ఉద్రిక్తలు తగ్గించుకొండి.. భారత్, పాక్ లకు అమెరికా హితవు

ఉగ్రవాదానికి వ్యతిరేకంగా భారత్‌ చేపట్టే ఎలాంటి చర్యలకైనా తమ సహకారం ఉంటుందని జైశంకర్‌ కు రుబియో హామీఇచ్చారు. అదే సమయంలో ఉద్రిక్తతలు తగ్గించుకొని, దక్షిణాసియాలో శాంతిభద్రతలు నెలకొల్పేందుకు ఇరు దేశాలు కలిసి పనిచేయాలని కోరారు. ఇక పాక్‌ ప్రధానితో మాట్లాడిన రుబియో పెహల్‌గామ్‌ ఉగ్రదాడిని ఖండించాల్సిన అవసరాన్ని నొక్కి చెప్పారు. 

ఈ దాడిపై దర్యాప్తునకు పాక్‌ అధికారులు సహకరించాలని పేర్కొన్నారు. ప్రస్తుతం నెలకొన్న ఉద్రిక్తతలను తగ్గించుకునేందుకు భారత్‌తో ప్రత్యక్ష చర్చలు జరపాలని సూచించారు. అయితే, కాశ్మీర్ వివాదం భారత్ – పాకిస్తాన్ ల మధ్య 1000 నుంచి 1500 ఏళ్లుగా కొనసాగుతుందని అధ్యక్షుడు డోనాల్డ్ ట్రంప్ చేసిన వాఖ్యలపై విమర్శలు తలెత్తుతూ ఉండడంతో అమెరికా ఈ సూచనలు చేసినట్లు కనిపిస్తుంది. 

పహల్గామ్ ఉగ్రదాడిలో ప్రాణాలు కోల్పోయిన వారిపట్ల మార్కో రుబియో దిగ్భ్రాంతిని వ్యక్తం చేస్తూ భారత్‌కు ఉగ్రవాదం పై పోరాటంలో అమెరికా మద్దతు ఉంటుంది తెలిపారు. అయితే, ఉగ్రదాడి వెనుకు పాకిస్థాన్ హస్తం ఉందని భావిస్తోన్న భారత్ ప్రతీకార దాడి చేయాలన్న ఆలోచనకు బదులు జాగ్రత్తగా వ్యవహరించాల సూచించారు.  దీనికి జైశంకర్ స్పందిస్తూ “దాడిలో పాత్రధారులు, సూత్రధారులు, మద్దతుదారులు న్యాయస్థానంలో నిలబడాల్సిందే. దోషులు శిక్ష ఎదుర్కోవాల్సిందే” అని ఎక్స్ వేదికగా స్పష్టం చేశారు.