* పాకిస్తాన్ ఇరాన్ ప్రయోజనాలను కాపాడుతోందా?
అమెరికా అధ్యక్షుడు డొనాల్డ్ ట్రంప్ తిరిగి అధికారంలోకి వచ్చినప్పటి నుండి, పాకిస్తాన్, దాని నాయకుల పట్ల, ముఖ్యంగా ఫీల్డ్ మార్షల్ అసిమ్ మునీర్ పట్ల ఆయన ప్రభుత్వానికి అభిమానం బాగా పెరిగింది. ఫిబ్రవరి 28 నుండి ఘర్షణలో ఉన్న అమెరికా-ఇరాన్ల మధ్య చర్చలను సులభతరం చేసిన ఘనతను ట్రంప్ అనేక సందర్భాల్లో మునీర్కు ఇచ్చారు. ఆయనను ఒక ‘అద్భుతమైన’ వ్యక్తిగా, ‘గొప్ప యోధుడు’గా అభివర్ణించారు.
అయితే, మునీర్ వాస్తవానికి అమెరికాకు ఒక భారంగా మారవచ్చని ఒక అమెరికన్ మీడియా నివేదిక ట్రంప్ ప్రభుత్వాన్ని హెచ్చరించింది. ఫాక్స్ న్యూస్ డిజిటల్ నివేదిక ప్రకారం, ఇరాన్తో, ముఖ్యంగా ఇస్లామిక్ రివల్యూషనరీ గార్డ్ కార్ప్స్ (ఐఆర్జీసీ)తో మునీర్కు ఉన్న సాన్నిహిత్యం అమెరికాకు, ట్రంప్ ప్రభుత్వానికి మంచిది కాదని హెచ్చరించింది. హతమైన ఖుద్స్ ఫోర్స్ కమాండర్ ఖాస్సెమ్ సులేమానీతో సహా ఇరాన్ ఉన్నతాధికారులతో మునీర్కు సంబంధాలు ఉన్నాయని, ఈ సంబంధాలే ఇరాన్తో చర్చలను సులభతరం చేయడానికి, వాషింగ్టన్-టెహ్రాన్ల మధ్య తెరవెనుక మధ్యవర్తిగా వ్యవహరించడానికి ఆయనకు సహాయపడ్డాయని ఆ నివేదిక పేర్కొంది.
ట్రంప్ మునీర్ను తన ‘ఇష్టమైన ఫీల్డ్ మార్షల్’ అని కూడా పిలిచారు. కానీ అతని ద్వంద్వ పాత్ర అమెరికా ప్రయోజనాలకు విఘాతం కలిగించవచ్చని ఆ నివేదిక పేర్కొంది. “ట్రంప్ పాకిస్థానీలను నమ్మకూడదు. పాకిస్తాన్ ఆఫ్ఘనిస్తాన్లో మన స్నేహితులుగా నటిస్తూ తాలిబన్కు మద్దతునిస్తూ ఒక నమ్మకద్రోహ ‘మిత్రదేశం’గా ఉంది. ఐఆర్జిసితో మునీర్కు ఉన్న సంబంధాలు ట్రంప్ ప్రభుత్వానికి ఒక పెద్ద ప్రమాద సూచికగా ఉండాలి,” అని ఫౌండేషన్ ఫర్ డిఫెన్స్ ఆఫ్ డెమోక్రసీస్ (ఎఫ్ డి డి)కు చెందిన బిల్ రోగియో ఫాక్స్ న్యూస్ డిజిటల్తో పేర్కొన్నారు.
విశ్లేషకులు, నిపుణులను ఉటంకిస్తూ, ‘నమ్మకద్రోహ మిత్రదేశం’గా పాకిస్తాన్కు ఉన్న చరిత్ర దానిని భద్రతాపరమైన ప్రమాదంగా మార్చగలదని, ముఖ్యంగా అది ఇరాన్తో సన్నిహితంగా పనిచేస్తున్నందున, ఆ నివేదిక మరింతగా హెచ్చరించింది. ఇరాన్ ప్రయోజనాలను కాపాడటానికి లేదా పాకిస్తాన్ను ఒక అనివార్యమైన, కానీ నమ్మశక్యంకాని మధ్యవర్తిగా పాతుకుపోయేలా చేయడానికి మాత్రమే మునీర్ ట్రంప్తో తన సంబంధాన్ని ఉపయోగించుకుంటున్నారని కూడా అది పేర్కొంది.
