తెలంగాణలో ‘గాడిద గుడ్డు’ పాలన

100 రోజుల్లో 5 గ్యారంటీలు అమలు చేశామంటూ, దావోస్ నుంచి రూ. 40 వేల 232 కోట్ల పెట్టుబడులు తీసుకొచ్చారంటూ, హోంగార్డులు, జర్నలిస్టులకు రూ. 5 లక్షల బీమా కల్పించినట్లు మెట్రో పిల్లర్లపై హోర్డింగులతో అబద్ధపు ప్రచారం చేస్తున్నారని బిజెపి నేత మండిపడ్డారు.  రీజినల్ రింగురోడ్డును సైతం కాంగ్రెస్ ఖాతాలో వేసుకున్నారని చెబుతూ రీజినల్ రింగురోడ్డుకు కర్త,కర్మ,క్రియ బిజెపినే అని స్పష్టం చేశారు.

పంటల బీమా పథకం పునరుద్ధరణ అంటూ అబద్ధాలు చెప్తోందని చెప్పారు. 800 మెగావాట్ల రామగుండం ఎన్టీపీసీ రెండో యూనిట్ ను నరేంద్ర మోదీ ప్రభుత్వం ప్రారంభిస్తే కాంగ్రెస్ తన ఖాతాలో వేసుకుని ప్రచారం చేసుకుంటోందని తెలిపారు.
రూ.58000 కోట్లతో మూసీ అభివృద్ధి అన్నరు… నిధులు విడుదల చేసింది లేదని చెప్పారు.

గ్యారెంటీలలో మరొకటి మహిళలకు కేవలం 500 రూపాయలకే గ్యాస్ సిలిండర్ అందిస్తామన్నారని పేర్కొంటూ ఎంతమందికి ఇచ్చారు..?  అని కిషన్ రెడ్డి ప్రశ్నించారు. కాంగ్రెస్ ప్రభుత్వానికి నిజంగా చిత్తశుద్ధి ఉంటే రూ.500 కే సిలిండర్ అర్హులందరికీ ఇవ్వాలని డిమాండ్ చేశారు. ఈ విషయంలోనూ అందరికి కాదు.. కొందరికే అంటూ కండిషన్లు పెట్టిందని దుయ్యబట్టారు.

ప్రగతి భవన్ కంచెలు కూల్చి ప్రజా భవన్ ఏర్పాటు చేస్తామని గొప్పలు చెప్పారు. కంచెలు కూల్చారు తప్పితే ప్రజావాణిలో వచ్చిన దరఖాస్తులను తీసుకొని సమస్యలు పరిష్కరించిందిలేదని కిషన్ రెడ్డి విమర్శించారు.  ప్రజావాణి దరఖాస్తులు తీసుకుని ట్రంకుపెట్టెలో పెట్టారు… మరికొన్ని చోట్ల ప్రజావాణి దరఖాస్తులు చెత్తకుప్పల్లో దర్శనమిచ్చాయి. ప్రజావాణికి ముఖ్యమంత్రి హాజరైంది లేదని విమర్శించారు.