బెంగళూరు ఈద్గాలో గణేష్‌ ఉత్సవాలకు`సుప్రీం’ బ్రేక్‌

 బెంగళూరులో ఉన్న ఈద్గా మైదానంలో రెండు రోజుల పాటు వినాయక చవితి ఉత్సవాల నిర్వహణకు రాష్ట్ర ప్రభుత్వం అనుమతించడంకు   సుప్రీంకోర్టు త్రిసభ్య ధర్మాసనం విముఖత వ్యక్తం చేసింది. కర్ణాటక వక్ఫ్ బోర్డు దాఖలు చేసిన  పిటిషన్‌పై యధాస్థితి కొనసాగించాలని త్రిసభ్య ధర్మాసనం తీర్పు ఇవ్వడంతో, ఆ మైదానంలో ఎలాంటి మతపరమైన ఉత్సవాలు జరపకూడదని చెప్పినట్లయింది.

జాగా స్టేటస్‌ కో విధిస్తూ సుప్రీం కోర్టు ఆదేశాలు జారీ చేయటం వల్ల.. ప్రస్తుతం మరో కొత్త సమస్య తలెత్తింది. ఇప్పుడు ఆ స్థలం ప్రభుత్వానిదా లేక వక్ఫ్‌బోర్డుదా? అనే విషయం హైకోర్టు పరిధిలోకి వెళ్లింది. అంతకు ముందు, జస్టిస్ హేమంత్ గుప్తా, జస్టిస్ సుధాంశు ధూలియా ద్విసభ్య ధర్మాసనం భిన్నాభిప్రాయాలు వ్యక్తం చేయడంతో,  త్రిసభ్య ధర్మాసనానికి ఈ పిటిషన్‌ను నివేదించారు. నూతన ధర్మాసనంలో జస్టిస్ ఇందిరా మల్హోత్ర, జస్టిస్ ఎఎస్ ఓకా, జస్టిస్ ఎంఎం సుందరేశ్ ఉన్నారు.

కాగా, ఆగస్టు 25న కర్నాటక హైకోర్టుకు చెందిన సింగిల్ బెంచ్ తీర్పు వెలువరిస్తూ బెంగళూరు ఈద్గా మైదానాన్ని ప్రభుత్వం లేదా బిబిఎంపి స్వాతంత్య్ర దినోత్సవం, గణతంత్ర దినోత్సవం జరుపుకోవడానికి, ముస్లిం సమాజం రెండు ఈద్‌ల నాడు ప్రార్థనలు జరుపుకోవడానికి మాత్రమే ఉపయోగించుకోవాలని ఆదేశించింది.