అమెరికా అధ్యక్షుడుగా ట్రంప్ అధికారంలోకి రానున్న వేళ భారత ఎగుమతిదారులు అధిక కస్టమ్స్‌ సుంకాలను ఎదుర్కొనే పరిస్థితులు వుండవచ్చని నిపుణులు పేర్కొంటున్నారు. అమెరికా ఫస్ట్‌ ఎజెండాను అనుసరించాలని కొత్త ప్రభుత్వం భావించినట్లైతే ఆటోమొబైల్స్‌, జౌళి, ఫార్మాస్యూటికల్స్‌ వంటి రంగాల ఉత్పత్తులకు అధిక సుంకాల బెడద తప్పదని వాణిజ్య నిపుణులు భావిస్తున్నారు.
అలాగే హెచ్‌-1బి వీసా నిబంధనలను కూడా ట్రంప్ కట్టుదిట్టం వేస్తారని భావిస్తున్నారు. దీనివల్ల భారత ఐటి సంస్థలకు వ్యయం, అభివృద్ధి వంటి అంశాలు ప్రభావితమవుతాయని పేర్కొంటున్నారు. భారతీయ ఐటి ఎగుమతుల ఆదాయాల్లో 80 శాతానికి పైగా అమెరికా నుండే వస్తోంది. వీసా నిబంధనల్లో మార్పులు వస్తే ముందుగా ప్రభావితమయ్యేది ఈ కంపెనీలే.
భారత్‌కు అమెరికా అతిపెద్ద వాణిజ్య భాగస్వామిగా వుంది. వార్షిక వాణిజ్యం 19వేల కోట్ల డాలర్లు పైమాటే. చైనాకే కాకుండా, భారత్‌, ఇతర దేశాలకు కూడా టారిఫ్‌లను ట్రంప్ పెంచవచ్చని భావిస్తున్నట్లు గ్లోబల్‌ ట్రేడ్‌ రీసెర్చ్‌ ఇనీషియేటివ్‌ (జిటిఆర్‌ఐ) వ్యవస్థాపకుడు అజరు శ్రీవాస్తవ వ్యాఖ్యానించారు. 2020లో భారత్‌ను పెద్ద మొత్తంలో టారిఫ్‌లను దుర్వినియోగం చేసే దేశంగా విమర్శించిన ట్రంప్ టారిఫ్‌ కింగ్‌గా భారత్‌ను అభివర్ణించారు.
ఈ వ్యాఖ్యలు చూస్తుంటే రెండో పదవీ కాలంలో ట్రంప్ కఠినమైన చర్యలు తీసుకునే అవకాశం వుందని భావిస్తున్నారు. ట్రంప్ అనుసరించాలనుకుంటున్న అమెరికా ఫస్ట్‌ ఎజెండాతో రక్షణాత్మక చర్యలు ఎక్కువవుతాయని అంచనా వేస్తున్నారు. అయితే చైనా పట్ల అమెరికా కఠిన వైఖరి అనుసరించే అవకాశాలు వుండడం వల్ల భారత ఎగుమతిదారులకు కొత్త అవకాశాలు కూడా లభ్యమవుతాయని ఆశిస్తున్నారు.
ట్రంప్ అధికారంలోకి వచ్చిన వెంటనే మేక్‌ అమెరికా గ్రేట్‌ అగైన్‌ (ఎంఎజిఎ) హ్యాష్‌ ట్యాగ్‌ వైరల్‌ అవడంతో వివిధ రంగాల్లో ట్రంప్ టారిఫ్‌లను పెంచుతారని కూడా భావించాల్సి వస్తోందని అంతర్జాతీయ వాణిజ్య నిపుణుడు విశ్వజిత్‌ ధర్‌ చెప్పారు. ట్రంప్ అధికారంలోకి రావడంతో రక్షణవాదానికి సంబంధించి భిన్నమైన శకం లోకి ప్రవేశిస్తున్నామన్నారు.
More Stories
ఆర్‌బిఐ కొత్త గవర్నర్ గా సంజయ్ మల్హోత్రా
కొత్తగా వంద ఎయిర్‌బస్‌ విమానాలకు ఆర్డర్‌
నోయిడా విమానాశ్రయం రన్‌వేపై తొలి విమానం