మోదీ ఇంటి పేరు వివాదానికి సంబంధించిన కేసు వ్యవహారంలో రాహుల్ గాంధీకి మరో గట్టి ఎదురుదెబ్బ తగిలింది! పరువు నష్టం కేసులో తనకు వ్యతిరేకంగా వచ్చిన తీర్పుపై స్టే విధించాలని కాంగ్రెస్ సీనియర్ నేత చేసుకున్న అభ్యర్థనను గుజరాత్ హైకోర్టు తాజాగా తిరస్కరించింది. ఫలితంగా రాహుల్ గాంధీపై పడిన అనర్హత వేటు కొనసాగనుంది.
అయితే గాంధీకి విధించిన రెండేళ్ల శిక్షపై ఇప్పటికే స్టే ఉండటంతో ఆయన జైలుకు వెళ్లరు. 2019లో మోదీ ఇంటిపేరుపై రాహుల్ గాంధీ చేసిన వ్యాఖ్యలు వివాదాస్పదమయ్యాయి. ఆయనకి వ్యతిరేకంగా సూరత్ కోర్టులో ఓ పిటిషన్ దాఖలైంది. ఈ ఏడాది మార్చ్లో ఈ వ్యవహారంపై సంచలన తీర్పును వెలువరించింది సూరత్ కోర్టు.
రాహుల్ గాంధీని దోషిగా తేల్చుతూ రెండేళ్ల జైలు శిక్ష విధించింది. ఎవరైనా ఎంపీగా ఉంటూ, కేసులో దోషిగా తేలితే వారిపై అనర్హత వేటు పడుతుంది. కాంగ్రెస్ సీనియర్ నేతకు కూడా ఇదే జరిగింది. ఆయన తన వయనాడ్ సీటును కోల్పోయారు. మరోవైపు కొన్ని రోజుల తర్వాత సూరత్ కోర్టు తీర్పును వ్యతిరేకిస్తూ గుజరాత్ హైకోర్టులో పిటిషన్ దాఖలు చేశారు రాహుల్ గాంధీ.
మే నెలలో విచారణ చేపట్టిన హైకోర్టు రెండేళ్ల జైలు శిక్షపై స్టే విధించింది. కానీ అనర్హత వేటు విషయంలో ఉపశమనాన్ని కల్పించేందుకు నిరాకరించింది. తమ తీర్పును వేసవి సెలవుల తర్వాత ప్రకటిస్తామని స్పష్టం చేసింది. చివరికి తాజాగా ఈ వ్యవహారంపై తీర్పును వెలువరించింది గుజరాత్ హైకోర్టు.
“రాహుల్ గాంధీపై 10కిపైగా క్రిమినల్ కేసులు ఉన్నాయి. ప్రస్తుతం దోషిగా తేలిన కేసు తర్వాత కూడా పలు కేసులు దాఖలయ్యాయి. వీర్ సావర్కర్ మనవడు కూడా కేసు వేశారు. ఏదిఏమైనా.. మోదీ ఇంటి పేరు వివాదంలో పడిన శిక్షతో రాహుల్ గాంధీకి అన్యాయం జరిగింది అనడానికి ఏం లేదు! ఈ తీర్పు సరైనదే. సూరత్ కోర్టు ఆదేశాలపై జోక్యం చేసుకోవాల్సిన అవసరం లేదు. అందుకే ఆయన పిటిషన్ను తిరస్కరిస్తున్నాము,” అని గుజరాత్ హైకోర్టు తీర్పునిచ్చింది.
గుజరాత్ హైకోర్టు సింగిల్ బెంచ్ ఇచ్చిన తీర్పుపై రాహుల్ గాంధీ ఇప్పుడు డివిజన్ బెంచ్ కు అప్పీలు చేసుకునే అవకాశం ఉంది. అక్కడా కుదరకపోతే సుప్రీంకోర్టును ఆశ్రయించే అవకాశాలున్నాయి. వచ్చేఏడాది సార్వత్రిక ఎన్నికలకు సిద్ధమవుతున్న తరుణంలో రాహుల్ గాంధీకి ఈ కేసు సమస్యగా మారింది. ఈ కేసులో కోర్టులు రాహుల్ జైలుశిక్షను సమర్ధిస్తే జైలు జీవితం కూడా గడపక తప్పదు.
More Stories
వయనాడ్లో ఓటమి భయంతో రాయ్బరేలి బరిలో
రాజ్యాంగం మారుస్తామని కాంగ్రెస్ అసత్య ప్రచారం
రాయ్బరేలీ కాంగ్రెస్ అభ్యర్థిగా రాహుల్ గాంధీ