అస్సాం సీఎం శర్మపై హైదరాబాద్ లో టీఆర్ఎస్ కార్యకర్త దాడి యత్నం

అసోం ముఖ్యమంత్రి హిమంత బిశ్వశర్మ గణేష్  శోభాయాత్ర సందర్భంగా ఎంజే  మార్కెట్ వద్ద  పాల్గొన్న బహిరంగసభలో ఆయనపై ఓ టిఆర్ఎస్ కార్యకర్త నంద కిషోర్ వ్యాస్ దాడికి ప్రయత్నించడంతో ఉద్రిక్తత నెలకొంది.  గణేశ్​ ఉత్సవాల విశిష్టతను భక్తులకు భాగ్యనగర్ గణేశ్ ఉత్సవ సమితి ప్రధాన కార్యదర్శి భగవంతరావు వివరిస్తుండగా టీఆర్‌ఎస్ కార్యకర్త ఒకరు సమీపం దాకా రావడంతో పాటు మైక్ విరిచేశాడు.

శర్మను ఉద్దేశించి బెదిరింపు వ్యాఖ్యలు చేశాడు. ఇది సరైన పద్దతి కాదని  అక్కడున్నవారు  వారించినా వినిపించుకోలేదు. అప్రమత్తమైన భాగ్యనగర్ ఉత్సవ్ సమితి నాయకులు వెంటనే టీఆర్‌ఎస్ కార్యకర్తను స్టేజీపై నుంచి కిందకు దించేశారు. ఇంతలో వచ్చిన పోలీసులు టీఆర్ఎస్ కార్యకర్తను అక్కడ నుంచి తరలించారు. భద్రతా వైఫల్యంపై బీజేపీ నేతలు మండిపడుతున్నారు. ఒక్కసారిగా జరిగిన ఘటనతో హైదరాబాద్ పోలీసులు ఉలిక్కిపడ్డారు.

అంతకు ముందు హిమంత బిశ్వా శర్మ భాగ్యలక్ష్మి అమ్మవారిని దర్శించుకున్నారు. ఆ తర్వాత ఆయన మాట్లాడుతూ తెలంగాణలో ప్రభుత్వం నిజాం పాలనని కొనసాగిస్తోందని ఆరోపించారు. తెలంగాణలో కుటుంబ పాలన నడుస్తోందని ధ్వజమెత్తారు. కుటుంబ పాలన నుండి విముక్తి కలిగాలని భాగ్యలక్ష్మీ అమ్మవారిని కోరుకున్నానని చెప్పారు. 

కేవలం ఒక కుటుంబానికే పరిమితమైన అధికారం తెలంగాణ ప్రజలందరికీ రావాలని అమ్మవారిని కోరుకున్నానని తెలిపారు. త్వరలో తెలంగాణలో బీజేపీ అధికారంలోకి వస్తుందని జోస్యం చెప్పారు. తెలంగాణలో అందరి ఇండ్లలోకి మహాలక్ష్మి రావాలని వేడుకున్నానని శర్మ తెలిపారు.