కాంగ్రెస్ పాలనలో వేలాది రైతుల ఆత్మహత్యలు

కాంగ్రెస్ పాలనలో వేలాది రైతుల ఆత్మహత్యలు

దేశానికి స్వాతంత్య్రం వచ్చిన తర్వాత 50 ఏండ్లకు పైగా కాంగ్రెస్ పాలించిందని, వారి పాలనలో దేశంలో వేలాది మంది రైతులు ఆత్మహత్య చేసుకున్నారని మల్కాజిగిరి ఎంపీ ఈటల రాజేందర్ విమర్శించారు. పార్లమెంట్ సమావేశాల్లో సోమవారం ఆయన  తొలిసారిగా మాట్లాడుతూ 2014 వరకు వ్యవసాయం కోసం కాంగ్రెస్ చేసిందేమీ లేదని మండిపడ్డారు. 

స్వామినాథన్ కమిషన్ ఇచ్చిన రిపోర్టును అప్పటి కాంగ్రెస్ ప్రభుత్వం అమలుచేయలేదని ధ్వజమెత్తారు. మోదీ ప్రధాని అయ్యాక 2014-.15లో రూ.1360 ఉన్న కనీస మద్దతు ధరను రూ.2320కు పెంచారని ఈటల తెలిపారు. ప్రతిపక్ష నేతలు వ్యవసాయం, నిరుద్యోగం, సోషల్ జస్టిస్ అంటూ అనేక మాటలు చెప్పారని ఎద్దేవా చేశారు. 

సోషల్ జస్టిస్ గురించి కాంగ్రెస్ పార్టీ మాట్లాడటం విడ్డూరంగా ఉందని దుయ్యబట్టారు.  సహజసిద్ధమైన వ్యవసాయం ద్వారా దిగుబడి తగ్గవచ్చని, కానీ కేన్సర్, కిడ్నీ సంబంధిత వ్యాధులు రాకుండా ఉంటాయని మోదీ సర్కార్ ఈ ఆలోచన చేస్తోందని చెప్పారు. తెలంగాణలో స్వాతంత్య్రం వచ్చినప్పటి నుంచి ఇప్పటివరకు దళితుడు, గిరిజనుడు, ఓబీసీ కానీ ముఖ్యమంత్రి అయింది లేదని గుర్తు చేశారు. 

2014, 2019లలో కాంగ్రెస్‌కు పార్లమెంట్‌లో ప్రతిపక్ష గౌరవం కూడా దక్కలేదని ఈటల చురకలంటించారు. అప్పుడు రాహుల్ గాంధీ ప్రతిపక్ష నేతగా కూడా లేరని, ఈసారి ప్రతిపక్ష హోదా రాగానే రాహుల్ ప్రతిపక్ష నేతగా ఎన్నుకోబడ్డారని రాజేందర్ వివరించారు. కేంద్ర బడ్జెట్ లో నిరుద్యోగుల కోసం ఆలోచన చేసి శిక్షణ కోసం నిధులు కేటాయించడాన్ని స్వాగతిస్తున్నట్లు చెప్పారు. 

తాను మాజీ ఆర్థికమంత్రినని, కాంగ్రెస్ నేతలు ఈ బడ్జెట్ ప్రజల బడ్జెట్ కాదని, పనికొచ్చే బడ్జెట్ కాదని విమర్శలు చేస్తున్నారని మండిపడ్డారు. వారు చేస్తున్న ఆరోపణలన్నీ నిరాధారమైనవని ఈటల కొట్టిపారేశారు.