* ప్రస్తుతం భారత్ లో ఈ నిబంధన వర్తించదు
మైక్రో-బ్లాగింగ్ ప్లాట్‌ఫారమ్ ట్విట్టర్‌ని ప్రస్తుతం X అని పిలుస్తున్నారు. ఎలన్ మస్క్ ఈ కంపెనీని చేజిక్కుంచుకున్నప్పటి నుంచి కంపెనీ లోగో నుంచి సిబ్బంది విషయంలో ఎన్నో మార్పులు చేశారు. ఎప్పటికప్పుడు కొత్త కొత్త నిబంధనలను పెడుతూ యూజర్లకు సైతం ట్విస్టులిస్తున్నాడు. ఇంతకుముందు ట్వి్ట్టర్ ఆమోదం పొందిన ఖాతాలు లేదా బ్లూ టిక్ కోసం నిర్దిష్ట సభ్యత్వాలను ప్రవేశపెట్టింది.
ఇప్పుడు ఎవరైనా కొత్తగా ట్విట్టర్ అకౌంట్ తెరవాలంటే డబ్బులు చెల్లించాల్సిందే. అంతేకాదు ఏదైనా కొత్తగా పోస్ట్ చేయాలంటే కూడా ముందుగా 1 డాలర్ చెల్లించాలి. ఈ నిబంధనను ముందుగా న్యూజిలాండ్, ఫిలిప్పీన్స్ లో ప్రయోగాత్మకంగా పరీక్షించనున్నారు. స్పామ్, ఆటోమేటెడ్ బాట్ అకౌంట్లను తగ్గించాలనే ఉద్దేశ్యంతో ఈ కొత్త రూల్ తీసుకొచ్చినట్లు ట్విట్టర్ కంపెనీ ప్రకటించింది.
ట్విట్టర్ కంపెనీలోని కొత్త ప్రోగ్రామ్ పేరు ‘నాట్ ఎ బాట్’. అంటే బాట్ యూజర్లను కట్టడి చేయడానికి కంపెనీ చర్యలు తీసుకోవాలని నిర్ణయించుకుంది. ప్రాథమికంగా, ఇటీవలి కాలంలో బాట్ లేదా రోబోట్ యూజర్ల పెరుగుదలతో కంపెనీ కొన్ని సమస్యలను ఎదుర్కొంటోంది. గత ఏడాది ఎలన్ మస్క్ ట్విట్టర్‌ను కొనుగోలు చేసేటప్పుడు బాట్ యూజర్ ప్రమాణీకరణ కోసం డిమాండ్ పెంచారు.
బాట్ యూజర్లను కట్టడి చేసేందుకే కంపెనీ కొత్త ఖాతాను ఓపెన్ చేసే యూజర్ల కోసం X కంపెనీ ఈ నియమాన్ని ప్రవేశపెట్టింది. ఈ ప్రోగ్రామ్ ద్వారా అన్ని నకిలీ అకౌంట్లు, స్పామ్ అకౌంట్లను గుర్తించొచ్చు. దీని వల్ల ఈ ప్లాట్‌ఫారమ్ విశ్వసనీయతను పెంచుతుంది. ‘నాట్ ఎ బాట్’ అనేది సబ్‌స్క్రిప్షన్ ఆధారిత మోడల్. ప్రస్తుతానికి ఇది కొత్త యూజర్లకు మాత్రమే. కాబట్టి ఈ ఛార్జీలను పాత యూజర్లు చెల్లించాల్సిన అవసరం లేదు.
కొత్తగా అకౌంట్ ఓపెన్ చేసే వారు మాత్రమే ఈ ఛార్జీలు చెల్లించాల్సి ఉంటుంది. వెబ్ వర్షన్లో ఇతరుల పోస్టులను రీ పోస్ట్ చేయడం, లైక్ కొట్టడం, బుక్ మార్క్ చేయడం ఇతరుల అకౌంట్లను మెన్షన్ చేయడం వంటి బేసిక్ ఫీచర్లు తీసుకోవాలనుకునే వారు మాత్రమే ఈ ఛార్జీలను చెల్లించాల్సి ఉంటుంది. కేవలం ఖాతా తెరిచి పోస్టులను చదవడం, ఫోటోలు, వీడియోలు చూడటానికి మాత్రం ఎలాంటి ఛార్జీలు చెల్లించాల్సిన అవసరం లేదు. ప్రస్తుతానికి దీన్ని కొత్త యూజర్లకు మాత్రమే పరిమితం చేస్తున్నట్లు కంపెనీ తెలిపింది. అయితే దీనికి సంబంధించిన ఛార్జీలు ఒక్కో దేశంలో ఒక్కో విధంగా ఉండే అవకాశాలున్నాయి.
ఈ నేపథ్యంలో కంపెనీ అధినేత ఎలన్ మస్క్ మాట్లాడుతూ ‘ఈ కార్యక్రమం వల్ల బాట్లను పూర్తిగా ఆపలేం. కానీ ప్లాట్ ఫారమ్‌ను మార్చడం 1000 రెట్లు కష్టమవుతుంది. యూజర్లు Xలో సైన్ అప్ చేసినప్పుడు, వారి మొబైల్ నెంబర్ ఆమోదం పొందుతుంది. ఆ తర్వాతే ఒక డాలర్‌తో వార్షిక ప్రణాళిక సెలెక్ట్ చేసుకోమనే ఆప్షన్ కనిపిస్తుంది’ అని తెలిపారు.
ఈ సబ్‌స్క్రిప్షన్ తీసుకోని వారు ప్లాట్ ఫారమ్‌లో పోస్టు చేయడానికి అవకాశం ఉండదు. అయితే ఈ రూల్ భారత యూజర్లకు ఇంకా రాలేదు. కాబట్టి భారతదేశంలో Xలో కొత్తగా అకౌంట్ ఓపెన్ చేసే ఎలాంటి ఛార్జీలు చెల్లించాల్సిన అవసరం లేదు. ఉచితంగానే ట్విట్టర్ యాప్‌ను వాడొచ్చు.
More Stories
హైదరాబాద్ కేంద్ర పాలిత ప్రాంతం అంటూ కేటీఆర్ కొత్త అస్త్రం
రేజర్వేషన్లపై అమిత్ షా `నకిలీ వీడియో’పై ఎఫ్ఐఆర్
20 రోజులు కూడా సమావేశం కాని తెలుగు రాష్ట్రాల అసెంబ్లీలు