హైదరాబాద్ లో చిచ్చు రేపిన హిజాబ్.. హోమ్ మంత్రి అనుచిత వాఖ్యలు!

హైదరాబాద్‌లోనూ హిజాబ్ వివాదం చిచ్చురేపింది. ఈ ఘటనపై స్పందించిన హోంమంత్రి మహమూద్ అలీ మహిళల వస్త్రధారణపై చేసిన వివాదాస్పద వ్యాఖ్యలు ఆజ్యంపోశాయి. కేవీ రంగారెడ్డి మహిళా డిగ్రీ కళాశాల విద్యార్థినులు హిజాబ్ ధరించి పరీక్షకు రావడంపై కాలేజీ యాజమాన్యం అభ్యంతరం తెలిపింది. హిజాబ్ తీసేస్తేనే పరీక్షకు అనుమతిస్తామని చెప్పడంతో వారంతా హిజాబ్ తొలగించి పరీక్ష రాశారు.

దీనిపై స్పందించిన మహమూద్ అలీ మహిళలు తమకు నచ్చిన బట్టలు వేసుకోవచ్చని చెప్పారు. కానీ యూరోపియన్ల తరహాలో పొట్టి దుస్తులు వేసుకోవద్దని సూచించారు.  అలా కురుచ దుస్తులు వేసుకునే మహిళలు ఇబ్బందుల పాలవుతారని, నిండుగా బట్టలు వేసుకుంటే చాలా సౌకర్యవంతంగా ఉండొచని హితవు చెప్పారు. ముస్లింలైతే హిజాబ్, హిందూ మహిళలు కొంగు ధరించవచ్చని సూచించారు.

ఇలాంటి వస్త్రధారణతో మహిళలపై మరింత గౌరవం పెరుగుతుందని వ్యాఖ్యనించారు. హిజాబ్ ధరించి పరీక్షకు వచ్చిన వారిని అనుమతించకపోవడంపై తాను కాలేజీ సిబ్బందితో మాట్లాడుతానని చెప్పారు. ఆ కాలేజీపై తప్పక చర్యలు తీసుకుంటామని హోంమంత్రి మహమూద్ అలీ హామీ ఇచ్చారు.