మోదీపై అభ్యంతరకర పోస్టులపై ఎఫ్‌ఐఆర్

ప్రధాని నరేంద్ర మోదీని లక్ష్యంగా చేసుకుని సోషల్ మీడియాలో అభ్యంతరకర, దూషణాత్మక పోస్టులు ప్రచురించారనే ఆరోపణలపై ఢిల్లీ పోలీసులు ఎఫ్‌ఐఆర్ నమోదు చేశారు. రాజ్యాంగ పదవుల్లో ఉన్న వ్యక్తులపై అవమానకరమైన, దురుద్దేశపూర్వకమైన, పరువునష్టం కలిగించే కంటెంట్‌ను వెంటనే తొలగించాలని సోషల్ మీడియా వేదిక ఎక్స్ కు పోలీసులు లేఖ రాశారు.

స్పెషల్ సెల్ ఇంటెలిజెన్స్ ఫ్యూజన్ అండ్ స్ట్రాటజిక్ ఆపరేషన్స్ (ఐఎఫ్ఎస్ఓ) యూనిట్ కూడా ఖాతాదారుల పూర్తి వివరాలను అందించాలని ఎక్స్ ను కోరింది.  అభ్యంతరకర పోస్టులను వెంటనే తొలగించడంతో పాటు వాటిని అప్‌లోడ్ చేసిన ఖాతాల యజమానుల పూర్తి వివరాలను అందించాలని ఎక్స్‌ను ఢిల్లీ పోలీసులు కోరారు. ఆయా వ్యక్తుల పూర్తి పేరు, చిరునామా, ఫోన్ నంబర్, ఈమెయిల్ ఐడీతో పాటు లాగిన్, లాగ్‌అవుట్ వివరాలు, తేదీ, సమయ సమాచారాన్ని కూడా సమర్పించాలని సూచించారు.

దర్యాప్తు, భవిష్యత్తులో జరిగే న్యాయపరమైన విచారణల కోసం సంబంధిత పోస్టులకు సంబంధించిన అన్ని డేటాను భద్రపరచాలని కూడా ఎక్స్‌కు పోలీసులు ఆదేశించారు. అలాగే ఎలక్ట్రానిక్ రికార్డులకు సంబంధించిన భారతీయ సాక్ష్యాధినియమం సెక్షన్ 63(4) ప్రకారం అవసరమైన ధ్రువీకరణ పత్రాన్ని కూడా సమర్పించాలని కోరారు. ఇటీవల ఢిల్లీలోని జంతర్ మంతర్ వద్ద జరిగిన నిరసనల సందర్భంగా ప్రధాని మోదీని లక్ష్యంగా చేసుకుని సోషల్ మీడియాలో అభ్యంతరకర పోస్టులు విస్తృతంగా ప్రచారం అవుతున్నాయనే నివేదికల నేపథ్యంలో ఢిల్లీ పోలీసులు ఈ చర్యలు చేపట్టారు.

నిరసనలు ముగిసిన అనంతరం, అలాగే సంసద్ చలో మార్చ్ సందర్భంగా చోటుచేసుకున్న హింసాత్మక ఘటనల సమయంలో ప్రధాని మోదీపై చేసిన అభ్యంతరకర వ్యాఖ్యలు ఉన్న పోస్టులను తొలగించాలని ఢిల్లీ పోలీసులు పలు సోషల్ మీడియా వేదికలను ఆదేశించారు. ఇంతకుముందు ఇండియన్ ఎక్స్‌ప్రెస్ ప్రచురించిన కథనం ప్రకారం, నిరసనల సమయంలో డీప్‌ఫేక్ వీడియోలు, కృత్రిమ మేధస్సు (ఏఐ)తో రూపొందించిన కంటెంట్‌ను అప్‌లోడ్ చేసినట్లు భావిస్తున్న సుమారు 500 సోషల్ మీడియా ఖాతాలను ఢిల్లీ పోలీసులు గుర్తించారు.

వార్తా సంస్థ పీటీఐ వెల్లడించిన వివరాల ప్రకారం, ఈ కంటెంట్ ప్రజా శాంతి భద్రతలకు భంగం కలిగించే అవకాశముందా అనే కోణంలో కూడా పోలీసులు పరిశీలిస్తున్నారు.ఇం దుకోసం ఢిల్లీ పోలీసుల సోషల్ మీడియా మానిటరింగ్ బృందం వివిధ ఇంటర్నెట్ వేదికలను నిరంతరం పరిశీలిస్తూ అనుమానాస్పద పోస్టులను గుర్తిస్తున్నట్లు అధికారులు తెలిపారు. ఒక సోషల్ మీడియా ప్లాట్‌ఫామ్‌కు పంపిన నోటీసులలో ఒకదానిలో, “ఇటువంటి అభ్యంతరకరమైన, పరువు నష్టం కలిగించే కంటెంట్ వ్యాప్తి ప్రధానమంత్రి ప్రతిష్టకు, గౌరవానికి, ప్రజా ప్రతిబింబానికి తీవ్ర నష్టం కలిగించింది” అని ఢిల్లీ పోలీసులు పేర్కొన్నారు.