భారతీయ విద్యార్థుల డిగ్రీలు ఆస్ట్రేలియాలో చెల్లుబాటు

భారతీయ విద్యార్థులకు వినూత్నమైన విద్యను అందించేందుకు ప్రయత్నం చేస్తామని అల్బనీస్‌ భరోసా ఇచ్చారు. దీని ద్వారా వాణిజ్య అవకాశాలకు మార్గం సుగమం చేసినట్లు అవుతుందని అల్బనీస్‌ తెలిపారు. రెండు దేశాల్లోని విద్యాసంస్థలు భాగస్వాములు కావడానికి దోహదం చేస్తుందని పేర్కొన్నారు. ఇది భారత్‌తో చేసుకున్న సమగ్రమైన, ప్రతిష్టాత్మకమైన మెకానిజంగా ఆయన అభివర్ణించారు.

ఈ ఒప్పందంతో విద్యార్థులకు ఎన్నో ప్రయోజనాలు చేకూరుతాయని, భవిష్యత్తు తరాలకు అపారమైన అవకాశాలు లభిస్తాయని ఆయన తెలిపారు. ఉన్నత విద్యా అవకాశాలు పెరగడంతో పాటు యువతలో నైపుణ్యం పెంచేందుకు ఈ ఒప్పందం ఉపయోగపడుతుందని నిపుణులు అంచనా వేస్తున్నారు.

 కాగా, భారత్ తమ దేశానికి సన్నిహిత మిత్రుడిగా అల్బనీస్‌ అభివర్ణించారు. రెండు దేశాల మధ్య విద్యారంగంతో పాటు రక్షణ, ఆర్థిక, సాంకేతిక రంగాల్లో కలిసి పనిచేసేందుకు సిద్ధంగా ఉన్నట్లు ఆస్ట్రేలియా ప్రధాని కార్యాలయం ఓ ప్రకటనలో తెలిపింది. రెండు దేశాల మధ్య వివిధ అంశాలకు సంబంధించి 11 అంశాల్లో అవగాహన ఒప్పందాలు జరిగినట్లు సమాచారం.