రెండు రోజుల్లో ముఖ్యమంత్రిగా కేజ్రీవాల్ రాజీనామా

“దేశ ప్రజాస్వామ్యాన్ని పరిరక్షించాలనే ఉద్దేశంతోనే నేను రాజీనామా చేయలేదు. వాళ్లు ఎక్కడ ఓడినా సీఎంను జైలుకు పంపి ప్రభుత్వాన్ని ఏర్పాటు చేయాలని కొత్త ఫార్ములాను రూపొందిస్తున్నారు. కర్ణాటక సీఎం మీద కేసు వేశారు. కేరళ సీఎం, పశ్చిమ్​ బెంగాల్​ సీఎం మీద కూడా కేసు వేశారు. తప్పుడు ఆరోపణలతో జైలుకు పంపితే రాజీనామాలు చేయొద్దని బీజేపీయేతర ముఖ్యమంత్రులకు విజ్ఞప్తి చేస్తున్నా,” అని కేజ్రీవాల్​ సూచించారు.

అదే సమయంలో బిజెపిపై కేజ్రీవాల్ ​ తీవ్రస్థాయిలో మండిపడ్డారు. బ్రిటీషర్ల కన్నా ప్రధానమంత్రి నరేంద్ర మోదీ ప్రభుత్వమే నియంతృత్వ పాలనను కొనసాగిస్తోందని విమర్శించారు. బీజేపీ తమ పార్టీని విచ్ఛిన్నం చేసి ప్రభుత్వాన్ని ఏర్పాటు చేయాలనుకుంటోందని ఆరోపించారు. తన ఆత్మస్థైర్యాన్ని దెబ్బతీయాలని కూడా చూసిందని, కానీ బీజేపీ నేతలు విఫలమయ్యారని ఆయన తేల్చి చెప్పారు.

“పార్టీని విచ్ఛిన్నం చేయాలని, కేజ్రీవాల్ ధైర్యాన్ని, మనోధైర్యాన్ని దెబ్బతీయాలని అనుకున్నారు. పార్టీలను విచ్ఛిన్నం చేయడం, ఎమ్మెల్యేలను విచ్ఛిన్నం చేయడం, నాయకులను జైలుకు పంపడం వంటి ఫార్ములాను రూపొందించారు. కేజ్రీవాల్​ను జైలుకు పంపడం ద్వారా ఢిల్లీలో ప్రభుత్వాన్ని ఏర్పాటు చేస్తారని భావించారు. కానీ వారు మా పార్టీని విచ్ఛిన్నం చేయలేకపోయారు. పార్టీ కార్యకర్తల నుంచి కూడా వేరు చేయలేకపోయారు,” అని ఢిల్లీ సీఎం చెప్పుకొచ్చారు.