైకోర్టు తీర్పుపై సుప్రీంకోర్టులో అప్పీల్ చేయడం రాష్ట్ర ప్రభుత్వ బాధ్యత అని స్పష్టం చేశారు.