“ట్రంప్ ఎప్పటినుంచో బలమైన, నిర్ణయాత్మక నాయకులకే ప్రాధాన్యత ఇస్తున్నారు,” అని పాకిస్థానీ విశ్లేషకుడు రజా రూమీ ఫాక్స్ న్యూస్ డిజిటల్తో చెప్పారు. “ఫలితాలను సాధించగల కేంద్రీకృత అధికార వ్యక్తిగా మునీర్ ఆ కోవకే చెందుతారు” అని స్పష్టం చేశారు.
“బహిరంగంగా ఆకర్షణీయంగా కనిపించే సైనిక నాయకుల్లా కాకుండా, ఆయన శైలి బహిరంగ రాజకీయ సంకేతాల కన్నా గూఢచర్య పని, కార్యాచరణ అనుభవంతో రూపుదిద్దుకుని, సాపేక్షంగా నిరాడంబరంగా ఉంటుంది,” అని మునీర్ను “క్రమం, శ్రేణి,వ్యూహాత్మక స్పష్టతకు అధిక ప్రాధాన్యతనిచ్చే, క్రమశిక్షణ కలిగిన, సంస్థలకే ప్రాధాన్యతనిచ్చే నాయకుడు”గా అభివర్ణిస్తూ రూమీ పేర్కొన్నారు.
పాకిస్తాన్లో అత్యంత శక్తివంతమైన సైనిక అధిపతి మునీరా? 1968లో ఒక దిగువ మధ్యతరగతి కుటుంబంలో జన్మించిన మునీర్, 1986లో పాకిస్తాన్ సైన్యంలో చేరారు. ప్రస్తుతం వాషింగ్టన్- టెహ్రాన్ చర్చలకు మధ్యవర్తిత్వం వహించడానికి ఇరాన్లో ఉన్న మునీర్, కల్నల్గా ఉన్నప్పుడు సౌదీ అరేబియాలో కూడా పనిచేశారు. అరబిక్ భాషను నేర్చుకున్నారు.
మిలిటరీ ఇంటెలిజెన్స్, ఇంటర్-సర్వీసెస్ ఇంటెలిజెన్స్ (ఐఎస్ఐ) రెండింటికీ అధిపతిగా పనిచేసిన ఏకైక సైన్యాధిపతి ఆయనే. విశ్లేషకుల ప్రకారం, ఆపరేషన్ సింధూర్ సమయంలో పాకిస్తాన్పై భారతదేశం విజయం సాధించినప్పటికీ, తనను తాను ఫీల్డ్ మార్షల్గా పదోన్నతి కల్పించుకున్న మునీర్, పర్వేజ్ ముషారఫ్ తర్వాత దేశంలో అత్యంత శక్తివంతమైన సైనిక అధిపతి.
ప్రధానమంత్రి షెహబాజ్ షరీఫ్ అమెరికా- ఇరాన్ శాంతి చర్చలలో ప్రముఖ వ్యక్తిగా కనిపించవచ్చు, కానీ పొరపాటు పడకండి, నిర్ణయాలు తీసుకుంటున్నది అసిమ్ మునీరే అని వారు వాదిస్తున్నారు. “పర్వేజ్ ముషారఫ్ తర్వాత ఫీల్డ్ మార్షల్ మునీర్ అత్యంత శక్తివంతమైన పాకిస్తానీ నాయకుడు. సైనిక నియామకాలు, పౌర ప్రభుత్వ నిర్ణయాలు, సైన్యం విస్తారమైన వ్యాపార సామ్రాజ్యంపై ఆయనకు పూర్తి అధికారం ఉంది,” అని లోవీ ఇన్స్టిట్యూట్లోని పరిశోధక ఫెలో చార్లెస్ లయన్స్-జోన్స్ అసోసియేటెడ్ ప్రెస్ (ఎపి)కి తెలిపారు.
More Stories
ప్రముఖ జర్నలిస్ట్, మాజీ ఎంపీ బల్బీర్ పుంజ్ మృతి
మహిళా బిల్లును ఓడించడం ‘భ్రూణహత్య’
హర్మూజ్ జలసంధిలో భారతీయ నౌకలపై ఇరాన్ కాల్పులు