రఘురామకృష్ణరాజుకు సీఐడీ కస్టడీలో చిత్రహింసలు నిజమే!

సునీల్ కుమార్ సమక్షంలోనే రఘురామ రాజుపై థర్డ్ డిగ్రీ ప్రయోగించారని విచారణలో సిబ్బంది వివరించారు. దీంతో ఈ కేసులో అప్పటి సీఐడీ ఛీఫ్ పీవీ సునీల్ కుమార్ పాత్రపై కచ్చితమైన ఆధారాలు దొరికినట్లయింది.  నిజాలు బయటపడడంతో గూగుల్ టేక్ఔట్ ద్వారా సునీల్ కుమార్ కదలికలను పోలీసులు గుర్తించారు. సీఐడీ చీఫ్‌గా ఉన్న సమయంలో సునీల్ కుమార్ కాల్ డేటాపై కూడా పోలీసులు కన్నేశారు.

ఇక నాడు సీఐడీ విచారణ అధికారిగా ఉన్న విజయ్ పాల్‌ మెడకు కూడా ఉచ్చుబిగుస్తోంది. రిటైర్మెంట్ ముందు ఆయనకు ఏఎస్పీగా పదవోన్నతి కల్పించడం, రిటైర్మెంట్ తర్వాత ఓఎస్డీగా నియమించడం చేశారు. ముందస్తు బెయిల్ కోసం హైకోర్టును ఆశ్రయించినా ప్రయోజనం లేకపోయింది.

రఘురామ ఒంటిపై గాయాలు ఉన్నాయని జీజీహెచ్ వైద్యులు వాంగ్మూలం ఇచ్చారు. అయితే అప్పటి జీజీహెచ్ సూపరిండెంట్ ప్రభావతిపై ప్రభుత్వ పెద్దలు ఒత్తిడి చేశారు. దీంతో ఆమె తప్పుడు నివేదికను కోర్టుకు సమర్పించారు. నిజాలు బయపడుతుండడంతో దర్యాప్తు ఓ కొలిక్కి వచ్చినట్లు కనిపిస్తోంది. విజయ్ పాల్ కోసం పోలీసులు విస్తృతంగా గాలిస్తున్నారు. ఈ కేసుతో సంబంధం గల సీనియర్ అధికారులే రక్షణ కల్పిస్తున్నట్లు భావిస్తున్నారు.