రోహింగ్యాల వలసలతో అంతర్గత భద్రతకు ప్రమాదం

రాష్ట్రంలో పెరుగుతున్న రోహింగ్యాల ముప్పు పట్ల ఉప ముఖ్యమంత్రి పవన్ కళ్యాణ్ ఆందోళన వ్యక్తం చేశారు. గతంలో పశ్చిమ బెంగాల్ వైపు నుంచి ఆంధ్రప్రదేశ్ లోని పలు ప్రాంతాలకు విపరీతంగా వలస వచ్చిన రోహింగ్యాలు అంతర్గత భద్రతకు ప్రమాదంగా పరిణమించారని తెలిపారు. 

ముఖ్యంగా 2017-18 ప్రాంతాల్లో కోల్ కత నుంచి స్వర్ణకార వృత్తి నిమిత్తం చాలా అధికంగా వీరు రాష్ట్రంలోని వివిధ ప్రాంతాలకు వచ్చార‌ని గన్నవరం విమానాశ్రయంలో జాతీయ మీడియాతో మాట్లాడుతూ తెలిపారు.  రోహింగ్యాల మూలాలు మయన్మార్ లో ఉన్నాయ‌ని చెబుతూ వారి వలసలతో స్థానిక యువత నిరుద్యోగ సమస్య ఎదుర్కొంటోంద‌ని ఆందోళన వ్యక్తం చేశారు. 

తెలంగాణ, ఆంధ్రప్రదేశ్ లో స్థానికులకే ఉద్యోగాలు ఇవ్వాలనేది ప్రధాన డిమాండ్ అని ప‌వ‌న్ తెలిపారు. తెలంగాణ ఏర్పాటులో ఉన్న మూడు ప్రధాన డిమాండ్లలో స్థానికులకే ఉద్యోగాలు అనేది కూడా ప్రధాన నినాదమ‌ని ఆయన గుర్తు చేశారు. రోహింగ్యాలు దేశం దాటి వచ్చి ఇక్కడే స్థిర నివాసం ఏర్పరుచుకునేలా రేషన్, ఆధార్, ఓటరు కార్డులు పొందుతున్నారని, మన యువతకు చెందాల్సిన ఉద్యోగాలు, వ్యాపారాలు వారు చేసుకుంటున్నారని పవన్ విమర్శించారు. రోహింగ్యాలకు స్థిర నివాసం ఏర్పరుచుకోవడంలో మన యంత్రాంగం నిర్లక్ష్యం ఉందని విమర్శించారు.