బిహార్‌లోని గోపాల్ గంజ్, మొకామశాసన సభ నియోజకవర్గాలకు జరిగిన ఉప ఎన్నికలలో బీజేపీ, ఆర్జెడి చెరొక సీటు  గెలుచుకున్నాయి.   గోపాల్ గంజ్ నుంచి బీజేపీ అభ్యర్థి కుసుమ్ దేవి విజయం సాధించగా, మొకామాలో ఆర్జేడీ అభ్యర్థి నీలం దేవి గెలిచారు. జేడీయూ-బీజేపీ కూటమి విచ్ఛిన్నమైన తర్వాత జరిగిన ఈ ఎన్నికల్లో బీజేపీకి మిశ్రమ ఫలితాలు కనిపించాయి.

బీజేపీ ఎమ్మెల్యే సుభాశ్ సింగ్ మరణించడంతో గోపాల్‌గంజ్ స్థానానికి ఉప ఎన్నిక జరిగింది. ఆయన సతీమణి కుసుమ్ దేవి పోటీ చేసి, విజయం సాధించారు.  ఆర్జేడీ అభ్యర్థి మోహన్ ప్రసాద్ గుప్తాపై కుసుమ్ దేవి సుమారు 1,800 ఓట్ల ఆధిక్యంతో గెలిచారు.

మొకామా శాసన సభ నియోజకవర్గానికి జరిగిన ఉప ఎన్నికల్లో మాజీ ఎమ్మెల్యే అనంత్ కుమార్ సింగ్ సతీమణి నీలం దేవి విజయం సాధించారు. అనంత్ కుమార్ సింగ్‌పై ఎన్నికల కమిషన్ అనర్హత వేటు వేయడంతో ఈ ఉప ఎన్నిక జరిగింది. నీలం దేవి తన సమీప ప్రత్యర్థి, బీజేపీ అభ్యర్థి సోనం దేవిపై దాదాపు 16,000 ఓట్ల ఆధిక్యంతో గెలిచారు.

అనంత్ కుమార్ సింగ్ నివాసం నుంచి ఆయుధాలు, పేలుడు పదార్థాలను స్వాధీనం చేసుకోవడంతో ఆయనపై నమోదైన కేసులో ఆయన దోషి అని పాట్నా కోర్టు తీర్పు చెప్పింది. అనంతరం ఎన్నికల కమిషన్ ఆయన ప్రజాప్రతినిధిగా కొనసాగడంపైనా, ఎన్నికల్లో పోటీ చేయడంపైనా అనర్హత వేటు వేసింది.