ఢిల్లీ మద్యం కుంభకోణంలో అనూహ్యంగా హైదరాబాదీ సైంటిస్ట్ ప్రవీణ్ కుమార్ గొరకవి పేరు కొత్తగా తెరపైకి వచ్చింది. నిధులు మళ్లింపుపై ఈడీ తాజాగా దాఖలు చేసిన ఛార్జిషీటు ద్వారా కీలక అంశాలు బయటకు వచ్చాయి. దుబాయ్ కంపెనీతో పాటు ఫై కంపెనీకి నిధులు మళ్లించినట్లు ఛార్జిషీట్‌లో పేర్కొంది
ఫై అనే కంపెనీకి ప్రవీణ్ గొరకవి వ్యవస్థాపకుడిగా ఉన్నాడు. కుంభకోణంలోని నిధులను హవాలా రూపంలో ఫై కంపెనీకి మళ్లించినట్లు ఈడీ అభియోగాలు నమోదు చేసింది.
గతంలో ప్రవీణ్ గొరకవి ఇంటిపై ఈడీ దాడులు చేపట్టగా.. ఈ దాడుల్లో రూ.24 లక్షల నగదు స్వాధీనం చేసుకుంది. హైదరాబాద్‌కు చెందిన సీఏ బుచ్చిబాబుకు సన్నిహితుడిగా ప్రవీణ్ గొరకవి ఉన్నట్లు ఈడీ గుర్తించింది. దీంతో ఢిల్లీ లిక్కర్ స్కాంలో ప్రవీణ్ పాత్రపై ఈడీ లోతుగా దర్యాప్తు చేపడుతోంది. దర్యాప్తులో మరిన్ని వివరాలు బయటకు వచ్చే అవకాశాలు కనిపిస్తున్నాయి.
చిన్న వయస్సులోనే బాలమేధావిగా ప్రవీణ్ గొరకవి పేరు తెచ్చుకున్నాడు. అనేక ఆవిష్కరణలు చేసిన చిన్న వయస్సులోనే గుర్తింపు పొందాడు. చిన్న వయస్సుల్లో ఉన్నప్పుడు మాజీ రాష్ట్రపతి దివంగత అబ్ధుల్ కలాం నుంచి అవార్డు కూడా ప్రవీణ్ గొరకవి అందుకున్నాడు.
తాజాగా ఢిల్లీ లిక్కర్ స్కాంలో ఈడీ కోర్టుకు సమర్పించిన ఛార్జిషీట్‌లో ప్రవీణ్ పేరు ఉండటంతో.. అతడిని త్వరలో ఈడీ విచారించే అవకాశముందని ప్రచారం జరుగుతోంది. హైదరాబాద్‌కు చెందిన సీఏ బుచ్చిబాబుతో ఉన్న సంబంధమేంటి..? డబ్బులు హవాలా రూపంలో మళ్లించడం వెనుక ఎవరెవరి పాత్ర ఉంది? అనే విషయాలను ఈడీ ఆరా తీయనుంది.
ప్రవీణ్ ఆర్ధిక లావాదేవీలను ఈడీ పరిశీలించే అవకాశముందని తెలుస్తోంది. ఇప్పటికే ఢిల్లీ లిక్కర్ స్కాం కేసులో అనేక మంది ప్రముఖ వ్యాపారవేత్తలు, రాజకీయ నాయకులు చిక్కుకున్నారు. తెలుగు రాష్ట్రాల్లో అధికార పార్టీలకు చెందిన నేతలు, రాజకీయ నేతలతో సంబంధాలు కలిగి ఉన్న వ్యాపారవేత్తలపై ఈడీ అభియోగాలు నమోదు చేసింది.
హైదరాబాద్‌కు చెందిన బోేయినపల్లి అభిషేక్‌ రావును గతంలో సీబీఐ అరెస్ట్ చేసింది. తెలంగాణ సీఎం కేసీఆర్ కూమార్తె, ఎమ్మెల్సీ కల్వకుంట్ల కవితను ఈ కేసులో ఇప్పటికే సీబీఐ నోటీసులు జారీ చేసి ప్రశ్నించింది. అమిత్ అరోరా రిమాండ్ రిపోర్టులో కూడా కవిత పేరును చేర్చారు. దీంతో ఈ కేసులోని ప్రతి అప్డేట్ తెలుగు రాష్ట్రాల్లో కూడా చర్చనీయాంశంగా మారింది. ఏపీలో అధికార వైసీపీకి చెందిన పలువురు నేతలు, సన్నిహితులు ఢిల్లీ లిక్కర్ స్కాం కేసులో చిక్కుకున్నారు.
More Stories
పనిమనిషి దగ్గర దొరికిన డబ్బుతో ఝార్ఖండ్ మంత్రి అరెస్ట్
స్పామ్‌ కాల్స్‌ నియంత్రణకు త్వరలోనే కొత్త మార్గదర్శకాలు
వడ్డీ రేట్లను భారీగా పెంచిన స్టేట్ బ్యాంకు