తమిళనాడు బిజెపి కొత్త అధ్యక్షుడిగా తిరునెల్వేలి ఎమ్మెల్యే నైనార్ నాగేంద్రన్ నియమితులవుతారు. శుక్రవారం ఈ పదవికి ఆయన ఒక్కరే నామినేషన్ దాఖలు చేశారు. ప్రస్తుత రాష్ట్ర పార్టీ అధ్యక్షుడు కె. అన్నామలై నాగేంద్ర పేరును ప్రతిపాదించగా, ఇతర పార్టీ నాయకులు దానిని ఆమోదించారు. అధ్యక్షుడిగా ఆయన నియామకం గురించిన అధికారిక ప్రకటన శనివారం ఢిల్లీలోని పార్టీ ప్రధాన కార్యాలయం నుండి వెలువడనుంది.
కేంద్ర హోంమంత్రి అమిత్ షా శుక్రవారం చెన్నై పర్యటన సందర్భంగా బీజేపీకి సీనియర్ నాయకులతో జరిపే చర్చలు తమిళనాడు రాజకీయ చరిత్రలో గణనీయమైన మార్పుకు దారితీయవచ్చని భావిస్తున్నారు. తమిళనాడు బిజెపి అధ్యక్షుడు అన్నామలై తాను ఈ పదవికి పోటీలో పాల్గొనబోనని ఇప్పటికే ప్రకటించారు. గతంలో ఎఐఎడిఎంకెలో ఉన్న నాగేంద్రన్ ప్రస్తుతం రాష్ట్ర పార్టీ ఉపాధ్యక్షునిగా వ్యవహరిస్తున్నారు.
అయితే, 2026 అసెంబ్లీ ఎన్నికలకు బిజెపితో పొత్తు పెట్టుకోవడానికి అఖిల భారత అన్నా ద్రవిడ మున్నేట్ర కజగం (ఎఐఎడిఎంకె) నాయకత్వం ఆయనను రాష్ట్ర అధ్యక్ష పదవి నుండి తొలగించాలని కోరుకుంటున్నట్లు మీడియా నివేదికలు సూచించాయి. ముఖ్యంగా, అమిత్ షా గత నెలలో న్యూఢిల్లీలో జరిగిన ఆకస్మిక సమావేశంలో ఎఐఎడిఎంకె ప్రధాన కార్యదర్శి, తమిళనాడు మాజీ ముఖ్యమంత్రి ఎడప్పాడి కె పళనిస్వామితో చర్చలు జరిపిన తర్వాత రెండు పార్టీల మధ్య పొత్తు ఊహాగానాలు మొదలయ్యాయి.
అన్నామలై, పళనిస్వామి ఇద్దరూ తమిళనాడులోని గౌండర్ వర్గానికి చెందినవారు కాబట్టి, బిజెపి వేరే ప్రాంతం నుండి గౌండర్ కాని వ్యక్తిని ఎంచుకోవాలని భావించినట్లు తెలుస్తున్నది. ఇది కులం, ప్రాంతానికి అతీతంగా పార్టీ దృశ్యమానత, ఆకర్షణను పెంచుతుందని పార్టీ భావిస్తోంది.
1990లలో ద్రవిడ పార్టీలతో వరుసగా పొత్తు పెట్టుకోవడం ద్వారా తమిళనాడులో పట్టు సాధించడానికి ప్రయత్నించిన బిజెపి చెప్పుకోదగిన సీట్లు పొందలేకపోయింది లేదా తన ఉనికిని చాటుకోలేకపోయింది. 2021లో రాష్ట్ర అధ్యక్షునిగా బాధ్యతలు స్వీకరించిన అన్నామలై, క్రమంగా తమిళనాడులో బిజెపికి దృఢమైన, యువ ముఖంగా మారారు.
2024 లోక్‌సభ ఎన్నికల్లో ఎఐఎడిఎంకె, బిజెపి విడివిడిగా పోరాడాయి. ఈ ఎన్నికల్లో అన్నాడీఎంకే, డీఎండీకే, పుతియా తమిళగం (పీటీ)లతో కలిసి పోటీ చేయగా, బీజేపీ తొలిసారిగా మరో కూటమికి నాయకత్వం వహించింది. అన్నాడీఎంకే కూటమికి 23 శాతం కంటే ఎక్కువ ఓట్లు వచ్చినా ఒక సీటు కూడా గెల్చుకోలేక పోయింది.
