కాల్పుల విరమణకు ఇరాన్ విముఖత…యుద్ధ విరమణ జరగాలి!

కాగా, పాకిస్థాన్‌ బలపరుస్తున్న కాల్పుల విరమణ ప్రతిపాదన తమ పరిశీలనలో ఉన్న అనేక ఆలోచనలలో ఒకటని వైట్‌ హౌస్‌ అధికారి ఒకరు సీబీఎస్‌ న్యూస్‌కు తెలిపారు. అయితే అధ్యక్షుడు ట్రంప్‌ దీనికి ఆమోదం తెలపలేదని, ఆపరేషన్‌ ఎపిక్‌ ఫ్యూరీ కొనసాగుతుందని ఆయన చెప్పారు. ఇరాన్‌, అమెరికా మధ్య ఉద్రిక్తతలు తీవ్రమవుతున్న నేపథ్యంలో సమాచార మార్పిడి మార్గాలను తెరచి ఉంచడానికి పాకిస్థాన్‌ తెరవెనుక నుండి మధ్యవర్తిగా వ్యవహరిస్తున్నది. 

పాకిస్థాన్‌తోపాటు ఈజిప్టు, తుర్కియే కూడా ట్రంప్‌ దూత స్టీవ్‌ విట్కాఫ్‌, ఇరాన్‌ విదేశాంగ మంత్రి అబ్బాస్‌ అరాగ్చీ మధ్య ప్రత్యక్ష సందేశాల మార్పిడికి దోహదపడుతున్నాయి. తన కాల్పుల విరమణ ప్రతిపాదనను ఇరాన్‌ తిరస్కరించడంపై తాను చాలా కలత చెందానని ట్రంప్ తెలిపారు. ఒప్పందాన్ని కుదుర్చుకోవడంలో విఫలమైన పక్షంలో ఇరాన్‌ భారీ మూల్యాన్ని చెల్లించుకోవలసి వస్తుందని హెచ్చరిస్తూ  యావత్‌ ఇరాన్‌ మొత్తాన్ని ఒక్క రాత్రిలో నాశనం చేయగలమని, అది కూడా మంగళవారం సాయంత్రమే కావొచ్చని పేర్కొన్నారు. ఇరాన్‌కు విధించిన మంగళవారం గడువులో ఎటువంటి మార్పు ఉండబోదని, అదే ఫైనల్‌ అని ట్రంప్‌ స్పష్టం చేశారు. 

వారు చేయాల్సింది చేస్తే ఇది(యుద్ధం) చాలా త్వరగా ముగిసిపోవచ్చు అని ఇరాన్‌ని ఉద్దేశించి ట్రంప్‌ చెప్పారు.  కాల్పుల విరమణ ఒప్పందాన్ని నిర్దంద్వంగా తిరస్కరించిన ఇరాన్‌ సుప్రీం నేత మొజ్తబా ఖమేనీ అమెరికా, దాని మిత్ర దేశాలపై తీవ్రంగా విరుచుకుపడ్డారు. తమపై రోజురోజుకూ దాడులు తీవ్రమవుతుండడాన్ని ఆయన ప్రస్తావిస్తూ బెదిరింపులు, దాడులు, ఐఆర్‌జీసీ కమాండర్లు లక్ష్యంగా హత్యలు ఇరాన్‌ సైనిక బలగాలను బలహీనపర్చ లేవని స్పష్టం చేశారు. 

ఇరాన్‌ను రాతియుగానికి పంపుతామంటూ ట్రంప్‌ చేసిన హెచ్చరికలపై తీవ్రంగా స్పందించారు. అది అతని నిర్లక్ష్య వైఖరిని చూపుతున్నదని విమర్శించారు. యూఎస్‌, ఇజ్రాయెల్‌ దళాలు పౌరుల మౌలిక సదుపాయాలైన స్కూళ్లు, బ్రిడ్జిలు, పవర్‌ ప్లాంట్లు లక్ష్యంగా దాడులు చేస్తూ తమపై ఒత్తిడి చేస్తున్నా ఇరాన్‌ మిలిటరీ బలం ఏ మాత్రం చెక్కుచెదరలేదని స్పష్టం చేశారు. మానవత్వానికి వ్యతిరేకంగా ఈ రెండు దేశాలు ఘోరమైన నేరాలకు పాల్పడుతున్నాయని మండిపడ్డారు. 

మరోవంక, యుద్ధంలో అమెరికాకు సహకరించని మిత్రదేశాలపై కూడా ట్రంప్ అసంతృప్తి వ్యక్తం చేశారు. జపాన్, ఆస్ట్రేలియా, దక్షిణ కొరియా, నాటో దేశాలు సహాయం చేయలేదని విమర్శించారు. ఉత్తర కొరియా నుంచి రక్షించడానికి జపాన్‌లో 50వేల మందిని, దక్షిణ కొరియాలో 45వేల మంది సైనికులను అమెరికా మోహరించిందని వివరించారు. అయితే సౌదీ అరేబియా, ఖతార్, యూఏఈ, బహ్రెయిన్, కువైట్ దేశాలు సహకరించాయని ప్రశంసించారు.