దేశంలో‌ త్వరలో దళిత హైందవ ఉద్యమం

దేశంలో‌ దళిత హైందవ ఉద్యమం త్వరలో ప్రారంభం అవుతుందని శ్రీ భువనేశ్వరీ పీఠం అధిపతి కమలానంద భారతి స్వామి తెలిపారు. ఆది ఆంధ్ర సమ్మేళనం 105  సంవత్సరాలు అయిన సందర్భంగా ఆదివారం విజయవాడలో తాళ్లూరి విష్ణువు అధ్యక్షతన సామాజిక సమరసత వేదిక ఆధ్వర్యంలో జరిగిన సామాజిక సమరసత సమ్మేళనంలో పాల్గొంటూ  సమాజంలో అంటరానితనం, అస్పృశ్యత ను పూర్తిగా విడనాడాలని పిలుపిచ్చారు.

సమాజాన్ని చదవాలి… అధ్యయనం చేయాలి.. కాలికి బలపం కట్టుకుని వీధి, వాడా తిరగాలని అప్పుడే సమాజంలోని స్థితిగతులు అర్థమవుతాయని, అసమానతలను ఏ విధంగా నిర్మూలించాలకో అవగతమవుతుందని తెలిపారు. కుల సమస్యలు పోవాలంటే, ముందు మన ఇంట్లో స్థితిని గమనించి, మన ఇంటి నుంచే అటువంటి చర్యలకు పూనుకొవాలని సూచించారు.

 నిజానికి కుల వ్యవస్థ గొప్పది. దీని వెనుక సైన్స్‌ ఉన్నది. కానీ, అసమానతలు ఈ వ్యవస్థను ఛిన్నాభిన్నం చేస్తున్నాయని ఆయన విచారం వ్యక్తం చేశారు. హిందువు అంటే.. ముందు దళితుడేనని ఈ సందర్భంగా స్పష్టం చేశారు. అయితే, ఇప్పుడిప్పుడే సమాజంలో మార్పులు వస్తున్నాయని పేర్కొన్నారు. కుల వృత్తులను, కులాలను కించపరిస్తే దేశానికి అరిష్టమని హెచ్చరించారు.

కుల,మత‌ వైషమ్యాలు లేకుండా ఎంతోమంది కలిసి కార్యక్రమాలు చేస్తున్నారని చెబుతూ దళిత సమాజం హైందవ సంస్కృతి ని అవలంబిస్తోందని కొనియాడారు. తాను కూడా చిన్న తనంలో అస్పృశ్యత ను అనుభవించానని, అయితే  ఆర్.యస్.యస్ ప్రచార కర్తగా కులాలకు అతీతంగా కలిసి పని చేశామని వివరించారు.

వర్ణం, వర్గం కాదు… మనమంతా మానవులం అనేది గుర్తించాలని స్వామిజి హితవు చెప్పారు.  ఆది ఆంధ్రులు అని సగర్వంగా చెప్పుకున్న వాళ్లు మాదిగలని చెబుతూ  ఎంతోమంది దళితులు స్వయం ప్రేరణతో కట్టుకున్న ఆలయాలే ఎక్కువ అని తెలిపారు. యేర్పేడు వ్యాసాశ్రమంలో అన్ని వర్గాల వారికి వేదాంతం నేర్పారని గుర్తు చేశారు.