రామ మందిరంలో పూజలందుకోనున్న ‘రామ్ లల్లా’ విగ్రహం ఇదే

మైసూరుకు చెందిన శిల్పి అరుణ్ యోగిరాజ్ చెక్కిన శ్రీరాముడి విగ్రహాన్ని అయోధ్యలోని అద్భుతమైన శ్రీరామ మందిరంలో ప్రతిష్టించడానికి ఎంపిక చేశారని, ఇది రాష్ట్రంలోని మొత్తం రామ భక్తుల గర్వాన్ని, ఆనందాన్ని రెట్టింపు చేసిందని కర్నాటకకు చెందిన బీజేపీ నేత యెడియూరప్ప ట్వీట్ చేశారు.  ‘శిల్ప @yogiraj_arun’కు హృదయపూర్వక అభినందనలు” అని తెలిపారు. అరుణ్ యోగిరాజ్ రూపొందించిన విగ్రహాలను జనవరి 22న ప్రధాని మోదీ సమక్షంలో అయోధ్య రామ మందిర గర్భాలయంలో ప్రతిష్టించనున్నారు.

క‌ర్నాట‌క‌లోని మైసూరుకు చెందిన ఈ శిల్పి చెక్కిన అయిదేళ్ల బాల‌రాముడి విగ్ర‌హాన్ని అయోధ్య‌లో ప్ర‌తిష్టించ‌నున్నారు. జ‌న‌వ‌రి 22వ తేదీన అయోధ్య‌లో ఆ విగ్ర‌హానికి ప్రాణ ప్ర‌తిష్ట చేయ‌నున్నారు. మ‌ధ్యాహ్నం 12.20 నిమిషాల‌కు ఆ కార్య‌క్ర‌మాన్ని నిర్వ‌హిస్తారు. కాగా, తాను చెక్కిన విగ్రహాన్ని అంగీకరించారా లేదా అనే దానిపై తనకు ఇంకా ఎలాంటి అధికారిక సమాచారం అందలేదని అరుణ్ తెలిపారు. “ఆ విగ్రహం దేవుని అవతారపు ప్రతిమ కాబట్టి ఆ విగ్రహం కూడా ఒక పిల్లవాడిదిగా ఉండాలి. విగ్రహాన్ని చూసిన ప్రజలు దైవత్వాన్ని అనుభూతి చెందాలి” అని చెప్పారు. 

”చిన్నారిలాంటి ముఖంతో పాటు దైవత్వ కోణాన్ని దృష్టిలో ఉంచుకుని ఆరేడు నెలల క్రితం నా పని ప్రారంభించాను. ఇప్పుడు చాలా సంతోషంగా ఉన్నాను. ఎంపిక కంటే ప్రజలు నా సృజనను మెచ్చుకోవాలి. అప్పుడే నేను సంతోషంగా ఉంటాను” అని శిల్పి అరుణ్ యోగి రాజ్ పేర్కొన్నారు. ప్రస్తుతం దేశంలో అత్యంత డిమాండ్ ఉన్న శిల్పుల్లో ఒకరైన అరుణ్ యోగిరాజ్ చిన్న వయసులోనే శిల్ప ప్రపంచంలోకి తన ప్రయాణాన్ని ప్రారంభించాడు. అతని తండ్రి యోగిరాజ్ , తాత బసవన్న శిల్పి ప్రఖ్యాత శిల్పులు.