టీటీవీ దినకరన్ నేతృత్వంలోని అమ్మ మక్కల్ మున్నేట్ర కజగం (ఏఎంఎంకే), జీకే వాసన్ తమిళ మానిల కాంగ్రెస్ (మూపనార్) వంటి మిత్రపక్షాలతో కలిసి బీజేపీ ఎన్నికలలో అద్భుతంగా రాణించి 18 శాతం కంటే ఎక్కువ ఓట్లు సంపాదించింది కానీ ఖాతా తెరవలేకపోయింది.
పుతియా నీది కట్చి (పీఎన్‌కే), తమిజ్హగా మక్కల్ మున్నేట్ర కజగం (టీఎంఎంకే), ఇంతియా మక్కల్ కల్వి మున్నేట్ర కజగం (ఐఎంకేఎంకే), ఇంధియా జననాయక కచి (ఐజేకే) వంటి అనేక చిన్న సంస్థలు బీజేపీ చిహ్నం కమలంపై పోటీ చేశాయి. తమిళనాడులో బీజేపీ సొంతంగా తొలిసారిగా 11 శాతం కంటే ఎక్కువ ఓట్లను సాధించింది. అయితే, ఈ ఓట్ల విభజన కారణంగా డీఎంకే నేతృత్వంలోని కూటమి రాష్ట్రంలోని 39 స్థానాలను గెలుచుకుంది.
2024 ఎన్నికల్లో అన్నాడీఎంకే, బీజేపీ కూటములు కలిసి పోటీ చేసి ఉంటే, అరణి, చిదంబరం, కోయంబత్తూర్, కడలూరు, ధర్మపురి, కళ్లకురిచ్చి, కృష్ణగిరి, నామక్కల్, సేలం, తెన్కాసి, తిరుప్పూర్, విలుప్పురం, విరుధునగర్ సహా కనీసం 13 లోక్‌సభ స్థానాలను గెలుచుకునేవారని ఇండియా టీవీ డిజిటల్ విశ్లేషణ వెల్లడించింది.
2021 తమిళనాడు అసెంబ్లీ ఎన్నికల్లో, బీజేపీ, అన్నాడీఎంకేతో పొత్తు పెట్టుకుని 2.6 శాతం ఓట్లను సాధించి, 4 స్థానాలను గెలుచుకుంది. తద్వారా రాష్ట్ర అసెంబ్లీలోకి లాంఛనంగా ప్రవేశించింది. 2022 పట్టణ స్థానిక సంస్థల ఎన్నికల్లో, బీజేపీ తమిళనాడులో తన ఉనికిని పెంచుకుంటున్నట్లు ప్రతిబింబిస్తూ, మున్సిపల్ కార్పొరేషన్లలో 11 వార్డులతో సహా 308 వార్డులను గెలుచుకుంది.
డీఎంకేతో పాటు ఎఐఎడిఎంకె పై కూడా అన్నామలై ప్రదర్శించిన దూకుడు వైఖరి సాంప్రదాయ మిత్ర పక్షాలతో, ముఖ్యంగా ఏఐఏడీఎంకేతో ఉద్రిక్తతలకు దారితీసింది. దీని ఫలితంగా 2023 చివరలో అన్నామలై జయలలిత, ఎంజిఆర్ వంటి నాయకుల గురించి చేసిన వ్యాఖ్యల కారణంగా బిజెపితో పొత్తు తెగిపోయింది.
“2026లో కూటమి ఆకారం, రూపం, ఎన్డీఏ స్వభావం దృష్ట్యా, మా నాయకత్వం తగిన సమయంలో నిర్ణయం తీసుకుంటుంది” అని అన్నామలై రెండు వారాల క్రితం చెప్పారు. 2019 (లోక్‌సభ), 2021 (అసెంబ్లీ) ఎన్నికల్లో డిఎంకె సాధించిన ఘన విజయం తమిళనాడులో దానిని ఆధిపత్య శక్తిగా మార్చింది; ఇది ప్రతిపక్ష పార్టీలు కలిసి పనిచేయడానికి ఉత్ప్రేరకంగా పనిచేస్తుంది. బిజెపి నేతృత్వంలోని కేంద్రాన్ని డిఎంకె అనేక అంశాలలో బహిరంగంగా విమర్శిస్తోంది.
More Stories
పహల్గాం ఉగ్రదాడిలో హమాస్‌ హస్తం?
కాశ్మీర్‌ లోయలో ఐదుగురు ఉగ్రవాదుల ఇళ్ల పేల్చివేత
ఏపీ పట్టణాల్లో స్లీపర్‌సెల్స్‌ పై పోలీసుల డేగకన్ను