ప్రధాని మోదీపై బీబీసీ డాక్యుమెంటరీ నిషేధం

 ప్రధాని మోదీపై బీబీసీ రూపొందించిన డాక్యుమెంటరీని షేర్ చేయకుండా బ్లాక్ చేయాలని సోషల్ మీడియా ప్లాట్ ఫామ్స్ ట్విటర్, యూట్యూబ్ లను కేంద్ర ప్రభుత్వం ఆదేశించింది. ఆ డాక్యుమెంటరీ దేశ ప్రయోజనాలకు విఘాతం కలిగించే విధంగా, దేశ ప్రతిష్టను దిగజార్చే విధంగా ఉందని, అందువల్ల ఆ డాక్యుమెంటరీని షేర్ చేయడాన్ని బ్లాక్ చేయాలని స్పష్టం చేసింది.

ప్రభుత్వ ఆదేశాల నేపథ్యంలో బీబీసీ రూపొందించిన ఆ డాక్యుమెంటరీని షేర్ చేయడాన్ని ట్విటర్, యూట్యూబ్ లు నిషేధించాయి. ఆ డాక్యుమెంటరీ షేర్ కాకుండా బ్లాక్ చేశాయి. ఇప్పటికే పబ్లిష్ అయిన వీడియోలను కూడా యూట్యూబ్  డిలీట్ చేసింది. అలాగే, ఆ డాక్యుమెంటరీ ని లింక్ చేసిన 50 కి పైగా ట్వీట్లను ట్విటర్ డిలీట్ చేసింది.

ప్రధాని మోదీని, భారత ప్రభుత్వాన్ని అప్రతిష్టపాలు చేసే ప్రచార చిత్రంలా ఆ బీబీసీ డాక్యుమెంటరీ ఉందని భారత విదేశాంగ శాఖ ప్రకటించింది. బ్రిటిష్ వలసవాద మనస్తత్వం అందులో స్పష్టంగా కనిపిస్తోందని పేర్కొంది.

ఆ డాక్యుమెంటరీని కేంద్ర విదేశాంగ, సమాచార ప్రసార, హోం శాఖ సీనియర్లు చూసి, అది భారత దేశ ఔన్నత్యాన్ని, సుప్రీంకోర్టు విశ్వసనీయతను దెబ్బతీసేలా ఉందని నిర్ణయానికి వచ్చారు. దేశ సార్వభౌమత్వాన్ని, ఐక్యతను తక్కువ చేసే ప్రయత్నమని వారు విమర్శించారు. ఐటీ రూల్స్ ప్రకారం ఆ డాక్యుమెంటరీని షేర్ చేయకుండా బ్లాక్ చేయాలని సోషల్ మీడియా ప్లాట్ ఫామ్స్ ను ఆదేశించారు.