స్వలింగ వివాహాలపై కేంద్ర ప్రభుత్వం మరోసారి తన వైఖరిని సుప్రీంకోర్టుకు స్పష్టం చేసింది. స్వలింగ వివాహాలు వివాహ వ్యవస్థకే వ్యతిరేకమని అభిప్రాయపడిన కేంద్రం ప్రజల ప్రయోజనాలను ఇవి ప్రభావితం చేస్తాయని పేర్కొంది. స్వలింగ వివాహాలకు చట్టబద్ధత కల్పించడానికి తాము అనుకూలం కాదని కేంద్రం వెల్లడించింది.
ఈ వివాహాలను గుర్తించే కోర్టు ఉత్తర్వులను కోర్టు ఆమోదించకుండా ఉండాలని కోరింది. స్వలింగ వివాహాలకు గుర్తింపు కల్పించకపోవడం వివక్ష కాదని ప్రభుత్వం వాదించింది. సంప్రదాయబద్దమైన, విశ్వ ఆమోదం పొందిన పెళ్లి లాంటి సంబంధాలు అన్ని మతాల్లోనూ ఉన్నాయని పేర్కొంది. హిందూ చట్టాల్లోనే కాకుండా ఇస్లాం సైతం స్వలింగ వివాహాలను విభేధిస్తుందని కేంద్రం తెలిపింది.
స్త్రీ, పురుషుల మధ్య మాత్రమే వివాహం చెల్లుబాటు అవుతుందని వెల్లడించింది. స్వలింగ వివాహాలు సమాజంలో కొత్త సమస్యను సృష్టిస్తాయని కేంద్రం ఆందోళన వ్యక్తం చేసింది . స్వలింగ వివాహాలను చట్టబద్ధం చేయాలనేది కేవలం పట్టణ ప్రాంత ఉన్నత వర్గాల అభిప్రాయమన్న కేంద్రం దీన్ని పార్లమెంట్ పరిగణనలోకి తీసుకోవాలని సూచించింది.
స్వలింగ వివాహాలకు చట్టబద్ధత కల్పించడం న్యాయస్థానాల వల్ల కుదరదని, కేవలం చట్ట సభల ద్వారా మాత్రమే సాధ్యమవుతుందని వెల్లడించింది. ఇందుకుగానూ గ్రామీణ, సెమీ రూరల్, పట్టణ జనాభా అభిప్రాయాలను పార్లమెంటు పరిగణనలోకి తీసుకోవాల్సి ఉంటుందంది. కేవలం సామాజిక ఆమోదం కోసమే ఈ పిటీషన్లు దాఖలు చేశారని సుప్రీం కోర్టులో కేంద్రం వాదించింది.
స్వలింగ వివాహాల చట్టబద్ధతపై ప్రధాన న్యాయమూర్తి జస్టిస్ డీవై చంద్రచూడ్ నేతృత్వంలోని ఐదుగురు న్యాయమూర్తుల రాజ్యాంగ ధర్మాసనం మంగళవారం కూడా విచారణ కొనసాగించనుంది. ఈ అంశం కొత్త సామాజిక సంస్థను సృష్టించడానికి అవసరమైన స్వభావం గల అంశాలను న్యాయపరమైన తీర్పు ప్రక్రియలో భాగంగా పరిష్కరించవచ్చా అనే క్లిష్టమైన సమస్యలను లేవనెత్తుతుంది’ అని అది వాదించింది.
హక్కులను మరింతగా సృష్టించడం, సంబంధాలను గుర్తించడం, అలాంటి సంబంధాలకు చట్టబద్ధత కల్పించడం చట్టసభల ద్వారా మాత్రమే సాధ్యమవుతుందని, న్యాయవ్యవస్థ ద్వారా కాదని కేంద్రం సూచించింది. ‘ఇది రాజ్యాంగంలో ఏడో షెడ్యూల్‌లోని మూడో జాబితాలో ఎంట్రీ 5 కింద పూర్తిగా శాసన విధానానికి సంబంధించిన విషయం.. ఇది తగిన శాసనసభ ద్వారా మాత్రమే నిర్ణయించబడాలి’ అని కేంద్రం చెప్పింది.
‘కొత్త సామాజిక సంస్థను సృష్టించడం లేదా గుర్తించడం పూర్తిగా ప్రాథమిక హక్కు /ఎంపికకు సంబంధించిన అంశంగా చెప్పలేం’ అని పేర్కొంది. న్యాయపరమైన తీర్పు ద్వారా వ్యక్తిగత స్వయంప్రతిపత్తి హక్కు స్వలింగ వివాహాన్ని గుర్తించే హక్కును కలిగి ఉండదని కేంద్రం తెలిపింది.
More Stories
దక్షణాదిన భారీ వర్షాలు.. ఉత్తరాదిన వడగాల్పులు
4 దశలలో మొత్తం 66.95 శాతం పోలింగ్
కోవాగ్జిన్ తీసుకున్న 30 శాతం మందిలో ఆరోగ్య స‌మ‌స్య‌లు