జీడీపీలో రెండో స్థానానికి ఉత్తర ప్రదేశ్

మరో నాలుగేళ్లలో లక్ష కోట్ల డాలర్ల ఆర్థిక వ్యవస్థగా ఉత్తర ప్రదేశ్‌ను తీర్చిదిద్దాలనే లక్ష్యంతో ఆ రాష్ట్ర సీఎం యోగి ఆదిత్యనాథ్ ముందుకెళ్తున్నారు. ఈ లక్ష్య సాధన దిశగా కీలక ముందడుగు పడింది. దేశంలో రెండో అతిపెద్ద ఆర్థిక వ్యవస్థ ఉత్తర ప్రదేశ్ అవతరించింది. దేశ జీడీపీ వాటాలో మహారాష్ట్ర తర్వాతి స్థానంలో యూపీ నిలిచింది.

భారతదేశ జీడీపీలో మహారాష్ట్ర వాటా 15.7 శాతం ఉండగా, యూపీ వాటా 9.2 శాతం ఉంది. ఇప్పటి వరకూ రెండో స్థానంలో తమిళనాడు (9.1 శాతం) ఉండగ, ఆ స్థానాన్ని ఉత్తరప్రదేశ్ ఆక్రమించిందని ఓ నివేదిక వెల్లడించింది. మన దేశ జీడీపీలో గుజరాత్ వాటా 8.2 శాతం ఉండగా, పశ్చిమ బెంగాల్ వాటా 7.5 శాతం ఉంది. కర్ణాటక (6.2 శాతం), రాజస్థాన్ (5.5 శాతం), ఆంధ్రప్రదేశ్ (4.9 శాతం) మధ్యప్రదేశ్ (4.6 శాతం) తర్వాతి స్థానాల్లో ఉన్నాయి. అయితే అధికారికంగా ఇప్పటికీ తమిళనాడే రెండో స్థానంలో ఉంది.

యోగి ఆదిత్యనాథ్ నాయకత్వంలో ఉత్తర ప్రదేశ్ గత ఏడేళ్లుగా అన్ని రంగాల్లో గణనీయమైన పురోగతి సాధిస్తుంది. ఒకప్పుడు బిమారీ రాష్ట్రాల్లో ఒకటిగా ఉన్న యూపీ ఇప్పుడు వేగంగా ముందుకెళ్తుంది. యోగి ముఖ్యమంత్రి అయ్యాక యూపీలో నేరాలు గణనీయంగా తగ్గాయి. పారిశ్రామిక రంగ పురోగతి ఊపందుకుంది.