సైబర్ క్రైమ్ పోలీసులను ఆశ్రయించిన నటి నిధి అగర్వాల్

ప్రముఖ కథానాయిక నిధి అగర్వాల్ హైదరాబాద్లోని సైబర్ క్రైమ్ పోలీసులను ఆశ్రయించింది. ఓ గుర్తు తెలియని వ్యక్తి తనను సోషల్ మీడియాలో వేధిస్తున్నాడని పోలీసులకు ఫిర్యాదు చేసింది. ఓ వ్యక్తి తనను, తన కుటుంబాన్ని చంపుతానని బెదిరిస్తున్నాడని తెలిపింది. అసభ్యకర మెసేజ్లతో తన ఇన్స్టా అకౌంట్కి పదేపదే ట్యాగ్ చేస్తున్నాడని సైబర్ క్రైమ్ పోలీసులకు ఫిర్యాదు చేసింది.

ఆ వ్యక్తి బెదిరింపుల వల్ల తాను, తన కుటుంబం మానసికంగా ఒత్తిడికి లోనవుతున్నామని సైబర్ క్రైమ్ పోలీసులకు ఇచ్చిన ఫిర్యాదులో నిధి అగర్వాల్ పేర్కొంది. నిందితుడిని గుర్తించి, చట్టపరమైన చర్యలు తీసుకోవాలని నిధి అగర్వాల్ పోలీసులను కోరింది. ఈ మేరకు స్పందించిన పోలీసులు నిధి అగర్వాల్ ఫిర్యాదుపై కేసు నమోదు చేసి దర్యాప్తు చేస్తున్నారు.

ప్రస్తుతం హీరోయిన్ నిధి అగర్వాల్ ఇద్దరు అగ్ర హీరోల సినిమాల్లో నటిస్తూ బిజీగా ఉన్నారు. పవన్‌ సరసన ‘హరిహర వీరమల్లు’లో, ప్రభాస్‌ ‘రాజా సాబ్‌’లోనూ నటిస్తున్నారు.