పిల్లల పోర్న్ వీడియోలుడౌన్ లోడ్ చేయడం, చూడడం నేరమే

చైల్డ్ పోర్నోగ్రఫీ, దాని న్యాయపరమైన పర్యవసానాలపై ధర్మాసనం కొన్ని మార్గదర్శకాలను జారీ చేసింది. పోర్నోగ్రఫీ పరిభాషను మార్చాలని కేంద్రానికి సూచించింది. చైల్డ్​ పోర్నోగ్రఫీ అనే పదానికి బదులుగా “చైల్డ్​ సెక్సువల్లీ అబ్యూసివ్ అండ్ ఎక్స్​ప్లాయిటేటివ్ మెటీరియల్”తో సవరించాల్సిన అంశాన్ని పార్లమెంట్ పరిగణించాలని సూచించింది. సుప్రీంకోర్టు ప్రధాన న్యాయమూర్తి జస్టిస్‌ డీవై చంద్రచూడ్‌, జస్టిస్‌ జేబీ పార్దివాలా, జస్టిస్‌ మనోజ్ మిశ్రాతో కూడిన త్రిసభ్య ధర్మాసనం సోమవారం ఈ మేరకు కీలక తీర్పు వెలువరించింది.

ఈ కేసులో మద్రాసు హైకోర్టు గతంలో ఓ వ్యక్తిపై నిలిపివేసిన క్రిమినల్​ ప్రోసీడింగ్స్​ను పునరుద్ధరించింది సుప్రీం కోర్టు. సెషన్స్​ కోర్టు ఈ కేసు విచారణను కొత్తగా చేపడుతుందని చెప్పింది. ఈ విషయంలో హైకోర్టు తీర్పు చట్టాలకు విరుద్ధమని ఇద్దరు పిటిషనర్ల తరఫున వాదనలు వినిపించిన సీనియర్ న్యాయవాది హెచ్​ఎస్​ ఫూల్కా చేసిన సమర్పణలను సుప్రీం పరిగణలోకి తీసుకుంది. 

కాగా, ఫరీదాబాద్‌లోని ‘జస్ట్ రైట్స్ ఫర్ చిల్డ్రన్ అలయన్స్’, న్యూడిల్లీకి చెందిన ‘బచ్‌పన్ బచావో ఆందోళన్’ అనే స్వచ్ఛంద సంస్థ తరపున హెచ్​ఎస్​ ఫూల్కా హాజరయ్యారు. ఈ రెండు సంస్థలు బాలల సంక్షేమం కోసం పనిచేస్తున్నాయి.

చైల్డ్ పోర్నోగ్రఫీ నేరం కాదని ఈ ఏడాది జనవరి 11న మద్రాస్ హైకోర్టు తీర్పు ఇచ్చింది. చైల్డ్‌ పోర్న్‌ వీడియోలు డౌన్‌లోడ్ చేసి చూసిన 28 ఏళ్ల వ్యక్తిపై క్రిమినల్‌ చర్యలను నిలిపివేసింది. పోర్నోగ్రఫీ చూస్తూ పిల్లలు సమస్యలు ఎదుర్కొంటున్నారని తెలిపిన మద్రాస్ హైకోర్టు, ఈ అంశంలో శిక్షలు విధించడం కంటే సమాజాన్ని చైతన్యవంతం చేయాలని సూచించింది. 

నిందితుడు కేవలం మెటీరియల్​ను(చైల్డ్​ పోర్నోగ్రఫీ) డౌన్​లోడ్​ చేసి, గోప్యంగా చూశారని, అది ఇతరులకు ప్రసారం చేయడం లేదా తిరిగి ప్రచురించలేదని జస్టిస్ ఎన్​ ఆనంద్​ తీర్పు సమయంలో పేర్కొన్నారు. అతడు అశ్లీల ప్రయోజనాల కోసం బాలల​ను ఉపయోగించలేదు కాబట్టి, ఇది నిందితుడి నైతిక పతనంగా పరిగణించాలని చెప్పారు. దీనితో మద్రాస్ హైకోర్టు తీర్పును సవాల్ చేస్తూ దాఖలైన పిటిషన్లపై విచారణ జరిపిన సుప్రీంకోర్టు చైల్డ్‌ పోర్నోగ్రఫీ నేరమేనని స్పష్టం చేస్తూ తీర్పు వెలువరించింది.