గేమింగ్‌ జోన్‌లో అగ్నిప్రమాదంలో 27 మంది సజీవ దహనం

మంటల్లో చిక్కుకున్న కొందరిని కాపాడారు పోలీసులు. వేసవి సెలవుల కారణంగా గేమ్​జోన్​లో ఘటనా సమయంలో చాలా మంది పిల్లలు ఉన్నారు. “పిల్లలతో సహా 16 మంది మరణించారు. రెస్క్యూ ఆపరేషన్ జరుగుతోంది. మృతుల సంఖ్య పెరిగే అవకాశం ఉంది” అని రాజ్‌కోట్ పోలీస్ ఇన్‌స్పెక్టర్ ధవల్ హరిపరా తెలిపారు. ప్రమాదానికి గల కారణాలు ఇంకా తెలియరాలేదని చెప్పారు.

ఈ ఘటన పట్ల ప్రధాని నరేంద్ర మోదీ దిగ్బ్రాంతి వ్యక్తం చేశారు. ముఖ్యమంత్రితో మాట్లాడి వెంటనే సహాయ చర్యలు చేపట్టాలని ఆదేశించారు. ఈ ఘటనపై గుజరాత్‌ ముఖ్యమంత్రి భూపేంద్ర పటేల్‌ సహాయక చర్యలు ముమ్మరం చేయాలని ఆదేశించారు. క్షతగాత్రులకు మెరుగైన వైద్యం అందేలా చూడాలని అధికారులకు దిశానిర్దేశం చేశారు. మృతుల కుటుంబాలకు రూ 4 లక్షల సహాయం ప్రకటించారు. గాయపడిన వారికి రూ 50,000 చొప్పున ఆర్థిక సాయం ప్రకటించారు.

రాజ్‌కోట్‌ మున్సిపల్‌ కార్పొరేషన్‌ అధికారులంతా తక్షణమే ఘటనా స్థలికి చేరుకొని ఎలాంటి ఇబ్బందులు తలెత్తకుండా చూడాలని సీఎం ఎక్స్‌లో పోస్టు చేశారు. పూర్తిస్థాయిలో దర్యాప్తు జరిపిన తర్వాత ప్రమాదానికి గల కారణాలు వెల్లడిస్తామని రాజ్‌కోట్‌ పోలీస్‌ కమిషనర్‌ రాజు భార్గవ్‌ తెలిపారు. సహాయక చర్యలు ఇంకా కొనసాగుతున్నాయని చెప్పారు.